މިދިޔަ މަހުގެ 25 އިން މި މަހުގެ ތިން ވަނަ ދުވަހުގެ ނިޔަލަށް މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ ޓީމުން ހޯދި ރަން ވަނަތައް ފާހަގަކުރުމުގެ ގޮތުން ކުލަގަދަ އިވެންޓެއް ރޭ ބާއްވައިފިއެވެ.

މިފަހަރުގެ އައިއޯއައިޖީއަކީ ރާއްޖެއިން މިހާތަނަށް އެންމެ ބޮޑު ކާމިޔާބީއެއް ހޯދި އިވެންޓެވެ. އެގޮތުން ރާއްޖެއިން މިފަހަރުގެ ގޭމްސްގައި ވަނީ ޖުމުލަ 28 މެޑަލް ހޯދައިފައެވެ. 2019 ވަނަ އަހަރު މޮރިޝަސްގައި އޮތް ގޭމްސްއިން ރާއްޖެއަށް 15 މެޑަލް ލިބިފައިވާއިރު، މިފަހަރުގެ ގޭމްސްގައި ރާއްޖޭގެ ޓީޓީ، ބެޑްމިންޓަން، ޓައެކްވަންޑޯ، ޕެރަ އެތުލެޓިކްސް، އެތުލެޓިކްސް އަދި ބާސްކެޓު ބޯޅައިން ވަނީ މެޑަލް ހާސިލްކޮށްފައެވެ.

އައިއޯއައިޖީގެ ކާމިޔާބީ ފާހަގަ ކުރުމަށް ބޭއްވި ރަސްމިއްޔާތުގެ ތެރެއިން --- ފޮޓޯ/ހަތާވީސް

ރައީސް އިބްރާހިމް މުހައްމަދު ސޯލިހް ވެސް ބައިވެރިވެވަޑައިގެންނެވި އިވެންޓުގައި ރޭ ވަނީ މިފަހަރުގެ އައިއޯއައިޖީގެ ކާމިޔާބީ ފާހަގަކޮށްފައެވެ. ޖުމްހޫރީ މައިދާނުގައި ތުނި ވިއްސާރައާއެކު ކުރިއަށް ގެންދިޔަ ކުލަގަދަ ރަސްމިއްޔާތުގައި މިރަސްމިއްޔާތުގައި، ޔޫތު މިނިސްޓަރު އަހުމަދު މަހްލޫފާއި، ވަޒީރުންނާއި މަޖިލީހުގެ މެމްބަރުން ބައިވެރިވެވަޑައިގެންނެވިއެވެ. އަދި ޓީމަށް މަރުޙަބާ ކިޔުމަށް ކުޅިވަރުގެ ދާއިރާގައި ޙަރަކާތްތެރިވާ ފަރާތްތަކާއި، ކުޅިވަރަށް ލޯބިކުރާ ގިނަ ޢަދަދެއްގެ ޢާންމުންވެސް ޖަމާވިއެވެ.

މި ފަދަ ކުލަގަދަ ރަސްމިއްޔާތެއް ބޭއްވުމުގެ މައިގަނޑު މަގުސަދަކީ އެ އެތުލީޓުންނާއި އޮފިޝަލުން ދައްކައިދިން ގައުމިއްޔަތުގެ ރިވެތި ނަމޫނާ އާއި ހިތްވަރާއި އަޒުމާއި، ހޯދާފައިވާ ފަހުރުވެރި ކާމިޔާބީ ވީހާވެސް ކުލަގަދަކޮށް ފާހަގަކުރުމުގެ ގޮތުން ކަމަށް ޔޫތު މިނިސްޓްރީއިން ވަނީ ބުނެފައެވެ.

އައިއޯއައިޖީގެ ކާމިޔާބީ ފާހަގަ ކުރުމަށް ޖުމްހޫރީ މައިދާނުގައި ރޭ ބޭއްވި ރަސްމިއްޔާތުގެ ތެރެއިން --- ފޮޓޯ/ހަތާވީސް

މިފަހަރުގެ ގޭމްސްގައި ރާއްޖެއިން ހޯދި 18 މެޑަލްގެ ތެރޭގައި 5 ރަން މެޑެއްޔާއި، 9 ރިހި މެޑެއްޔާއި، 14 ލޯ މެޑަލް ހިމެނެއެވެ. މިހާރުގެ ސަރުކާރުން އަންނަނީ ނުކުޅެދުންތެރިކަން ހުންނަ ފަރާތްތަކަށްވެސް ކުޅިވަރު ކުޅުމަށާއި، ބައިނަލްއަޤުވާމީ ފެންވަރުގެ ކުޅިވަރުތަކުގައި ވާދަކުރުމަށް ފަހިކޮށްދެމުންނެވެ. އެގޮތުން މިފަހަރުގެ ގޭމްސްގައި ލޯފަން މީހުންގެ 100 މީޓަރު ދުވުމުގައި ބައިވެރިވި ރާއްޖޭގެ ދެ އެތުލީޓުން ވަނީ ލޯ މެޑަލް ވެސް ހޯދާފައެވެ.