ކުރިޔަށް އޮތް ރައްޔިތުން މަޖިލިސް އިންތިހާބުގައި ދެ ސަރަހައްދެއްގައި ޓެންޓު ޖަހައި ދީ 40 ވޯޓުލާ މަރުކަޒު ގާއިމް ކޮށްދޭނެ ބަޔަކު ހޯދުމަށް އިލެކްޝަންސް ކޮމިޝަން (އީސީ) އިން އިއުލާނު ކޮށްފިއެވެ.

އީސީން ކޮށްފައިވާ އިއުލާނުގައި ބުނެފައި ވަނީ ރައްޔިތުންގެ މަޖިލީހުގެ އިންތިހާބު 2024 ގެ ވޯޓާ ގުޅިގެން މާލޭގެ 2 ސަރަޙައްދެއްގައި ޓެންޓު ޖަހައިގެން 40 ވޯޓުލާ މަރުކަޒު ތައްޔާރުކޮށްދޭނެ ފަރާތެއް ހޯދަން ބޭނުންވާ ކަމަށެވެ. އަދި އެކަމަށް ޝަރުތު ހަމަވާ ފަރާތްތަކަށް ފުރުސަތު ހުޅުވާލާ ކަމަށް ވެސް ބުންޏެވެ.

ބީލަން ހުޅުވުން އޮންނާނީ އަންނަ މަހުގެ ހަތަރުވަނަ ދުވަހުގެ މެންދުރު 13:00 ގައި އިލެކްޝަންސް ކޮމިޝަން (ޕޯޓް ކޮމްޕްލެކްސް 5 ވަނަ ފަންގިފިލާ، ހިލާލީމަގު) ގައެވެ. ގަޑިޖެހުމަށްފަހު ހުށަހަޅާ ބީލަންތައް ބަލައިނުގަނެވޭނެ ކަމަށާއި ބީލަންތައް ހުންނަންވާނީ ސިޓީ އުރައެއްގައި ބަންދުކުރެވިފައި ކަމަށް އީސީން ބުންޏެވެ.

ސިޓީ އުރައިގެ ބޭރުގައި ބީލަމަށް ދެވިފައިވާ ނަން، ޕްރޮޖެކްޓް ނަންބަރު، ހުޅުވަން ކަނޑައެޅިފައިވާ ތާރީހާއި ވަގުތު އަދި ކޮންޓްރެކްޓަރުގެ ނަން ލިޔެވިފައި އޮންނަންވާނެ ކަމަށް ވެސް އީސީން ބުންޏެވެ.

ރައްޔިތުންގެ މަޖިލިސް އިންތިހާބު ބޭއްވުމަށް ހަމަޖެހިފައި ވަނީ އަންނަ މާޗު މަހުގެ 17ވަނަ ދުވަހުއެވެ.