ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ނާއިބު ރައީސް ހުސައިން މުހައްމަދު ލަތީފް، ހުވާ ކުރުމަށްޓަކައި ބޭއްވި ރައްޔިތުން މަޖިލީހުގެ ޖަލްސާ އަށް ހޭދަކުރީ ޖުމްލަ 23 މިލިއަން ރުފިޔާ ކަމަށް މަޖިލީހުގެ އިދާރާ އިން ބުނެފިއެވެ.

އައިމަން ލަތީފް ނަމަކަށް ކިޔާ މީހަކު މައުލޫމާތު ހޯދާ ލިބިގަތުމުގެ ގާނޫނުގެ ދަށުން ވަނީ ރައީސާއި ނާއިބު ރައީސް ހުވާ ކުރުމުގެ ރަސްމިއްޔާތަށް ހަރަދުކުރި ފައިސާގެ ޖުމްލަ އަދަދާއި އެ ފައިސާ ވަކިވަކިން ހަރަދުވި ގޮތުގެ ތަފްސީލު ހޯދުމަށް ހުށަހަޅައިފައެވެ.

އެގޮތުން އެންމެ ބޮޑު ހަރަދެއް ހިނގާފައި ވަނީ ހުވާ ކުރުމުގެ ދަރުބާރު ޖުމްހޫރީ މައިދާނުގައި ތަރައްގީ ކުރުމަށް ހިނގި ހަރަދެވެ. އެކަމަށްޓަކައި 22.4 މިލިއަން ރުފިޔާ ހަރަދު ކޮށްފައިވެއެވެ. ދެވަނަ އަށް އެންމެ ބޮޑު ހަރަދެއް ހިނގާފައި ވަނީ ދައުވަތު ކާޑުތައް ދިވެހިންނާއި އިނގިރޭސިން ތައްޔާރު ކުރުމަށާއި އިދާރީ ޕްރޮގްރާމުތައް އިނގިރޭސި އަދި ދިވެއްސަށް ތައްޔާރު ކުރުމުގެ އިތުރުން ކުލަ ކާޑު އަދި ސެކިއުރިޓީ ކާޑު ޕްރިންޓުކޮށް ކެފުމަށެވެ. އެ ކަންކަމަށް 152،195 ރުފިޔާ ހަރަދުވިއެވެ.

އެ ދުވަސްވަރަކީ މޫސުން ކޮންމެވެސް ވަރަކަށް ގޯސް ދުވަސް ވަރަކަށް ވާތީ މޫސުން ތަން ނުދޭ ނަމަ ޕްލޭން ބީއެއްގެ ގޮތުގައި މަޖިލީހުގެ ރަސްމީ އިދާރާގައި ވެސް ހުވާ ކުރުމުގެ ރަސްމިއްޔާތު ކުރިޔަށް ގެންދިއުމަށް އޮތީ ނިންމައިފައެވެ. އަދި މަޖިލިސް އިދާރާގައި އެކަން ކުރިޔަށް ގެންދިއުމަށް ބޭނުންވާ ސްޓޭޖު ފަޅިތައް ހެދުމާއި ކާޕެޓުތައް ގަތުމަށް 80،114 ރުފިޔާ ހަރަދު ކޮށްފައިވެއެވެ.

ގައުމީ ދިދަތަކާއި ރައީސުލްޖުމްހޫރިއްޔާގެ ދިދަތައް ތައްޔާރު ކުރުމަށް 33،210 ރުފިޔާ ހަރަދު ކޮށްފައިވާ ކަމަށާއި ހުވާތައް ތައްޔާރު ކުރުމަށް 24،235 ރުފިޔާ ހަރަދު ކޮށްފައިވާ ކަމަށް މަޖިލީހުން ދީފައިވާ މައުލޫމާތުތަކުގައިވެއެވެ.

މަޖިލީހުގެ އިދާރާ އިން ބުނީ އެ ރަސްމިއްޔާތުގައި އެއްވެސް ރިފްރެޝްމަންޓެއް ނުވަތަ ސައިފޮތެއް އަދި ކެއުމެއް ތައްޔާރު ކޮށްފައި ނުވާ ކަމަށެވެ. މީގެއިތުރުން ހުވާ ކުރުމުގެ ރަސްމިއްޔާތަށް ރާއްޖެއިން ބޭރު ދައުވަތު ދެވިގެން ވަޑައިގެންނެވި އެއްވެސް ބޭފުޅަކަށް މަޖިލީހުން ހަރަދު ކޮށްފައި ނުވާނެ ކަމަށްވެސް ބުންޏެވެ.