ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުން ދިނުމަށް ދައުރުން ބޭރު ޖަލްސާއެއް ބޭއްވުމަށް މަޖިލީހުގެ މެޖޯރިޓީ ޕާޓީ އަދި އިދިކޮޅު އެމްޑީޕީން ސޮއި ހަމަ ކުރުމުގެ މަސައްކަތް ފަށައިފިއެވެ.

ސޯޝަލް މީޑިއާގައި މިހާރު އަންނަނީ ސޮއި ހަމަ ކުރުމަށް ބައެއް މެންބަރުން ސޮއި ކުރައްވާ މަންޒަރު ފެނިވަޑައިގަންނަވާ ފޮޓޯޓަކެއް ދައުރުވަމުންނެވެ. އެކަމުގެ ތަފްސީލު ހޯދާލުމަށް ބައެއް މެންބަރުންނަށް "ހަތާވީސް" އިން ގުޅާލުމުން ފޯނަށް ޖަވާބު ނުދެއްވާތީ ތަފްސީލު ލިބޭ ގޮތް ވަނީ ނުވެފައެވެ.

ނަމަވެސް ބައެއް އެހެން މީޑިއާތަކަށް އެމްޑީޕީގެ މެންބަރުން ވިދާޅުވެފައި ވަނީ އެ ފޮޓޯތަކަކީ ދައުރުން ބޭރު ޖަލްސާއެއް ބޭއްވުމަށް ސޮއި ހަމަ ކުރުމުގެ މަސައްކަތް ކަމަށެވެ.

މުއިއްޒުގެ ކެބިނެޓު ވަޒީރުންނަށް ރުހުން ދޭން ފެންނަ ކަމަށް ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމެޓީން މިއަދު ވަނީ ފާސްކޮށްފައެވެ.

މިއަދު ބޭއްވި އެ ކޮމެޓީގެ ބައްދަލުވުމުގައި ހުރިހާ ވަޒީރުންނަށް ރުހުން ދޭން ފެންނަ ކަމަށް ފަސް މެންބަރަކު ވޯޓު ދެއްވިއެވެ. ރުހުން ދޭން ނުފެންނަ ކަމަށް އެއްވެސް މެންބަރަކު ވޯޓު ދެއްވާފައެއް ނުވެއެވެ. ނަމަވެސް ވަކި ގޮތަކަށް ވޯޓު ނުދެއްވާ ހަތަރު މެންބަރަކު ތިއްބެވެ.

ވަކި ގޮތަކަށް ވޯޓު ނުދެއްވި ހަތަރު މެންބަރުންނަކީ އެމްޑީޕީގެ ހަތަރު މެންބަރުންނެވެ. އެއީ މަނަދޫ ދާއިރާ މެންބަރު އަހުމަދު ހާރޫނާއި ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަތީފް އިހަވަންދޫ ދާއިރާގެ މެންބަރު މުހައްމަދު ޝިފާއުގެ އިތުރުން ވައިކަރަދޫ ދާއިރާގެ މެންބަރު ހުސެއިން ޒިޔާދުއެވެ.

މިގޮތަށް ފާސްވި ނަމަވެސް މަޖިލީހުގެ ތަޅުމުގައި ކޮންމެ ވަޒީރަކަށް ވެސް ވޯޓަށް އަހާނީ ވަކިވަކިންނެވެ.