ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނާއިބާއި ވަޒީރުންގެ މުސާރަތައް ބޮޑުކުރީ ސަރުކާރުގެ އެއްވެސް މަޝްވަރާއެއް ނެތި ކަމަށާއި މުސާރަ ރައީސުލްޖުމްހޫރިއްޔާގެ މުސާރައާ ގުޅޭ ގޮތުން ރައީސް ޑރ. މުހައްމަދު މުއިއްޒު ނިންމެވި ނިންމުމަށް ނާއިބު ރައީސް ހުސައިން މުހައްމަދު ލަތީފް ތާއީދު ކުރައްވައިފިއެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނާއިބާއި ވަޒީރުންގެ މުސާރަތައް ބޮޑު ކުރުމަށް އެދިފައި ނުވާނެ ކަމަށެވެ. އަދި މުސާރަތައް ބޮޑު ކުރަން ބޭނުން ނުވާ ކަމަށާއި އެފަދަ ނިންމުމެއް ނިންމާފައި ވަނީ އެއްވެސް މަޝްވަރާއެއް ނެތި ކަމަށެވެ.

އެހެންކަމުން ރައީސް ނިންމެވީ މުސާރަ އަށް އިތުރުކުރި ބައި ކުޑަކުދިންގެ ހިޔާ ފަދަ އިޖުތިމާއީ ފަންޑަކަށް އެބައި ދިނުމަށެވެ.

އެކަމާއި ގުޅިގެން ނާއިބު ރައީސް އެކްސްގައި ކުރެއްވި ޕޯސްޓެއްގައި މިއަދު ވިދާޅުވީ ރައީސް އާއި ނާއިބު ރައީސް އަދި ވަޒީރުންގެ މުސާރައަށް ގެނައި ބަދަލަކީ އެއްވެސް މަޝްވަރާއަކާ ނުލާ ގެނެވުނު ބަދަލެއް ކަމަށެވެ.

"އެ މުސާރައިގެ ކުރިއެރުން ކުޑަކުދިންގެ ހިޔާ ފަދަ އިޖްތިމާއީ ފަންޑަކަށް ހަދިޔާ ކުރަން ރައީސުލްޖުމްހޫރިއްޔާ ނިންމެވި ނިންމެވުމަށް ފުރިހަމައަށް ތާއީދު ކުރަން،" ނާއިބު ރައީސްގެ ޕޯސްޓުގައިވެއެވެ.

މަޖިލީހުގެ މާލިއްޔަތު ކޮމެޓީން މުސާރަތަކަށް ބަދަލު ގެނެސްފައި ވަނީ އިއްޔެ ބޭއްވި އެ ކޮމެޓީގެ ބައްދަލުވުމުގައެވެ.

މިއީ އަންނަ އަހަރަށް ފާސްކުރި ބަޖެޓުގައި ރައީސާއި ނާއިބު ރައީސާއި އަދި މިނިސްޓަރުންގެ އިތުރުން ކައުންސިލް މެންބަރުންގެ މުސާރަ ބޮޑު ކުރަން ހުށަހަޅާފައިވެއެވެ. މިއަދު މެންދުރު ބޭއްވި މާލިއްޔަތު ކޮމެޓީގެ ބައްދަލުވުމުގައި އެ ކޮމެޓީގެ މެންބަރުން ވަނީ މުސާރަތައް ބޮޑު ކުރުމާއި ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައެވެ.

ރައީސުލްޖުމްހޫރިއްޔާގެ މިހާރުގެ މުސާރައަކީ 100،000 ރުފިޔާއެވެ. ރައީސުލްޖުމްހޫރިއްޔާގެ ނާއިބުގެ މުސާރައަކީ 75،000 ރުފިޔާއެވެ. ނަމަވެސް ކޮމެޓީން މިއަދު ފާސްކުރީ ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކަށް 120،000 ރުފިޔާ އަދިރައީސުލްޖުމްހޫރިއްޔާގެ ނާއިބުގެ އަސާސީ މުސާރަ 93،000 ރުފިޔާ ބޮޑު ކުރުމަށް ނިންމައިފައެވެ.

އެހެންކަމުން ރައީސްގެ މުސާރަ އަށް އިތުރުވެފައި މިވަނީ 20،000 ރުފިޔާއެވެ. އަދި ނާއިބު ރައީސްގެ މުސާރައަށް 18،000 ރުފިޔާ ވަނީ ބޮޑުވެފައެވެ.

ބޮޑުކުރަން ނިންމި އެހެން ބައެއް މުސާރަތައް:

- މިނިސްޓަރުންގެ މުސާރަ: 72،000 ރުފިޔާ

- ކައުންސިލް މޭޔަރުގެ މުސާރަ: 46،000 ރުފިޔާ

- ޑެޕިއުޓީ މޭޔަރު: 40،500 ރުފިޔާ

- ރަށު ކައުންސިލް ރައީސް 25،500 ރުފިޔާ

- ރަށު ކައުންސިލް ނައިބުން 20،000 ރުފިޔާ

- ސިޓީ ކައުންސިލް މެންބަރުން 35،000 ރުފިޔާ

- ރަށު ކައުންސިލް މެންބަރުން: 18،000 ރުފިޔާ

- ޕްރޮސިކިއުޓަރު ޖެނެރަލް: 74،000 ރުފިޔާ

- އުއްތަމަ ފަނޑިޔާރު: 91،000 ރުފިޔާ

- އެމްއެމްއޭގެ ގަވަރުނަރު: 74،000 ރުފިޔާ

- އޮޑިޓަރު ޖެނެރަލް: 74،000 ރުފިޔާ