ކޫއްޑޫ ހިސޯރަކޮށްފި، މައްސަލަ ހައްލުކުރަން މިނިސްޓަރު ހުވަދޫއަށް

މަސްވެރިން މިފްކޯއަށް ކިރުވި ފައިސާ ނުދޭތާ ދެ މަސް ވެފައިވާތީ، ގިނަ އަދަދެއްގެ މަސްވެރިން ގއ. ކޫއްޑޫއަށް އަރައި، އެ ރަށުގެ މަސްކާރުހާނާގެ އޮޕަރޭޝަން ހުއްޓުވައިފިއެވެ.

އެ މައްސަލަ ހައްލުކުރުމަށް ފިޝަރީޒް މިނިސްޓަރު އަހުމަދު ޝިޔާމް ކޫއްޑޫއަށް ވަޑައިގަންނަވާ ގޮތަށް މިއަދު ވަނީ ހަމަޖެހިފައެވެ. ޝިޔާމް މިވަގުތު ހުންނެވީ ށ. އަތޮޅުގައެވެ. މިނިސްޓަރު ކޫއްޑޫ އެއާޕޯޓަށް ވަޑައިގަންނަވާނީ މިއަދު ހަވީރުކަމަށް މައުލޫމާތު ލިބިފައިވެއެވެ.

މިއަދު ހެނދުނުން ފެށިގެން ކޫއްޑޫގައި ކުރަމުންދާ މުޒާހަރާގައި މަސްވެރިން ޑިމާންޑަކީ މިފްކޯއަށް ކިރުވި ފައިސާގެ ވަގުތުން ވަގުތަށް ދިނުމެވެ. އެންމެ ފަހުން މަސްވެރިން ކިރުވި މަހަށް ފައިސާ ދީފައި ވަނީ މިދިޔަ އަހަރުގެ ޑިސެމްބަރު 17ގައެވެ.

އޭގެ ފަހުން މަސްވެރިންނަށް ފައިސާ ނުދޭތާ އިއްޔެއަށް ދެ މަސްވަނީވެފައިވާތީ، މަސްވެރިން ވަނީ އޮޑި ދޯނިފަހަރުގައި ގޮސް ގއ. ކޫއްޑޫއަށް އަރައި އެތަނުގެ އޮޕަރޭޝަން ހުއްޓުވާފައެވެ.

މަސްވެރިންނާ އެކު، ކޫއްޑޫގައި އިހްތިޖާޖު ކުރަމުންދާ ގއ. ވިލިނގިލީ، "ފަހިމަގު 303" ދޯނީގެ މަސްވެރިޔާ އަލީ ސާޖިދު "ހަތާވީސް"އަށް ބުނީ މަސްވެރިން ކޫއްޑޫއަށް އަރައި މިފްކޯ އޮފީހުން މުވައްޒަފުން ނެރެ، މަސްކިރާ ކާރުހާނާގެ މަސައްކަތް ހުއްޓުވާލާފައިވާ ކަމަށެވެ. މަސްވެރިންގެ ޑިމާންޑަކީ ވަގުން ފައިސާ ޖަމާކުރުން ކަމަށް ސާޖިދު ބުންޏެވެ.

"މިވަގުތު 13 ވަރަކަށް ދޯނި ކޫއްޑޫއަށް އައިސް، މުޒާހަރާ ކުރަމުން މިދަނީ. ފައިސާ ޖަމާނުކުރަނީސް މި ރަށުން ނުފައިބާނަން. މުޅި ރަށުގައި މިތިބީ މަސްވެރިން،" ސާޖިދު ބުންޏެވެ.

އެ ރަށަށް ގޮސް، މުޒާހަރާ ކުރަމުންދާ މަސްވެރިން ކޮންޓްރޯލްކުރުމަށް ގއ. ވިލިނގިލިން ފުލުހުން ވެސް އެ ރަށަށް ފޮނުވިއެވެ. ނަމަވެސް މަސްވެރިންގެ ކޮންޓްރޯލްކުރެވޭ ގޮތެއް ނުވެއެވެ.

ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މިފްކޯ އަށް ކިރުވި މަހަށް ދޭން ޖެހޭ 298 މިލިއަން ރުފިޔާ ނުދީވާ ކަމަށާއި އަންނަ މަހުގެ 5ގެ ކުރިން އެ ފައިސާ ދީ ނިންމާނެ ކަމަށެވެ.

މިނިސްޓަރު އެގޮތަށް ވިދާޅުވި ވާހަކަ، ކޫއްޑޫއާ ހަވާލުވެހުރި މިފްކޯގެ ރީޖަނަލް މެނޭޖަރު އަންވަރުސާދާތު މަސްވެރިންނަށް ކިޔައިދެމުންދާ މަންޒަރު ފެންނަ ވީޑިއޯ ސޯޝަލް މީޑިއާގައި ވަނީ އާންމުވެފައެވެ. އެ ވާހަކަތައް މަސްވެރިންނަށް އޮޅުންފިލުވައިދިނަސް، މަސްވެރިން އެކަންކަން އަޑުއަހަން ބޭނުންނުވެ، އަންވަރާ ޒުވާބުކުރާތަން ވީޑިއޯތަކުން ފެނެއެވެ.

"އަނބިދަރިން އެތިބީ ނުކައި. ފެން ބިލެއް، ކަރަންޓު ބިލެއް ނުދެއްކޭ. ކުރިއަށް އޮތީ ރޯދަ މަސް. ކިހިނެއް މަޑުން ތިބެވޭނީ. މަހަށް ވެސް ނުނުކުމެ، މުޒާހަރާއަށް މިނުކުތީ ކެތްމަދުވެގެން. ކިރުވި މަހަށް އަވަހަށް ފައިސާ ދީ،" ޒުވާން މަސްވެރިޔާ ސާޖިދު ބުންޏެވެ.