ނިމިދިޔަ ރިޔާސީ އިންތިހާބު ކާމިޔާބު ކުރެއްވި ޑރ. މުހައްމަދު މުއިއްޒު އަދި އެމަނިކުފާނުގެ ނާއިބު ހުސައިން މުހައްމަދު ލަތީފް ހުވާ ކުރުމަށް ބާއްވާ ރަސްމިއްޔާތު އޮންނާނީ ޖުމްހޫރީ މައިދާނުގައި ކަމަށް ބުނެފިއެވެ.

އިންތިހާބީ ރައީސް އޮފީހުގެ ތަރުޖަމާން މުހައްމަދު ފިރުޒުލް މިއަދު ވިދާޅުވީ އިންތިހާބީ ރައީސް އަދި ނާއިބު ރައީސް ހުވާ ކުރުމުގެ ރަސްމިއްޔާތުގެ ކަންކަން ގާނޫނުއަސާސީން މަތި ކޮށްފައި ވަނީ ރައްޔިތުންގެ މަޖިލީހާ ކަމަށެވެ. އެގޮތުން އެ ރަސްމިއްޔާތުގެ އެންމެހާ ކަންކަން ހިނގަމުން ދާނީ މަޖިލީހުގެ ޖަލްސާއެއްގެ ތެރެއިންކަން ފިރުޒުލް ފާހަގަކުރެއްވިއެވެ.

ފިރުޒުލް ވިދާޅުވީ އެކަން އެހެން އޮތް ނަމަވެސް އިންތިހާބީ ރައީސް އެދިވަޑައިގަންނަވާ އެދިވަޑައިގަތުންތަކަށް މަޖިލީހުން އިޖާބަދޭ ކަމަށެވެ. މީގެކުރިންވެސް އެކަންކަން އެގޮތުގެ މަތިން ކުރިޔަށް ގެންގޮސްފައިވާ ކަމަށާއި މިފަހަރުވެސް މަޖިލީހުގެ އިދާރާ އިން އެކަންކަމަށް ރިއާޔަތް ކުރައްވާނެ ކަމަށް އުއްމީދު ކުރައްވާ ކަމަށް ފިރުޒުލް ވިދާޅުވިއެވެ.

ފިރުޒުލް ވިދާޅުވީ ހުވާ ކުރުމުގެ ރަސްމިއްޔާތު އޮންނާނީ 17 ނޮވެމްބަރުވާ ހުކުރު ދުވަހުގެ ހަވީރުގެ ވަގުތެއްގައި ކަމަށެވެ. ނަމަވެސް މޫސުން ތަން ނުދޭ ނަމަ ހުވާ ކުރުމުގެ ރަސްމިއްޔާތާ ގުޅޭ ގޮތުން ބައެއް ކުދި ކުދި ބަދަލުތައް އައުމަކީ އެކަށީގެންވާ ކަމެއް ކަމަށް ފިރުޒުލް ވިދާޅުވިއެވެ.

ޖުމްހޫރީ ދުވަހު [ނޮވެމްބަރު 11ވަނަ ދުވަހު] އިންތިހާބީ ރައީސް ހުވާ ކުރުމަށް ގާނޫނީ ހުރަހެއް ނެތް ނަމަ އެކަން އެގޮތުގައި ކުރިޔަށް ގެންދިއުމުގެ ޖާގަ ދެއްވާނެ ކަމަށް ރައީސް އިބްރާހީމް މުހައްމަދު ސޯލިހް ވަނީ ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.

ރައީސް ވިދާޅުވީ މިއަހަރުގެ ނޮވެންބަރު 11އަކީ ރިޔާސީ އާ ދައުރު ފެށެންޖެހޭ ދުވަސް ކަމަށް ގަބޫލުކުރައްވާ ކަމަށާއި އެ ދުވަހު ވެރިކަން ހަވާލުކުރުމަށް ގާނޫނީ ގޮތުން ކުރެވެން އޮތް ކަމެއް ކުރައްވާނެ ކަމަށެވެ.

ރާއްޖާގެ ތިން ރައީސަކު ހުވާ ކުރެއްވީ ނޮވެންބަރު 11ގައެވެ. އެއީ ރައީސް އިބްރާހިމް ނާސިރާއި ރައީސް މައުމޫން އަބްދުލްގައްޔޫމާއި ރައީސް މުހައްމަދު ނަޝީދެވެ.

ނަމަވެސް ރައީސް ވަހީދުގެ ވެރިކަމުގައި ބޭއްވި ރިޔާސީ އިންތިހާބު ސުޕްރީމް ކޯޓުން ބާތިލުކުރުމުން، އާ ރައީސަކު އިންތިހާބު ކުރަންޖެހޭ ތާރީހު ފަހަނަ އަޅައި ގޮސް، އިންތިހާބު ބޭއްވުނީ ނޮވެންބަރު 16، 2013ގައެވެ. ޖެހިގެން އައި ދުވަހު، ނޮވެންބަރު 17، 2013ގައި ވެރިކަމުގެ ހުވާ ކުރެއްވީ ރައީސް ޔާމީނެވެ. އެ ދުވަހުން ފެށިގެން ރިޔާސީ ދައުރު ފުރިހަމަވާ ތާރީހަކީ ކޮންމެ ފަސް އަހަރަކަށްފަހު އަންނަ ނޮވެންބަރު 17 ކަމަށް އޮތީވެފައެވެ. ރައީސް ޔާމީންގެ ވެރިކަމަށްފަހު، ރައީސް ސާލިހު ވެސް ވެރިކަމުގެ ހުވާ ކުރެއްވީ ނޮވެންބަރު 17، 2018ގައެވެ.

ރައީސް ސާލިހު މިއަދު ވިދާޅުވީ ނޮވެންބަރު 11ގައި ވެރިކަން ހަވާލުކުރެއްވުމަށް އެމަނިކުފާނާއި ނައިބު ރައީސް ފައިސަލް ނަސީމު އިސްތިއުފާ ދެއްވިޔަސް، ދެން ވެސް ފުރިހަމަ ކުރަންޖެހޭ މަރުހަލާއެއް އޮތް ކަމަށެވެ.

ރައީސާއި ނައިބު ރައީސް އިސްތިއުފާ ދެއްވުމުން، ގާނޫނުއަސާސީ ބުނާ ގޮތުން ދެން ރައީސްކަމަށް ވަޑައިގަންނަވާނީ ރައްޔިތުންގެ މަޖިލީހުގެ ރައީސެވެ.