ރައީސުލްޖުމްހޫރިއްޔާގެ މަގާމުގައި ހުންނަވާ ދިވެހި ރައްޔިތުންނާއި މުހާތަބު ކުރައްވާ ރައީސް އިބްރާހީމް މުހައްމަދު ސޯލިހު މިއަދު ވަނީ އެމަނިކުފާނުގެ ވަދާއީ ހިތާބު ދެއްވަވައިފައެވެ. ޖުމްހޫރީ ދުވަހުގެ މުނާސަބަތާއި ގުޅިގެން ރައީސް ދެއްވި ހިތާބުގައި އެމަނިކުފާނުގެ ވެރިކަމުގައި ހޯއްދެވި ކާމިޔާބީތަކާއި ރައްޔިތުންނަށް ގެނެސްދެއްވި ތަރައްގީގެ ވާހަކަތައް ހިއްސާ ކުރެއްވިއެވެ.
ރައީސް ސޯލިހުގެ ހިތާބުގައި އެމަނިކުފާނު ވަނީ މީގެ ފަސް އަހަރު ކުރިން ރާއްޖޭގެ ރައްޔިތުން ރައީސުލްޖުމްހޫރިއްޔާގެ މަގާމަށް އެމަނިކުފާނު އިންތިހާބު ކުރިއިރު، އޭރު ގައުމު އޮތް ހާލަތު ތަފާތު ކަމަށް ވިދާޅުވެފައެވެ. އެގޮތުން ރައްޔިތުން އެދުނީ މަގުމަތީގެ ނާމާންކަމާއި ހަމަނުޖެހުމާއި ހަލަބޮލިކަމަށް ހަމަޖެހުމެއް ގެނައުމަށް ކަމަށާއި ސަރުކާރާ ހިޔާލު ތަފާތުވުމުގެ އަގު ޖަލުގެ އަނިޔާއިން ދައްކަން ޖެހުން ނިމުމަކަށް ގެނައުމަށް ކަމަށް ރައީސްގެ ހިތާބުގައި ވިދާޅުވިއެވެ.
"ރައްޔިތުން އަޅުގަނޑާ ހަވާލުކުރީ، ނޫސްވެރިންނަށް އޭރު އޮތް ބިރުވެރިކަން ނައްތައިލުމަށް. ދައުލަތުގެ ބާރުތަކުގެ މައްޗަށް ވެރިކަމުގެ ބާރު އިސްކުރުން ނިމުމަކަށް ގެނައުމަށް. ރައްޔިތުން އެ މަސްއޫލިއްޔަތު އަޅުގަނޑާ މަތިކުރީ ނުލިބިހުރި ޒަމާންވީ އަސާސީ ހިދުމަތްތައް ހޯދުމަށް ޑިމޮކްރަސީ އާ އިންސާނީ ކަރާމަތާ މިނިވަން ސިޔާސީ މާހައުލު ރާއްޖެއަށް ގެނައުމަށް،" ރައީސް ވިދާޅުވިއެވެ.
އެމަނިކުފާނު ވިދާޅުވީ އޭރުގެ ބިރުވެރި ހާލަތު ފިލައިގޮސް، މަގުތަކުގައި އަމާންކަން މިއަދު އިހުސާސްވާ ކަމަށެވެ. ހިޔާލު ތަފާތުވެހުރެވެސް ވިޔަފާރިވެރިންނާއި އާންމު ފަރުދުން، އެ މީހުންގެ ދިރިއުޅުމައިގެން ކުރިއަށް ދެވޭނެކަން މި ފަސް އަހަރު ކަށަވަރު ކޮށްދީފައިވާނެ ކަމަށް ރައީސް ވިދާޅުވިއެވެ.
މި ހިތާބުގައި ރައީސް ވަނީ ގިނަ ޕާޓީ އެކުލެވޭ ސިޔާސީ ނިޒާމަށް ރާއްޖެ ބަދަލުވި ފަހުން އޮމާންކަމާއެކު ވެރިކަން ބަދަލުވުމުގެ މަރުހަލާ ހިނގަމުން ދަނީ ހަމައެކަނި މިފަހަރު ކަމަށް ވިދާޅުވެފައެވެ. އަދި ހިތާބު ނިންމާލެއްވީ އިންތިހާބީ ރައީސް ޑރ. މުހައްމަދު މުއިއްޒުގެ ވެރިކަމަށް ކާމިޔާބީއަށް އެދެމުންނެވެ.
މީގެއިތުރުން ރައީސްގެ ހިތާބުގައި އެމަނިކުފާނުގެ ވެރިކަމުގެ ފަސް އަހަރު ސަރުކާރަށް އެއްބާރުލުމާއި އެހީތެރިކަން ދިން ގިނަ ފަރާތްތަކެއްވާ ކަމަށް ވިދާޅުވިއެވެ. އެގޮތުން އެ ޕާޓީއަކަށް އެމަނިކުފާނު ނިސްބަތްވެވަޑައިގަންނަވާ ދިވެހި ރައްޔިތުންގެ ޑިމޮކްރެޓިކް ޕާޓީގެ ލީޑާޝިޕާއި، ޕާލިމަންޓަރީ ގްރޫޕާއި އަދި އާންމު މެންބަރުންނަށް ޝުކުރު ދެންނެވިއެވެ.
އަދި ސަރުކާރާއެކު ތިއްބެވި ކޯލިޝަން ޕާޓީތަކުގެ ލީޑާޝިޕާއި މެންބަރުންގެ އަގު ވަޒަން ކުރެއްވިއެވެ. ވަޒީރުންގެ މަޖިލީހާއި އަދި ސަރުކާރާއި، ސަރުކާރު ހިއްސާވާ ކުންފުނިތަކުގައި މަސައްކަތް ކުރެއްވި ހުރިހާ ބޭފުޅުންގެ މަސައްކަތް ވެސް ފާހަގަކުރެއްވިއެވެ.
އީރާނުގެ ރައީސް ދަތުރުކުރެއްވި ހެލިކޮޕްޓަރު ވެއްޓިއްޖެ 
މިއަހަރު ހައްޖަށްދާ ފުރަތަމަ ގްރޫޕް މިމަހު 31ގައި ފުރާނެ 
ކުރެންދޫ ދާއިރާގެ އިންތިހާބީ މެންބަރު ޕީއެންސީއާ ގުޅިއްޖެ 
ކަޔަކެއްގައި މޫދަށް ފޭބި މީހަކު ގެއްލިގެން ހޯދަން ފަށައިފި 
ވައިގަދަވުމުގެ ސަބަބުން އައްޑޫ ދެގެއެއްގެ ފުރާޅު އެއްލާލައިފި 
ފައިސަލްގެ ވާހަކަދެއްކުން ރަނގަޅުކުރުމަށް ކޯޗެއް ނަގަނީ 
