ރިޔާސީ އިންތިހާބުގެ ފުރަތަމަ ބުރުގައި އަމިއްލަ ގޮތުން ވާދަކުރެއްވި އުމަރު ނަސީރުގެ ރަނިންމޭޓު މާޒް ސަލީމް އެމްޑީޕީގެ ރިޔާސީ ކެންޑިޑޭޓު އަދި ރައީސް އިބްރާހީމް މުހައްމަދު ސޯލިހްގެ ކެމްޕެއިނާ ގުޅިވަޑައިގެންފިއެވެ.

މާޒް ސަލީމް ރައީސްގެ ކެމްޕެއިނާ ގުޅިވަޑައިގަތީ މިއަދު ހަވީރު ހުޅުމާލެ ފޭސް އެކެއްގައި ބޭއްވި ރަސްމިއްޔާތެއްގައެވެ.

މާޒް ސަލީމް ވިދާޅުވީ އޭނާ ރައީސަށް ތާއީދު ކުރައްވަން ނިންމެވީ އޭނާ އަކީ އަނިޔާވެެރިކަމާއި ދެކޮޅު މީހަކަށްވުމުން ކަމަށެވެ.

ރާއްޖޭގެ ވެރިކަންތަކަށް ގޭންގުތަކުގެ ނުފޫޒު ފޯރާ ކަމަށާއި އެކަންކަން ފެންނަ މީހެއްގެ ހައިސިއްޔަތުން އެކަންކަން ރައްޔިތުންނަށް އޮޅުން ފިލުވައި ދިނުމަކީ ވާޖިބެއް ކަމަށް މާޒް ސަލީމް ވިދާޅުވިއެވެ.

މިއަދުގެ ރަސްމިއްޔާތުގައި މާޒް ސަލީމްގެ އިތުރުން ފުރަތަމަ ބުރުގައި ރައީސަށް ތާއީދުކޮށް ދާދިފަހުން އެ ތާއީދު އަނބުރާ ގެންދިޔަ އެމްޑީއޭގެ ބައެއް އިސް ބޭފުޅުން ވެސް ވަނީ ރައީސްގެ ކެމްޕެއިނާ ގުޅިފައެވެ.