މަދިރީގެ ޒަރިއްޔާއިންޖެހޭ ބަލިތައް ރާއްޖޭގައި ގިނަވަމުންދާތީ މަދިރި މަދުކުރުމަށް “މަދިރިން ރައްކާ” ގެ ނަމުގައި ގައުމީ ފެންވަރުގެ ހަރަކާތެއް މިއަދު ފަށައިފިއެވެ.

އެ ހަރަކާތް ފައްޓަވައި ދެއްވީ ހުޅުމާލޭގައި އޮތް ރަސްމިއްޔާތެއްގައި ނާއިބު ރައީސް ހުސައިން މުހައްމަދު ލަތީފެވެ. މި ހަރަކާތަކީ ސަރުކާރުން ކުރިޔަށް ގެންދާ ހަރަކާތެކެވެ. އެ ހަރަކާތް އިންތިޒާމު ކުރާ ފަރާތަކީ އާބަންކޯއެވެ. މި ހަރަކާތް ފަށާފައި ވަނީ މިއަދު ހެނދުނު ހުޅުމާލެ ފޭސް އެކެއްގެ ރިވެލި ޕާކުގައެވެ.

އެ ރަސްމިއްޔާތުގައި ވާހަކަދައްކަވަމުން ނާއިބު ރައީސް ހުސައިން ވިދާޅުވީ ފަރުދީ ގޮތުންވެސް އަދި ޖަމާއަތުގެ ގޮތުންވެސް އަދި ރައްޔިތުންނަށް ހިދުމަތްދޭ ތަނެއްގެ ވިޔަސް އެފަދަ ފަރާތެއްގެ ކުޑަވެސް އިހުމާލަކުން ވަރަށް ބޮޑެތި ކަންކަމާ ކުރިމަތިލާން ޖެހިދާނެ ކަމަށެވެ.

އަދުގެ ހާލަތުން އަރައިގަތުމަށްޓަކައި މުޖުތަމައުގެ ފަރުދުންގެ ތެރޭގައި އޮތް އެއްބައިވަންތަކަން ދެއްކުން މުހިއްމު ކަމަށް އެމަނިކުފާނު ވިދާޅުވިއެވެ.

ސާފު ކުރުމުގެ ހަރަކާތުގައި ނާއިބު ރައީސް ހުސައިން ވާހަކަދައްކަވަނީ: ފޮޓޯ | ރައީސް އޮފީސް

"ތާރީހުގައި އަޅުގަނޑުމެން ވަނީ އެކަން އެގޮތަށް ދައްކައިދީފައި. އިޖުތިމާއީ މިންގަނޑަށް ފެތޭނެ ގޮތަށް ތަންތަން ބެހެއްޓުން މުހިންމު. މަދިރި އާލާ ނުވާ ގޮތަށް ތަންތަން ބެހެއްޓުމަށް ސަމާލުކަން ދެއްވާ،" ނާއިބު ރައީސް ވިދާޅުވިއެވެ.

އާބަންކޯ އިން ބުނީ އެ ހަރަކާތުގެ ދަށުން އެކުންފުނީގެ މުވައްޒަފުން އިސްނަގައިގެން ހުޅުމާލެ ސާފު ކުރުމަށްވެސް ހަމަޖެހިފައިވާ ކަމަށެވެ. ހުޅުމާލެ ސާފުކުރުމުގެ ހަރަކާތް ކުރިއަށް ގެންދެވޭނީ 15 ޓީމް އަކަށް ބަހާލެވިގެން ހުޅުމާލެ ފޭސް 1 އަދި ފޭސް 2 ގައި މީހުން ދިރިއުޅޭ ސަރަހައްދުތައްވެސް ހިމެނޭ ގޮތަށެވެ. ހަމަ މިއާއެކު ސާފުކުރުމުގެ އެ ބޮޑު ހަރަކާތް ކުރިއަށް ދާނީ ހެލްތް މިނިސްޓްރީ އަދި ހެލްތް ޕޮރޮޓެކްޝަން އެޖެންސީ އާއި ގުޅިގެންނެވެ.

މީގެ އިތުރުން ފައިލޭރިއާ ފެތުރުން ކޮންޓްރޯލް ކުރުމުގެ ގިނަ މަސައްކަތްތަކެއް އާބަންކޯ އާއި ސަރުކާރުގެ ކަމާއިބެހޭ އިދާރާތަކާއި ގުޅިގެން އަންނަނީ ކުރަމުންނެވެ. އެގޮތުން މި މަހުގެ ތެރޭގައި ހުޅުމާލޭގެ އެކި ސަރަހައްދުތަކުން 60 ޓަނުގެ ކުނި ނަގައި ސާފްކޮށްފައިވެއެވެ.

ސާފު ކުރުމުގެ ހަރަކާތުގައި ނާއިބު ރައީސް ބައިވެރިވެވަޑައިގަންނަވަނީ: ފޮޓޯ | ރައީސް އޮފީސް

އަދި ފައިލޭރިއާ ފެތުރުން ހުއްޓުވުމަށް މަސައްކަތް ކުރުމަށް ހާއްސަ ޓާސްކްފޯސް އެއް އެކުންފުނިން ވަނީ އެކުލަވާލެވިއިފައެވެ. މީގެ އިތުރުން އާބަންކީގެ އިންސްޕެކްޝަން ޓީމުން ހުޅުމާލޭގެ އެކި ސަރަހައްދުތައް ބަލާ މަދިރި އާލާވާ ފަދަ 200 އަށްވުރެ ގިން ތަންތަން ފާހަގަކޮށް، އެ ތަންތަނަށް ކެމިކަލް އެޅުމުގެ މަސައްކަތާއި ހުޅުމާލޭގެ އެކި ސަރަހައްދަށް މަދިރި ދުން ޖެހުމުގެ މަސައްކަތް ގެންދަނީ ކުރިޔަށެވެ.

ހަމަމިއާއެކު މިކަމަށް ރައްޔިތުން ހޭލުންތެރިކުރުވުމުގެ ތަފާތު ހަރަތްތައްވެސް ކުރިއަށް ގެންދިއުމަށް ވަނީހަމަޖެހިފައެވެ. އެ ހަރަކާތުގެ ދަށުން ހުޅުމާލޭގެ އިތުރުން ގުޅީފަޅު އަދި ތިލަފުށީގައިވެސް ސާފުކުރުމުގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވާ ކަމަށް އާބަންކޯ އިން ބުނެއެވެ.