ސިނަމާލެ ބްރިޖުގެ މަސައްކަތް ކުރި ކުންފުނީގެ އިސްވެރިންނާ ރައީސް ޑރ. މުހައްމަދު މުއިއްޒު ބައްދަލުކުރައްވައިފިއެވެ.

ރައީސް އޮފީހުން މިއަދު ބުނީ ޗައިނާ އަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި ސިނަމާލެ ބްރިޖްގެ އަމަލީ މަސައްކަތްކުރި ޗައިނާ ކޮމިޔުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ) ގެ އިސްވެރީން މިއަދު ރައީސް ޑރ. މުއިއްޒުގެ އަރިހަށް އިހްތިރާމުގެ ޒިޔާރަތެއް ކުރައްވާފައިވާ ކަމަށެވެ. ނަމަވެސް އެ ބައްދަލުކުރެއްވުމުގެ އިތުރު ތަފްސީލެއް ނުދެއެވެ.

ރައީސް އޮފީހުން އާއްމު ކޮށްފައިވާ ބައެއް ފޮޓޯތަކުން ފެންނަ ގޮތުގައި، އެ ބައްދަލުވުމުގައި އެކުންފުނިން ވަނީ ސިނަމާލެ ބްރިޖުގެ މޮޑެލެއް ފަރުމާ ކޮށްފައެވެ.

ސިނަމާލެ ބްރިޖުގެ މޮޑެލެއް ފަރުމާ ކޮށްފައި --- ފޮޓޯ | ރައީސް އޮފީސް

ރައީސްގެ މި ދަތުރުފުޅުގައި ދިވެހިރާއްޖެ އާއި ޗައިނާއާ ދެމެދު ރަސްމީ ވާހަކަފުޅުތައް ބޭއްވުމަށް ހަމަޖެހިފައިވެއެވެ. އަދި ދެ ގައުމުގެ ދެމެދު އެކި ދާއިރާތަކުން ގުޅުން ބަދަހިކުރުމުގެ މުހިންމު އެއްބަސްވުން ބަދަލުކުރުމަށްވެސް ހަމަޖެހިފައިވެއެވެ.

އެގޮތުން ވިޔަފާރީގެ ގުޅުންތައް ބަދަހިކުރުމާއި، ފަންނީ ދާއިރާތަކުން މީހުން ބިނާކުރުމާއި، އިޖުތިމާއީ، އިގްތިސޯދީ އަދި ޓެކްނޮލޮޖީގެ އިތުރުންވެސް އެކި ދާއިރާތަކުން ގުޅުން ބަދަހިކުރުމުގެ އެއްބަސްވުން ހިމެނެއެވެ.

ސިނަމާލެ ބްރިޖުގެ މަސައްކަތްކުރި ކުންފުނީގެ އިސްވެރިންނާ ރައީސް މުއިއްޒު އަދި ދިވެހި ސަރުކާރުގެ އިސްވެރިން --- ފޮޓޯ | ރައީސް އޮފީސް

ރައީސުލްޖުމްހޫރިއްޔާގެ މި ދަތުރުފުޅުގައި، ފޫޖޯގައި ބޭއްވުމަށް ހަމަޖެހިފައިވާ އިންވެސްޓް މޯލްޑިވްސް ފޯރަމްގައި ބައިވެރިވެވަޑައިގެން، ޗައިނާގެ ބައެއް ވިޔަފާރިވެރިންނާ ބައްދަލުކުރައްވައި، ދިވެހިރާއްޖެއާއި ޗައިނާއާ ދެމެދު އިޖުތިމާއީ އަދި އިގްތިސޯދީ ގުޅުން ބަދަހި ކުރެވިދާނެ ދާއިރާތަކާ ބެހޭގޮތުން މަޝްވަރާ ކުރެއްވުމަށްވެސް ހަމަޖެހިފައިވެއެވެ