އިންތިހާބީ ރައީސް ޑރ. މުހައްމަދު މުއިއްޒު އަބޫދާބީ އަށް ފުރާވަޑައިގެންފިއެވެ.

އިންތިހާބީ ރައީސްގެ އޮފީހުން މިކަމުގެ މާބޮޑު ތަފްސީލެއް ހާމައެއް ނުކުރެއެވެ. ނަމަވެސް އިންތިހާބީ ރައީސް އޮފީހުގެ ތަރުޖަމާން މުހައްމަދު ފިރުޒުލް ވިދާޅުވީ މެހެމާންދާރީ އަދާ ކުރެއްވުމުގެ ގޮތުން ދަތުރުފުޅުގެ ހަރަދުތައް ހަމަޖައްސަވައި ދެއްވާނީ އެގައުމުން ކަމަށެވެ.

"ހަތާވީސް" އަށް މައުލޫމާތު ލިބިފައިވާ ގޮތުގައި ޑރ. މުއިއްޒު އަބޫދާބީ އަށް ވަޑައިގަތީ ޔޫއޭއީ ސަރުކާރުގެ ދައުވަތަކަށެވެ. އެމަނިކުފާނު ވެލާނާ އިންޓަނޭޝަނަލް އެއާޕޯޓުން އަބޫދާބީ އަށް ވަޑައިގަތީ ޕްރައިވެޓް ޖެޓެއްގައެވެ.

އަބޫދާބީ އަށް ނުރަސްމީ ދަތުރުފުޅެއްގައި ޑރ. މުއިއްޒު ފުރާވަޑައިގެންނެވިއިރު ދާދިފަހުން އެމަނިކުފާނު ވަނީ ނުރަސްމީ ދަތުރުފުޅެއްގައި ސިންގަޕޫރަށް ވެސް ވަޑައިގެންފައެވެ. މިދިޔަ ހޮނިހިރު ދުވަހު ނިންމާލެއްވި އެ ދަތުރުފުޅުގައި ޕީޕީއެމް/ޕީއެންސީގެ އިސްވެރިން ވެސް ބައިވެރިވެވަޑައިގެންނެވިއެވެ.