ސަރުކާރު ހިންގާ މައި ދެޕާޓީ ކަމަށްވާ ޕީޕީއެމް/ޕީއެންސީގެ ކޯލިޝަންގައި ތިބި މެންބަރުންގެ އަދަދު 64،000 އަށް އަރައިފިއެވެ.

އިލެކްޝަންސް ކޮމިޝަން (އީސީ) އިން މިއަދު ވަނީ ދައުލަތުގެ ބަޖެޓުން ޕާޓީތަކަށް ދޫކޮށްފައިވާ ފައިސާތަކުގެ ތަފްސީލު ހިއްސާ ކޮށްފައެވެ. ޕީޕީއެމް/ޕީއެންސީ އަށް އެކު ޖުމްލަ ދައުލަތުގެ ބަޖެޓުން 18 މިލިއަން ރުފިޔާ ވަނީ ދޫކޮށްފައެވެ. އެއީ ޕީޕީއެމް އަށް 10 މިލިއަން އަދި ޕީއެންސީ އަށް 8 މިލިއަން ރުފިޔާއެވެ.

މިދިޔަ އަހަރު ނިމުނުއިރު ޕީޕީއެމްގައި 36،233 މެންބަރުން ތިބި ކަމަށާއި ޕީއެންސީގައި މިދިޔަ އަހަރު ނިމުނުއިރު 28،201 މެންބަރުން ތިބި ކަމަށް އީސީން ބުންޏެވެ.

ވަކި ޕާޓީއަކަށް އެންމެ ގިނަ ފައިސާ ލިބިފައި ވަނީ އެމްޑީޕީ އަށެވެ. އެޕާޓީގައި މިދިޔަ އަހަރު ނިމުނުއިރު 52،142 މެންބަރުން ތިބި ކަމަށް އީސީން ބުންޏެވެ. އެހެންކަމުން އެޕާޓީ އަށް ދައުލަތުގެ ބަޖެޓުން 15 މިލިއަން ރުފިޔާ ވަނީ ދޫކޮށްފައެވެ.

ދެން ފައިސާ ލިބުނު ޕާޓީތަކާއި ފައިސާ ލިބުނު މިންވަރު:

  • އަދާލަތު ޕާޓީ: ދެ ލައްކަ ރުފިޔާ
  • ޖުމްހޫރީ ޕާޓީ: ފަސް ލައްކަ ރުފިޔާ
  • އެމްޑީއޭ: ދެ ލައްކަ ރުފިޔާ

ދައުލަތުން ފައިސާ ދެމުން ގެންދަނީ އެ އަހަރެއްގެ ބަޖެޓު ރައްޔިތުންގެ މަޖިލީހުން ފާސްކުރާ ދުވަހާ ހަމައަށް 10،000 މެންބަރުން ހަމަވެފައިވާ ސިޔާސީ ޕާޓީތަކަށެވެ.