ދަރުމަވަންތަ ހޮސްޕިޓަލުގެ ޗީފް އެގްޒެކެޓިވް އޮފިސަރުގެ މަގާމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭފުޅަކު އައްޔަން ކުރައްވައިފިއެވެ.

އެގޮތުން އެ މަގާމަށް ރައީސް މުއިއްޒު އައްޔަން ކުރެއްވީ، އިބްރާހީމް ޢަބްދުއްރައްޒާގު ހަލީމްއެވެ. ހަލީމް އެ މަގާމަށް އައްޔަން ކުރައްވާފައި ވަނީ ސްޓޭޓް މިނިސްޓަރު ފެންވަރުގައި ކަމަށް ރައީސް އޮފީހުން ބުންޏެވެ.

ހަލީމް މީގެ ކުރިން ވަނީ ސަރުކާރު ހިއްސާވާ ކުންފުނިތަކުގެ އިސް މަގާމުތައް ފުރުއްވާފައެވެ. އޭގެ ތެރޭގައި އެމް.ޓީ.ސީ.ސީ. އާއި މޯލްޑިވްސް ޕޯޓްސް ލިމިޓެޑް ހިމެނެއެވެ.

އިސްލާމީ މަރުކަޒުގެ އިސް އިމާމަކަށް އައްޔަންކުރެއްވި ޝެއިހް ލަތީފަށް މަގާމުގެ ލިޔުން ހަވާލު ކުރައްވަނީ: ފޮޓޯ | ރައީސް އޮފީސް

މީގެއިތުރުން ރައީސް މުއިއްޒު ވަނީ އިސްލާމީ މަރުކަޒުގެ އިސް އިމާމުގެ ގޮތުގައި ބޭފުޅަކު އައްޔަން ކުރައްވާފައެވެ. އެ މަގާމަށް އައްޔަން ކުރައްވާފައި ވަނީ ފަޟީލަތުއްޝެއިހް މުހައްމަދު ލަތީފެވެ. އެމަގާމަށް އޭނާ އައްޔަން ކުރައްވާފައި ވަނީ މިނިސްޓަރު ފެންވަރުގައެވެ.

މީގެކުރިން ވެސް ޝެއިހް ލަތީފު ވަނީ އިސްލާމީ މަރުކަޒުގެ އިސް އިމާމުގެ މަގާމު ފުރުއްވާފައެވެ.