ރިޔާސީ އިންތިހާބުގެ ދެ ވަނަ ބުރުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމަކީ ރިލަވަންޓު މީހެއް ނޫން ކަމަށާއި ސަބަބަކީ އަމިއްލަ ގޮތުން ރިޔާސީ އިންތިހާބުގައި ވާދަ ކުރެއްވި އުމަރު ނަސީރަށް ވުރެ ވެސް މަދު ވޯޓު ލިބިފައިވާތީ ކަމަށް، އެމަނިކުފާނު އަމިއްލަފުޅަށް މިއަދު ވިދާޅުވެއްޖެއެވެ.

ގާސިމް އެހެން ވިދާޅުވީ ރިޔާސީ އިންތިހާބުގެ ދެ ވަނަ ބުރުގައި އެއްވެސް ކެންޑިޑޭޓަކަށް ތާއިދު ނުކުރަން ނިންމެވުމަށްފަހު، ނޫސްވެރިންނާ ބައްދަލުކޮށް، ވާހަކަ ދައްކަވަމުންނެވެ.

އަޅުގަނޑަކީ މި ހިނދަށް މާ ރިލަވަންޓު މީހެއް ކަމަށް ވެސް ނުދެކެން. އެއީ އުމަރު ނަސީރަށް ވުރެ ދަށުން ވޯޓުލިބިގެން އައީމަ މާ ރިލަވަންޓު މީހެއް ކަމަށް ހެދިގެން މާ ބޮޑު މީހެއް ކަމަށް ހެދިގެން އުޅޭކަށް ބޭނުމެއް ނޫން. މިއީ ހަގީގަތަކީ
ގާސިމް އިބްރާހިމް، ޖުމްހޫރީ ޕާޓީގެ ލީޑަރު

އާ ގާނޫނުއަސާސީގެ ދަށުން ތިން ސަރުކާރެއް ގެނައުމަށް މަސައްކަތްކޮށް، އެކަން ކާމިޔާބުކުރެއްވިކަން ފާހަގަ ކުރައްވައި ގާސިމް ވިދާޅުވީ އެ ސަރުކާރުތަކުން އަމަލު ކުރި ގޮތުން އެކަމުގެ އިލްޒާމު އެމަނިކުފާނުގެ ބޮލުގައި އެޅިފައިވާ ކަމަށެވެ. މިފަހަރުގެ އިންތިހާބުގައި އެމަނިކުފާނަށް ލިބުނު ވޯޓު މަދުވެފައިވަނީ އެ ސަބަބާ ހުރެ ކަމަށް ގާސިމް ވިދާޅުވިއެވެ.

"އެހެން އެ ވީ ކުރިން އެ ދިޔަ ސަރުކާރުތަކުން ކޮށްފައި ހުރި ވިޔާނުދާ ކަންތައްތަކެއްގެ ސަބަބުން. އެ ބްލޭމް އަޅުގަނޑުގެ ބޮލުގައި އެޅެނީ. އެނގިވަޑައިގަންނަވާތޯ ތިބޭފުޅުންނަށް. ކޮންމެ ސަރުކާރެއް ގެނައީމަ، ކޮންމެ ބަޔަކު ވެސް ކާ ވާހަކަ އާއި ކޮރަޕްޝަންގެ ވާހަކަ އާއި ކަންތައް ކުރި ގޮތުގެ ވާހަކަ ރައްޔިތުން އެގޮތަށް މިގޮތަށް މި ދައްކަނީ. އަރިއަށް ހުރަހަށް އެގޮތް މިގޮތަށް މި ދަނީ،" ރިޔާސީ އިންތިހާބުގައި 2.4 ޕަސެންޓް ވޯޓު ލިބިވަޑައިގެންނެވި ގާސިމް ވިދާޅުވިއެވެ.

ދެ ވަނަ ބުރުގައި ގާސިމް އެއްވެސް ކެންޑިޑޭޓަކަށް ތާއިދު ނުކުރެއްވުމުން، އެމަނިކުފާނުގެ ސަޕޯޓަރުން ވޯޓުލާން ނުކުންނަށް ބާރު އަޅުއްވަންތޯ "ހަތާވީސް"އިން ސުވާލު ކުރެއްވުމުން ގާސިމް ވިދާޅުވީ އޭނާއަށް ލިބުނީ މަދު ވޯޓުކޮޅެއް ކަމަށާއި އެއީ އެއްވެސް އެއްޗެއް ނޫން ކަމަށެވެ.

"މާބޮޑު އެއްޗެއް ނޫނެއް ނޫންތޯ. 5،000 ވޯޓު ނޫންތޯ؟ އިޓި އިޒް ނަތިން،" ގާސިމް ވިދާޅުވިއެވެ.

ގާސިމްގެ ނިންމެވުމާ ގުޅިގެން، އެއްވެސް ބަޔަކު ޕާޓީން ވަކިވެދާނެތޯ ކުރި ސުވާލަށް ވެސް އެމަނިކުފާނު މިއަދު ޖަވާބު ދެއްވިއެވެ.

"އެއީ އަބަދުވެސް ވާ ކަމެއް ނޫންތޯ؟ އަބަދުވެސް ގޮސް، ގޮސްސަ، އަންނަ މީހުން އަންނާނެ. ދާ މީހުން ދާނެ. އެއީކީ މައްސަލައެއް ނޫން. އެއީ މިނިވަން ކަމެއް ނޫންތޯ؟،" ގާސިމް ވިދާޅުވިއެވެ.

ދެ ވަނަ ބުރުގައި އެއްވެސް ކެންޑިޑޭޓަކަށް ތާއިދު ނުކުރުމަށް ގާސިމް ނިންމާފައި ވަނީ އެ ޕާޓީގެ ކައުންސިލްގައި ފުޅާ ދާއިރާއެއްގައި މަޝްވަރާކުރެއްވުމަށްފަހުއެވެ. މިއަދު މެންދުރު 1:30ގައި ފެށި ކައުންސިލް ބައްދަލުވުން، ހަތަރު ގަޑިއިރަށް ދިގު ދެމިގެންދިޔައެވެ.

ގާސިމްގެ ތާއިދު ހޯއްދެވުމަށް ސަން އައިލެންޑަށް ވަޑައިގެން، އެ ރަށުގައި ރައީސް ސާލިހު ދެ ދުވަސް ހޭދަ ކުރެއްވިއެވެ. ރައީސް އެ ރަށުން ފައިބައިވަޑައިގެންނެވި ފޮރިން މިނިސްޓަރު ޝާހިދާއި ރައީސް އޮފީހުގެ ޗީފް އޮފް ސްޓާފް އަލީ ޒާހިރު އެ ރަށުގައި ބެހެއްޓެވުމަށްފަހުގައެވެ.