ތަރައްގީގެ މަޝްރޫއުތައް ހިންގުމަށް ހަދާފައިވާ އެގްރީމަންޓުތައް "ގޯސްކޮށް" ހަދާފައި އޮންނާނެ ކަމަކަށް ގަބޫލު ނުކުރެވޭ ކަމަަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
"ހަތާވީސް" އަށް ދެއްވި ވީޑިއޯ އިންޓަވިއުއެއްގައި މި ސަރުކާރުން ހަދާފައިވާ އެއްބަސްވުންތަކާއި ގުޅޭ ގޮތުން ވާހަކަދައްކަވަމުން މުއިއްޒު ވިދާޅުވީ ދޭދޭ ގައުމުތަކާއެކު އޮންނަ ގުޅުމަކީ ވަރަށް މުހިއްމު ކަމެއް ކަމަށެވެ. ހަމައެއާއެކު ދިވެހި ގައުމުގެ މިނިވަންކަމަކީ ވެސް އެހާމެ މުހިއްމު ކަމެއް ކަމަށް މުއިއްޒު ވިދާޅުވިއެވެ.
އެކަމުގެ މިސާލެއް ދައްކަވަމުން މުއިއްޒު ވިދާޅުވީ މިނިވަން ކަމަށް ބުރޫ އަރާނެ ވަރުގެ ކަމެއް އޮވެގެން ފޮރުވަން ޖެހޭނެ ކަމަށް ގަބޫލު ނުކުރައްވާ ކަމަށެވެ. މުއިއްޒު ވިދާޅުވީ އެފަދައިން ދަންނަވަން ޖެހިވަޑައިގަތީ ބައެއް އެގްރީމަންޓުތަކާއި ގުޅޭ ގޮތުން ސަރުކާރުން އެފަދަ ޖަވާބުތައް ދީފައި އޮތުމުން ކަމަށެވެ.
"އެހެންވީމަ އަޅުގަނޑުމެންނަށް ޝައްކު ވަނީ އެއީ، ކިހިނެއްތޯ މިވަނީ،" މުއިއްޒު ވިދާޅުވިއެވެ.
އެމަނިކުފާނު ވިދާޅުވީ މި ސަރުކާރުން ހަދާފައިވާ އެގްރީމަންޓުތައް ބަލަން ބޭނުން ވަނީ އެ މަޝްރޫއުތައް ހުއްޓާނުލާ ކުރިޔަށް ގެންދިއުމަށް ކަމަށެވެ. އެގޮތުން މުއިއްޒު ވަނީ ތިލަމާލެ ބްރިޖުގެ މަސައްކަތް ނިންމަން އޭނާ ބޭނުންވާ ކަމަށް ވިދާޅުވެފައެވެ.
މުއިއްޒު ވިދާޅުވީ އެއްވެސް މަޝްރޫއެއްގެ އެގްރީމަންޓުގައި ރާއްޖޭގެ މިނިވަންކަމަށް ބުރޫ އަރާ ޒާތުގެ އެއްވެސް ވާހަކައެއް އޮވެއްޖެ ނަމަ އެކަން ދިވެހި ރައްޔިތުންނަށް ހާމަ ކުރާނެ ކަމަށެވެ.
ތަކުރާރުކޮށް މުއިއްޒު ވަނީ އެ އެގްރީމަންޓުތައް ބަލަން އެމަނިކުފާނު ބޭނުންވަނީ އެ މަޝްރޫއުތައް ހުއްޓާ ނުލާ ކުރިޔަށް ގެންދަން ކަމަށް ވިދާޅުވެފައެވެ.
އިންޑިއާ އިން ރާއްޖެއަށް 1200 ގަސް ހަދިޔާކޮށްފި
ރަސްމާލެ މަޝްރޫއު: ރައްޔިތުންގެ ފެންނަ ނުފެންނަ ވޯޓެއް ނުނަގާނެ
ސުޕްރީމް ކޯޓުގެ ފަނޑިޔާރު ކަމަށް ސަމީރު އަދި ރައޫފް ކުރިމަތިލައްވައިފި
ބަޖެޓު 27: އަންނަ އަހަރު އެންމެ ބޮޑު އެހީ ދޭ ގައުމަކީ އިންޑިއާ
ބޯކޮށް ވާރޭ ވެހޭނެ ކަމަށް ލަފާކޮށް ހަ އަތޮޅަކަށް ޔެލޯ އެލާޓު ނެރެފި
ޅައިމަގަށް ނަގޫ ރޯޅިއެއް އަރާ މީހަކަށް އަނިޔާވެއްޖެ