ޕީޕީއެމް ކުރީގެ ވެރިކަން ފަދައިން، މި ސަރުކާރުގެ އަމަލުތައް ފެންނަނީ ދުލާއި ގަލަމުގެ މިނިވަންކަން ނިގުޅައިގަންނަން މަސައްކަތް ކުރާތަންކަމުގައި އިދިކޮޅު އެމްޑީޕީން ބުނެފިއެވެ.

ސަރުކާރަށް ފާޑުކިޔައި، ރިޕޯޓުތަކާއި ޚަބަރުތައް ގެނެސްދޭ "ދިޔަވަރު.ކޮމް" އާއި "ކުރުސީ.ކޮމް" ސަރުކާރުން އިއްޔެ ވަނީ ބްލޮކްކޮށްފައެވެ. އަދި ނޫސްމަޖައްލާ ރަޖިސްޓްރީކުރުމުގެ ގާނޫނުގެ ދަށުން ރަޖިސްޓްރީކޮށްގެން ހިންގަމުންދިޔަ "ފުރަތަމަ.ކޮމް" ވެސް ސަރުކާރުން ވަނީ ބްލޮކްކޮށްފައެވެ.

އެކަމާ ގުޅިގެން ޖަމިއްޔާޖަމާތްތަކުން ފާޑުކިޔަމުންދަނިކޮށް، އެމްޑީޕީން މިރޭ ނެރުނު ނޫސްބަޔާނެއްގައި ބުނީ ފާޑުކިޔުންތަކަށް އިޖާބަދިނުމުގެ ބަދަލުގައި ގަދަބާރުން އޮބަހައްޓަން ސަރުކާރުން މަސައްކަތްކުރަމުންދާ ކަމަށެވެ. އަދި ހިޔާލު ފާޅުކުރުމުގެ މިނިވަންކަން ހަނި ކުރުން ހުއްޓާލުމަށާއި މީޑިއާތަކަށް ބިރު ދައްކައި ފިޔަވަޅު އެޅުމަކީ ހުދުމުހުތާރު ދައުލަތެއްގެ ސިފައެއް ކަމަށް އެމްޑީޕީން ބުންޏެވެ.

މިނިވަންކަމާއެކު ފިކުރުކުރުމާއި، ޚިޔާލު ފާޅު ކުރުމަކީ ޤާނޫނުއަސާސީއިން ކޮންމެ ދިވެހި ރައްޔިތަކަށް ކަށަވަރު ކޮށްދީފައި އަސާސީ ހައްގެއް ކަމަށް ފާހަގަކޮށް ބަޔާނުގައި ބުނީ އެމްޑީޕީގެ ކުރީގެ ދެ ވެރިކަމުގައިވެސް ރައްޔިތުންގެ އަސާސީ ހައްގުތައް ވަކީން ހާއްސަކޮށް ހިޔާލު ފާޅު ކުރުމުގެ މިނިވަންކަން ފުރިހަމައަށް ކަށަވަރުކޮށްދީފައިވާނެ ކަމާށެވެ. އަދި އޭރުގެ ސަރުކާރާއި ދެކޮޅަށް ރޭވިގެން, އިންތިޒާމުވެވިގެން ދޮގު ހަބަރު ފަތުރަމުންދިޔަ އިރުވެސް އެފަދަ މީޑިއާތަކަށް ސަރުކާރުން ފިޔަވަޅު އަޅާފައި ނުވާނެ ކަމަށް އެމްޑީޕީން ބުންޏެވެ.

އެމްޑީޕީން ބުނީ ސަރުކާރަށް ފާޑުކިޔުމުގެ މިނިވަންކަން ތަންމިނަށް އޮންނާން ޖެހޭނެ ކަމަށެވެ.