ސަރުކާރުން މާލެ ސިޓީ ކައުންސިލަށް އެއްވެސް ނުފޫޒެއް ފޯރުވަމުން ނުދާ ކަމަށް އެ ކައުންސިލް ހިންގެވުމާއި ވަގުތީ ގޮތުން ހަވާލުވެ ހުންނެވި ޑެޕިއުޓީ މޭޔަރު އަހްމަދު ނަރީޝް ވިދާޅުވެއްޖެއެވެ.

ސިޓީ ކައުންސިލުން އިއްޔެ ވަނީ ސިޓީ ކައުންސިލްގެ ބެލުމުގެ ދަށުން ހިންގަމުން އަންނަ ބޮޑެތި މަޝްރޫއުތަކެއް ކޮންސްޓްރަކްޝަން މިނިސްޓްރީގެ ދަށަށް ބަދަލު ކުރުމަށް ނިންމައިފައެވެ.

އެކަމާއި ގުޅިގެން ދާދިފަހުން މާލެ ސިޓީ ކައުންސިލްގެ މޭޔަރު ކަމަށް އިންތިހާބުވެވަޑައިގެންނެވި އިދިކޮޅު އެމްޑީޕީގެ ކެންޑިޑޭޓު އާދަމް އާޒިމް ވަނީ ކަންބޮޑުވުން ފާޅު ކުރައްވާފައެވެ. އެގޮތުން އާޒިމް ވަނީ މާލެ ސިޓީގެ ކަންކަން ކުރިއަށް ގެންދަންވީ ގޮތް ރައްޔިތުން ސާފުކޮށް ބުނެފައި ވަނިކޮށް އަދި ގާނޫނުއަސާސީގެ އަށްވަނަ ބާބާއި ލާމަރުކަޒީ ގާނޫނުގައި ކަނޑައަޅާފައިވާ ގޮތްތަކާއި ހިލާފަށް އަމަލު ކުރަމުންދާ ކަމަށް ވިދާޅުވެފައެވެ.

އަދި ރައީސް އޮފީހުގެ ވަޒީރު ބޭފުޅުން ސިޓީ ކައުންސިލަށް ވަންނަވައިގެން މަސައްކަތް އަތުލައްވަން ކުރައްވާ މަސައްކަތް ހުއްޓާލެއްވުމަށާއި އަދި އިންތިހާބު ކޮށްފައިވާ މޭޔަރު މަގާމާ ހަވާލުވަންދެން ކައުންސިލުން ނިންމި ނިންމުމަށް އަމަލުކުރުން ފަސްކުރުމަށް ގޮވާލައިފައެވެ.

އެކަމާއި ގުޅިގެން ނަރީޝް ވިދާޅުވީ ސަރުކާރަކުން ކައުންސިލަށް ނުފޫޒެއް ނުފޯރުވާ ކަމަށެވެ. އަދި ކައުންސިލުން ނިންމާފައިވާ ނިންމުމަކީ ކައުންސިލްގެ ފްލޯއަށް ހުށަހަޅާ މަޝްވަރާކުރެވުނު މައްސަލައެއް ކަމަށެވެ.

އަދި ވިދާޅުވީ ސަރުކާރުގެ އެއްވެސް ވަޒީރެއް އަދި ރައީސް އޮފީހަކުން ކައުންސިލްގެ މަސައްކަތަށް އަތްބާނަން އަދި ކައުންސިލްގެ މަސައްކަތްކެއް އަތުލަން އެއްވެސް މަސައްކަތެއް ކޮށްފައި ނުވާ ކަމަށެވެ.