ރާއްޖެ އަށް މިއަހަރު އައި ފުރަތަމަ ކްރޫޒްލައިން މާލޭ އަށް ބަނދަރުކޮށްފިއެވެ.

ރާއްޖެ އަށް ބަނދަރު ކޮށްފައި ވަނީ އިޓަލީގެ މަޝްހޫރު ކްރޫޒްލައިން ކުންފުންޏެއް ކަމަށްވާ ކޮސްޓާގެ "ކޮސްޓާ ސެރީނާ" ނަމަކަށް ކިޔާ ކްރޫޒްލައިނެކެވެ. މި ކްރޫޒްލައިނުން 3000 އަށްވުރެ ގިނަ ފަތުރުވެރިން އައިސްފައިވެއެވެ.

މައުލޫމާތު ލިބިފައިވާ ގޮތުގައި މި ކްރޫޒްލައިނާ ރާއްޖެ އަށް އައިސްފައި ވަނީ އިންޑިއާގެ ކޮޗިން އިން ފުރައިގެންނެވެ. އެހެންކަމުން މި ކްރޫޒްލައިނުން ރާއްޖެ އައިސްފައިވާ ފަތުރުވެރިންގެ ތެރެއިން ގިނައީ އިންޑިއާގެ ފަތުރުވެރިންނެވެ. ނަމަވެސް ޔޫރަޕްގެ އެހެން ގައުމުތަކުގެ ފަތުރުވެރިން ވެސް މި ކްރޫޒްލައިނުން ރާއްޖެ އަށް އައިސްފައިވެއެވެ.

މިއަދު މާލެއަށް ބަނދަރުކުރި ކްރޫޒްލައިން "ކޮސްޓާ ސެރީނާ" އިން ފޭބި ފަތުރުވެރިންތަކެއް: ހަތާވީސް ފޮޓޯ | އާދަމް ނަޒީރު

މޯލްޑިވްސް އެސޯސިއޭޝަން އޮފް ޔޮޓް އެޖެންޓް (މާޔާ) އިން އެކްސްގައި ކޮށްފައިވާ ޕޯސްޓެއްގައި ބުނީ މިއީ "ކޮސްޓާ ސެރީނާ" އިން މިއަހަރު ކުރާ ފުރަތަމަ ދަތުރު ކަމަށެވެ. އަދި މި ކްރޫޒްލައިން ރާއްޖެ ގެނައުމަށްޓަކައި ސަރުކާރުގެ ކަމާބެހޭ އިދާރާތަކުން ދިން އެހީތެރިކަމަށް ޝުކުރު އަދާ ކުރާ ކަމަށް ވެސް ބުންޏެވެ.

މިއަދު މާލެއަށް ބަނދަރުކުރި ކްރޫޒްލައިން "ކޮސްޓާ ސެރީނާ" އިން ފޭބި ފަތުރުވެރިންތަކެއް: ހަތާވީސް ފޮޓޯ | އާދަމް ނަޒީރު

ދިވެހިރާއްޖެއަށް އަންނަ ބޭރުގެ ޓޫރިސްޓް އުޅަނދުފަހަރު ރާއްޖޭގެ ސަރަޙައްދުގައި ދުއްވުމާއި ބަނދަރުކުރުމާއި ބެހޭ ގަވާއިދަށް ކުރީގެ ސަރުކާރުން ހަދާފައިވާ ގަވާއިދުގެ ސަބަބުން ރާއްޖެ އަށް ކްރޫޒްލައިންތައް ގެނައުމަށް ދަތިތައް ކުރިމަތިވާ ކަމަށް ބުނެ މީގެކުރިން މާޔާ އިން ވަނީ ކަންބޮޑުވުންފާޅު ކޮށްފައެވެ. އެއާއެކު ސަރުކާރުން ވަނީ އެ ގަވާއިދު އިސްލާހު ކޮށްފައެވެ.