އިސްލާމިކް އޮގަނައިޒޭޝަން ފޯ ކަލްޗަރަލް އެންޑް ސިވިލައިޒޭޝަން (އައިއޯސީސީ) ގެ "އިސްލާމީ ނަޒަރިއްޔާތު" ފޮތް ނެރެފިއެވެ.

އެވިޑް ކޮލެޖުގައި ރޭ ބޭއްވި ރަސްމިއްޔާތެއްގައި އެ ފޮތް ނެރެދެއްވީ އެވިޑް ކޮލެޖުގެ ޗެއާމަން މުހައްމަދު މުޝްތާގެވެ.

ރޭގެ ރަސްމިއްޔާތުގައި އައިއޯސީސީގެ ރައީސް ޝަހީމް ވިދާޅުވީ، އޭނާ ލިޔުއްވި އިސްލާމީ ނަޒަރިއްޔާތު ފޮތުގައި ވަރަށް ގިނަ ވާހަކަތައް ހުންނާނެ ކަމަށެވެ. އޭގެ ތެރޭގައި ގައުމު ބިނާކުރުމާއި ދައުލަތް ހިންގުމާއި ވެރިކަން ހިންގުމުގެ އިދާރީ ނިޒާމާއި ޓޫރިސްޓުންނަށް ރައްކާތެރިކަން ދިނުމާއި އިސްލާމްދީނުގައި އަންހެނުންގެ މަގާމާއި ދީނީ ފަތުވާ ދިނުމުގެ ނިޒާމާއި އެ ނިޒާމު ހަރުދަނާ ކުރުން އަދި ޖިހާދު ކުރުމުގެ ފަލްސަފާ ފަދަ ބައިތައް ހިމެނޭ ކަމަށެވެ.

‎މީގެ އިތުރުން ވެސް އިސްލާމީ ސިޔާސީ ހަރަކާތްތަކާއި ރާއްޖޭގެ ޖުޑިޝަރީ އިސްލާހު ކުރުމާއި ހިޔާލުފާޅުކުރުން ފަދަ ކަންކަން ވެސް ފޮތުގައި ޝަހީމް ވަނީ އިސްލާމްދީނުގެ ގިއުގަނޑުގެ ތެރެއިން މިސާލު ނަންގަވައިގެން ބަޔާން ކޮށްދެއްވައިފަ އެވެ. އެ ކަންކަމާ ގުޅޭ ގޮތުން ކީރިތި ރަސޫލާ އަމަލުފުޅު ކުރެއްވި ގޮތާއި އެކަލޭގެފާނުގެ ހަދީސްފުޅުތަކުން ޝަހީމް ހެކި ދައްކަވާފައިވެ އެވެ

‎ފޮތުގެ ބޭނުން ހިއްސާ ކުރައްވަމުން ޝަހީމް ވިދާޅުވީ، "އިސްލާމީ ނަޒަރިއްޔާތު" ފޮތުގެ ބޭނުމަކީ އިސްލާމީ ނަޒަރަކުން އޭނާގެ ފިކުރު އެކި ކަންކަމާ ގުޅޭ ގޮތުން ބަޔާން ކޮށްދެއްވުން ކަމަށެވެ.

‎"އިސްލާމްދީނާ ގުޅޭ ގޮތުން އެކި ކަންކަމަށް ދޭ ރައްދު. މިސާލަކަށް އިސްލާމްދީނުގައި އަންހެނުންގެ މަގާމު. ހަމަ އެ ގޮތަށް އެހެން ދީންތަކާއި އިސްލާމްދީނާ އޮންނަ ގުޅުން. ހަރުކަށި ފިކުރުތަކާއި މި ކަންކަމާ ގުޅޭ ގޮތުން އިސްލާމީ ނަޒަރިއްޔާތު. މިފަދަ ކިތަންމެ މައުލޫއެއް ހުންނާނެ،" ޝަހީމް ވިދާޅުވި އެވެ.

‎މި ނޫނަސް އެތައް ފޮތެއް ނެރުމަށް ތައްޔާރު ކުރައްވައި އާންމު ކުރައްވާފައިވާ ކަމަށް ޝަހީމް ވިދާޅުވިއެވެ. އަދިވެސް އިތުރު ފޮތްތައް ލިޔުއްވަން އެބަހުރި ކަމަށް ވެސް ވިދާޅުވިއެވެ.