ރައްޔިތުން މަޖިލިސް އިންތިހާބުގެ ވޯޓާސް ލިސްޓަށް ޝަކުވާ ހުށަހެޅުމުގެ މުއްދަތު ހަމަވިއިރު އެ ލިސްޓަށް ޖުމްލަ 700 އަށްވުރެ ގިނަ ޝަކުވާ ހުށަހަޅައިފިއެވެ.

މަޖިލިސް އިންތިހާބުގެ ވޯޓާސް ލިސްޓަށް ޝަކުވާ ހުށަހެޅުމަށް ދީފައި ވަނީ އިއްޔެގެ 15:00އާ ހަމައަށެވެ. އެ ވަގުތު ހަމަވިއިރު ޖުމްލަ 746 ޝަކުވާއެއް ވޯޓާސް ލިސްޓަށް ލިބިފައިވާ ކަމަށް އިލެކްޝަންސް ކޮމިޝަނުން މިއަދު ބުންޏެވެ.

ލިސްޓަށް ހުށަހަޅާފައިވާ ޝަކުވާގެ ތެރެއިން އެންމެ ގިނަ ޝަކުވާ ހުށަހަޅާފައި ވަނީ އެޑްރެސް ބަދަލު ވެގެންނެވެ. އެގޮތުން އެޑްރެސް ބަދަލުވެފައި އޮތުމުން 450 ޝަކުވާއެއް ހުށަހަޅާފައިވެއެވެ. އަދި އެ ލިސްޓުގައި މަރުވެފައިވާ މީހުން ހިމެނިފައި ވާތީ 225 ޝަކުވާއެއް ވަނީ ހުށަހަޅާފައެވެ.

މީގެއިތުރުން ވޯޓުލާ ދާއިރާ ބަދަލުވެފައި އޮތުމުން 40 ޝަކުވާއެއް ހުށަހަޅާފައިވާއިރު ލިސްޓުގައި ނަން ނެތުމުން ފަސް ޝަކުވާއެއް ވަނީ ހުށަހަޅާފައެވެ.

ރައްޔިތުން މަޖިލީހުގެ އިންތިހާބު މާޗު މަހުގެ 17ވަނަ ދުވަހު ބާއްވަން އިލެކްޝަންސް ކޮމިޝަނުން ވަނީ ނިންމައިފައެވެ.