އެމްޑީޕީގެ މަޖިލިސް މެންބަރުންގެ ގޮތުގައި ތިއްބެވުމަށްފަހު ސަރުކާރު ބަދަލުވުމުން ޕީއެންސީއާ ގުޅިވަޑައިގެންނެވި ރައްޔިތުން މަޖިލީހުގެ ދެ މެންބަރަކު އަމިއްލަ ގޮތުން ކުރިޔަށް އޮތް މަޖިލިސް އިންތިހާބުގައި ވާދަ ކުރެއްވުމަށް ފޯމު ހުށަހަޅުއްވައިފިއެވެ.

އެ ދެ މެންބަރުން އަމިއްލަ ގޮތުން މަޖިލިސް އިންތިހާބުގައި ވާދަކުރެއްވިއިރު އެ ދާއިރާތަކަށް ޕީޕީއެމް/ޕީއެންސީގެ ކެންޑިޑޭޓުން ވެސް ވަނީ އިންތިހާބުކޮށް ޓިކެޓު ވެސް ހަވާލު ކޮށްފައެވެ. އަމިއްލަ ގޮތުން އިންތިހާބުގައި ވާދަކުރައްވާ ދެ މެންބަރުންނަކީ ކުރެންދޫ ދާއިރާގެ މެންބަރު އަބްދުލްޣަނީ އަބްދުލްހަކީމް އާއި މަތިވެރި ދާއިރާގެ މެމްބަރު ހަސަން ޒަރީރެވެ.

އެ ދެ ބޭފުޅުން އަމިއްލަ ގޮތުން އިންތިހާބުގައި ވާދަ ކުރައްވަނީ ޕާޓީގެ ލީޑާޝިޕުގެ ރުހުން އޮވެގެން ކަމެއް ނުވަތަ ނޫން ކަމެއް ނޭނގެއެވެ.

އެ ދެ ބޭފުޅުންގެ އިތުރުން ވެސް ޕީޕީއެމް/ޕީއެންސީ އިން ބޭއްވި ޕްރައިމަރީގައި ވާދަކޮށް އެ އިންތިހާބުން ނާކާމިޔާބުވި ބައެއް ފަރާތްތައް އަމިއްލަ ގޮތުން މަޖިލިސް އިންތިހާބުގައި ވާދަކުރަން ވަނީ ނިންމައިފައެވެ.

ޕީޕީއެމް / ޕީއެންސީން ވަނީ މަޖިލިސް އިންތިހާބުގައި އެ ކޯލިޝަންގެ ޓިކެޓުގައި ވާދަކުރަން ޝައުގުވެރިވާ ފަރާތްތަކުގެ މެދުގައި ޕްރައިމަރީ ބާއްވައިފައެވެ. އެ ޕްރައިމަރީގައި 283 ކެންޑިޑޭޓުން ވާދަކުރިއެވެ. ބަލިވި ބައެއް ކެންޑިޑޭޓުން ވަނީ އަމިއްލަ ގޮތުން މަޖިލީހަށް ވާދަ ކުރަން ނިންމައިފައެވެ. އަދި ބައެއް ފަރާތްތަކުން މިހާރު ވަނީ އިލެކްޝަންްސް އަށް ފޯމު ހުށަހަޅައިފައެވެ.

އެގޮތުން ޕީޕީއެމް / ޕީއެންސީގެ ޕްރައިމަރީން ނާކާމިޔާބުވި ކުރީގެ ފޮރިން މިނިސްޓަރު ދުންޔާ މައުމޫން އަމިއްލަ ގޮތުން މަޖިލީހަށް ވާދަ ކުރެއްވުމަށް ފޯމު ހުށަހަޅުއްވައިފިއެވެ.

މީގެއިތުރުން ހުރާ ދާއިރާ އަށް ޕީޕީއެމް / ޕީއެންސީގެ ޕްރައިމަރީގައި ވާދަކުރެއްވި މަކުނުދޫ ދާއިރާގެ ކުރީގެ މެންބަރު އަނާރާ ނައީމު ވެސް ވަނީ ޕްރައިމަރީން ނާކާމިޔާބުވުމުން އަމިއްލަ ގޮތުން އެ ދާއިރާ އަށް ވާދަ ކުރަން ނިންމަވައިފައެވެ.

ހަމައެއާއެކު މިލަންދޫ ދައިރާގެ ޕްރައިމަރީގައި ވާދަކުރި ނަބީލް ޒަމީރު ވެސް އަމިއްލަ ގޮތުން އެ ދާއިރާ އަށް ވާދަކުރަން ވަނީ ނިންމައިފައެވެ. އެ ދާއިރާގެ ޓިކެޓު ކަށަވަރު ކުރެއްވީ 18ވަނަ މަޖިލީހުގައި އެ ދާއިރާގެ މެންބަރުކަން ކުރެއްވި ހަސަން މުފީދެވެ.