ރައްޔިތުންގެ މަޖިލީހުގެ ރިޔާސަތުން މަޖިލީހުގެ ނައިބު ރައީސް އީވާ ފައިބާ ވަޑައިގަތުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގޮވާލައްވައިފިއެވެ.

ގާސިމް އެގޮތަށް ގޮވާލެއްވީ މަޖިލީހުގެ މިއަދުގެ ޖަލްސާ ހުއްޓުވުމަށް ދަ ޑިމޮކްރެޓްސްގެ މެމްބަރުން މަޖިލީހުގައި އަޑުގަދަ ކުރައްވަމުން ގެންދަވަނިކޮށެވެ.

ނިޒާމީ މައްސަލައެއްގައި ވާހަކަފުޅު ދައްކަވަމުން ގާސިމް ވިދާޅުވީ މަޖިލީހުގެ މިއަދުގެ ޖަލްސާގައި ކުރިއަށްދަނީ އަމީންއާންމު އެޖެންޑާކޮށްފައިވާ ރައީސް ނަޝީދުގެ އިތުބާރު ނެތްކަމުގެ މައްސަލަ ކަމަށާއި ނަމަވެސް މަސްލަހަތު ފުށޫއަރާތީ، ރިޔާސަތުގައި އީވާއަށް އެ މައްސަލަ ކުރިއަށް ނުގެންދެވޭނެ ކަމަށެވެ.

މަސްލަހަތު ފުށޫއަރާ ކަމަށް ގާސިމް އިޝާރާތް ކުރެއްވީ ނަޝީދަކީ އީވާގެ ބޭބޭފުޅަށްވުުން، އީވާ ރިޔާސަތުގައި އިންނަވައިގެން އިންސާފުވެރިކަމާ އެކު އެ މައްސަލަ ކުރިއަށް ނުގެންދެވޭނެތީއެވެ.

"ތިތަނުން ފައިބާ ވަޑައިގަންނަވާ. މަޖިލީހުގެ ނައިބު ރައީސަކަށް ތި މައްސަލައެއް ނުބެއްލެވޭނެ. އެއީ އެތައް ގޮތަަކުން ކަމަނާއާ ދޭތެރޭގައި އިތުބާރު ގެއްލިފައިވާތީ،" ގާސިމް އިބްރާހިމް ވިދާޅުވިއެވެ.