އަންނަ އަހަރުގެ އޭޕްރީލް މަސް ތެރޭގައި އޮންނަ ރައްޔިތުންގެ މަޖިލިސް އިންތިހާބުން މަދުވެގެން 60 ގޮނޑި ޕީޕީއެމް/ޕީއެންސީ އިން ކާމިޔާބު ކުރުމަކީ އަމާޒެއް ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

"ސަންގު ޓީވީ" އިން ރޭ ގެނެސްދިން ޕްރޮގްރާމެއްގައި ވާހަކަދައްކަވަމުން މުއިއްޒު ވިދާޅުވީ އިންތިހާބުގައި ދިވެހި ރައްޔިތުން އެމަނިކުފާނަށް ދެއްވި ތާއީދަށް ބަލާއިރު ރައްޔިތުންގެ ވިސްނުން ހުރީ ޕީޕީއެމް/ޕީއެންސީއާއެކު ކުރިޔަށް ދިއުމަށް ކަމަށެވެ. އަދި ގައުމު ހަމަ މަގަކަށް އަޅުވާ ގައުމުގައި ހުރި ބޮޑެތި މައްސަލަތައް ހައްލު ކުރުމަށް ޕީޕީއެމް/ޕީއެންސީ އަށް ފުރުސަތު ދިނުމަށް ރައްޔިތުންގެ ވިސްނުން ހުރި ކަމަށް ގަބޫލު ކުރައްވާ ކަމަށް ވެސް މުއިއްޒު ވިދާޅުވިއެވެ.

ކުރިޔަށް އޮތް ދެތިން ހަތަރު މަސް އެމަނިކުފާނާއި އެމަނިކުފާނުގެ ސަރުކާރުން ވެސް މަސައްކަތް ކުރައްވާނީ އެ ވިސްނުމުގައި ކަމަށް މުއިއްޒު ފާހަގަކުރެއްވިއެވެ. އެގޮތުން ކުރިޔަށް އޮތް ދުވަސްތަކުގެ ތެރޭގައި ރައްޔިތުން ގާތުގައިވީ ވައުދުތައް ފުއްދުމަށް އަވަހަށް މަސައްކަތްތައް ފައްޓާ ރާއްޖޭގެ އިގްތިސޯދު ވެސް ކޮޅަށް ޖެހުމަށް ކުރިޔަށް އޮތް ދެތިން ހަތަރު މަހެއްގެ ތެރޭގައި މަސައްކަތް ފައްޓަވާނެ ކަމަށް އިންތިހާބީ ރައީސް، މުއިއްޒު ވިދާޅުވިއެވެ.

ރާއްޖޭގެ ވެރިކަމުގެ ނިޒާމު އޮތް ގޮތުން އެ ހުރިހާ ކަމެއްވެސް އިތުރަށް ފުރިހަމަ ކުރުމަށްޓަކައި ރައްޔިތުންގެ މަޖިލީހަކީ މުހިއްމު ދައުރެއް އަދާ ކުރާ އިދާރާއެއް ކަމަށް މުއިއްޒު ވިދާޅުވިއެވެ. އެމަނިކުފާނު ދެކިވަޑައިގަންނަވާ ގޮތުގައި ޕީޕީއެމް/ޕީއެންސީގެ ގިނަ އަދަދެއްގެ މެންބަރުންތަކެއް މަޖިލީހުގައި ތިބުން މުހިއްމު ކަމަށެވެ. މުއިއްޒު ވިދާޅުވީ އޭރުން ކަންކަން ބާރު ސްޕީޑުގައި ކުރިޔަށް ގެންދިއުމަށް މާ ބޮޑަށް ވެސް ފަސޭހަ ވެގެން ދާނެ ކަމަށެވެ.

އަޅުގަނޑުގެ އަމާޒަކީ ވީހާވެސް ގިނަ މެންބަރުން ހޮވުން. ދެން އެންމެ ބޮޑަށް މި ބޭނުން ވަނީ ޓޫ ތާޑް [ތިންބައިކުޅަ ދެބައި] މެޖޯރިޓީއެއް ހާސިލް ކުރެވޭ ވަރަށް މެންބަރުން ހޮވުން. 90 މެންބަރުންނަށްވުރެ ގިނަ ހޮވަން ތިބި މެންބަރުން, އެހެންވީމަ 60އަށްވުރެ ގިނަ މެންބަރުން ޕީޕީއެމް ޕީއެންސީގެ ފަރާތުން މަޖިލީހުގައި އަދި އަޅުގަނޑުމެންނާއި ގުޅިފައި ތިބި ފަރާތްތަކުންނާއި އެކީގައި އިރާދަކުރެއްވިއްޔާ ސުޕަ މެޖޯރިޓީއޭ މި ކިޔާ ގޮތަށް ޓޫ ތާޑް މެޖޯރިޓީއެއް ލިބޭ ވަރަށް މަސައްކަތް ކުރުން
އިންތިހާބީ ރައީސް, ޑރ. މުހައްމަދު މުއިއްޒު

މުއިއްޒު ވިދާޅުވީ 20ވަނަ ރައްޔިތުންގެ މަޖިލީހުގައި ތިއްބަވާނީ ވަރަށް ބޮޑަށް ރައްޔިތުން ބަލައިގަންނަ ބޭފުޅުން ކަމަށް އުއްމީދު ކުރައްވާ ކަމަށެވެ. އަދި އެ ބޭފުޅުންނަކީ ތައުލީމީ ބޭފުޅުންނަށް ވުމަކީ ވެސް ބޭނުންފުޅުވާ ކަމެއް ކަމަށް މުއިއްޒު ވިދާޅުވިއެވެ. މީގެއިތުރުން މަޖިލީހުގައި އަންހެން ކަނބަލުން ތިއްބަވާ ނިސްބަތް ގިނަ ކުރުމަކީ ވެސް ބޭނުންފުޅުވާ ކަމެއް ކަމަށް މުއިއްޒު ވިދާޅުވިއެވެ.