ހައްގުތައް ކަށަވަރު ކުރުމަށް ވަކި މުއައްސަސާއެއް އުފައްދަން އިދިކޮޅު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ނިންމަވާފައި ވާތީ އެޗްއާރްސީއެމްގެ ކުރީގެ މެންބަރު އަދި ހިންނަވަރު ދާއިރާގެ މިހާރުގެ މެންބަރު ޖީހާން މަހްމޫދު ކަންބޮޑުވުން ފާޅުކުރައްވައިފިއެވެ.

ޖީހާން މިކަން ސިފަ ކުރެއްވީ މިނިވަން މުއައްސަސާތަކުގެ ބާރުތައް އަތުލައި ސަރުކާރަށް ބާރު ޖަމާކުރުމަށް މަސައްކަތްކުރުމުގެ އަމަލެއްގެ ގޮތުގައެވެ.
އަދި މިއީ 2013-2018 ގައި ޕީ.ޕީ.އެމް ގެ ސަރުކާރުގައި އެޗް.އާރް.ސީ.އެމް ގެ ބާރު ކަނޑުވާލައި ސަރުކާރުގެ އެންގުމަށް ސުޕްރީމް ކޯޓުން އެޗް.އާރް.ސީ.އެމްގެ މަސައްކަތަށް ނުފޫޒު ފޯރުވި ދުވަސްތައް ހަނދާންވާކަމެއް ކަމަށް އޭނާ ވިދާޅުވިއެވެ.
ދެހާސް ސާދަވަނަ އަހަރުގައި ސުޕްރީމް ކޯޓުން ވަނީ އެޗް.އާރް.ސީ.އެމް ހުރިހާ މެމްބަރުންގެ މައްޗަށް ސުއޯ މޯޓޯ މައްސަލައެއް ގެނެސް ގައުމަށް ޣައްދާރުވިކަމަށް ތުހުމަތުކޮށްފައެވެ. މިއީ ޔުނިވަރސަލް ޕީރިއަޑިކް ރިވިއު (ޔޫ.ޕީ.އާރް) އަށް ހުށަހެޅި ރިޕޯޓަކީ ޤާނޫނާ ޚިލާފަށް ހުށަހަޅާފައިވާ ރިޕޯޓެއް ކަމަށް ސުޕްރީމް ކޯޓުން ތުހުމަތުކޮށް ކޮށްފައިވާ ކަމެކެވެ.
ޔޫ.ޕީ.އާރް އަކީ ކޮންމެ އަހަރަކުވެސް އެޗް.އާރް.ސީ.އެމްއިން ގަވާއިދުން ހުށަހަޅަމުންދާ ރިޕޯޓެކެވެ.
ސުޕްރީމް ކޯޓުގެ މި ސުއޯ މޯޓޯ މައްސަލައަކީ އޭރުގެ ސަރުކާރު ފަހަތުގައި ތިބެގެން ކޯޓުތަކުގެ ބޭނުންކޮށްގެން އެޗް.އާރް.ސީ.އެމް ގެ ބާރު ކަނޑުވާލަން ކުރި މަސައްކަތެއް ކަމަށް ބޭރުގެ ގިނަ ފަރާތްތަކުންވެސް ސިފަކޮށްފައިވެއެވެ.