ގައުމީ ސަލާމް ކިޔުމަކީ ހުއްދަ ކަމެއް ކަމަށް އިސްލާމީ ފަތުވާދޭ އެންމެ މަތީ މަޖިލީހުން ކަނޑައަޅައިފި އެވެ.

ފަތުވާ މަޖިލީހުން މިއަދު ނެރުނު ފަތުވާގައި ބުނެފައި ވަނީ ގައުމީ ސަލާމް ކިޔުމާއި ގައުމީ ދިދަ އަށް ސަލާމް ކުރުމާއި ގައުމީ ސަލާމް ކިޔާ ވަގުތު ކޮޅަށް ތެދުވެ ހުރުމާއި އަދި ގައުމީ ސަލާމް ކިޔާ ވަގުތު މޭމަތީގައި އަތް ބޭއްވުމަކީ އިސްލާމް ދީނުގައި ކަނޑައަޅާފައިވާ އެއްވެސް އަޅުކަމަކާ ގުޅުމެއް އޮތް ކަމެއް ނޫން ކަމަށެވެ.

ފަތުވާ މަޖިލީހުގެ ފަތުވާގައި އެއީ އާދަތަކާ ގުޅިފައިވާ ކަމެއް ކަމަށާއި އާދަތަކުގެ އަސްލަކީ ހުއްދަވުން ކަމަށް ބުނެފައިވެއެވެ.

"އެހެންކަމުން ބަޔާންކުރެވުނު މައްސަލަ ދިރާސާކުރުމުން އެނގި ހާމަވީ މިކަން ހަރާމްކުރާނެ ސަރީހަ ދަލީލެއް ނެތުމުން މިއީ ހުއްދަ ކަމެއް ކަމަށް،"
ފަތުވާ މަޖިލީހުން ނެރެފައިވާ ފަތުވާ

މިފަދަ ފަތުވާއެއް ނެރެފައި މިވަނީ މި ދިރާސީ އަހަރުގެ ދެ ވަނަ ޓާމާ އެކު ހުރިހާ ސްކޫލެއްގައި ގައުމީ ސަލާމް ކިޔެވުމަށް ރައީސް ޑރ. މުހައްމަދު މުއިއްޒުގެ ސަރުކާރުން ނިންމާފައި ވަނިކޮށެވެ. ގައުމީ ސަލާމް މީގެކުރިން ސްކޫލުތަކުގައި ކިޔާ އުޅުނު ނަމަވެސް އެކަން ހުއްޓާލީ ބައެއް ދީނީ ހިޔާލުތަފާތުވުންތަކާ ހެދިއެވެ.