ހުސްވެފައިވާ އެމްޑީޕީގެ ޕާލިމަންޓްރީ ގްރޫޕު (ޕީޖީ)ގެ ލީޑަރު ކަމުގެ މަގާމަށް އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އިންތިހާބު ކުރައްވައިފިއެވެ.

އެ މަގާމަށް ކުރިމަތިލެއްވީ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އާއި ކުރެންދޫ ދާއިރާގެ މެންބަރު އަބްދުލް ޣަނީ އަބްދުލް ހަކީމްގެ އިތުރުން ކާށިދޫ ދާއިރާގެ މެންބަރު ޖާބިރެވެ.

ވަގުތީ ނަތީޖާ ދައްކާ ގޮތުގައި ބިގޭ އަށް 28 ވޯޓު ލިބިވަޑައިގެންނެވިއިރު ބިގޭއާ އެންމެ ގާތުން އެންމެ ގިނަ ވޯޓު ދެން ލިބިވަޑައިގަތީ ޖާބިރަށެވެ. އޭނާ އަށް 20 ވޯޓު ވަނީ ލިބިވަޑައިގެންފައެވެ. ޣަނީ އަށް ލިބިވަޑައިގަތީ ދެ ވޯޓެވެ.

އެމްޑީޕީން އެޕާޓީގެ ޕީޖީ ލީޑަރުގެ މަގާމަށް ކުރިމަތިލާން ހުޅުވާލާފައި މިވަނީ ކުރިން އެ މަގާމުގައި ހުންނެވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް މަޖިލީހުގެ ރައީސް ކަމަށް އިންތިހާބު ކުރެއްވުމާއި ގުޅިގެންނެވެ.