ބޯހިޔާވަހިކަމުގެ ޕްރޮގްރާމުގެދަށުން އައްޑޫސިޓީގެ އަވަށްތަކުން ގޯއްޗަށް އެދި ހުށަހެޅި ފަރާތްތަކުގެ ތެރެއިން ޝަރުތު ފުރިހަމަވާ ފަރާތްތަކުގެ ދާއިމީ ލިސްޓު އާއްމުކޮށްފިއެވެ.

އައްޑޫ ސިޓީ ކައުންސިލުން ކޮށްފައިވާ އިއުލާނެއްގައި ބުނެފައި ވަނީ އެ ލިސްޓުގައި ހިމެނޭ ފަރާތްތަކަށް ގޯތި ދޫކުރެވޭނީ ދެ މަރުޙަލާއަކަށް ބައިކުރެވިގެން ކަމަށެވެ. އެގޮތުން ފުރަތަމަ މަރުހަލާގައި ގޯތި ދޫކުރެވޭނީ ގޯތިދޫކުރުމަށް ފުރުސަތު ހުޅުވާ ކުރެވުނު އިއުލާނުގައިވެސްވާ ފަދައިން އައްޑޫގެ ހަތަރު އަވަށަކުން ޖުމަލަ 1000ގޯތި ކަމަށެވެ.

އެއީ އައްޑޫ ސިޓީގެ ހިތަދޫއިން 500ގޯއްޗާއި ފޭދޫއިން 300 ގޯއްޗާއި، ހުޅުދޫއިން 100 ގޯތީގެ އިތުރުން، މީދޫއިން 100 ގޯއްޗެވެ.

އައްޑޫ ކައުންސިލުން ބުނީ އެ ލިސްޓުގައި ހިމެނޭ އެހެން ފަރާތްތަކަށް ދެވަނަ މަރުހަލާގައި ދޫކުރުމަށް ހަމަޖެހިފައިވާ ގޯތި ދޫކުރެވޭނީ އަވަށްތަކަށް އިތުރުކުރެވުނު ބިންތަކުގެ ލޭންޑް ޔޫޒް ޕްލޭން ހަދައި ސާވޭގެ މަސައްކަތް ފުރިހަމަ ކުރުމަށްފަހު ކަމަށެވެ.

"ކައުންސިލްގެ އަމާޒަކީ 2024 ޖޫންމަހުގެ ނިޔަލަށް މިހާރު އާންމުކުރެވިފައިމިވާ ލިސްޓުގައި ހިމެނޭ ހުރިހާ ފަރާތްތަކަށް ގޯތިދޫކޮށް ނިންމުމެވެ" އައްޑޫ ކައުންސިލުން ބުންޏެވެ.

ފުރަތަމަ މަރުހަލާގައި ދޫކުރުމަށް ހަމަޖެހިފައިވާ 1000 ގޯތި ދޫކުރުމަށްޓަކައި ފުރިހަމަކުރަންޖެހޭ އިދާރީ މަސައްކަތްތައް އަންނަ ނޮވެމްބަރު މަހުގެ ނިޔަލަށް ފުރިހަމަކޮށް ޑިސެމްބަރުމަސް ނިމުމުގެކުރިން ގޯތިތައް ލިބެންޖެހޭ ފަރާތްތަކަށް ހަވާލުކޮށް ނިންމާނެ ކަމަށް އެ ކައުންސިލުން ބުންޏެވެ.