އއ. މަތިވެރީގައި މިއަދު ހިންގި ހަމަނުޖެހުމުގައި އިދިކޮޅު ރިޔާސީ ކެންޑިޑޭޓް، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ހަމަލާދޭން އުޅެފައިވާ ކަމަށް ނުބެލެވޭ ކަމަށް ފުލުހުން ބުނެފިއެވެ.

ފުލުހުން ބުނީ މަތިވެރީގައި ހަމަނުޖެހުން ހިންގުމާ ގުޅިގެން އެކަކު ހައްޔަރުކުރި ކަމަށެވެ. ހަމަނުޖެހުން ހިނގަންމެދުވެރިވީ ދެ މީހެއްގެ ދެމެދުގައި ބޭއަދަބީކޮށް އަތުގެ އިޝާރާތްތަކެއް ކުރުމުން ކަމަށް ފުލުހުން ބުންޏެވެ.

އެ މައްސަލާގައި ހައްޔަރުކުރި މީހާ މައުލޫމާތު ސާފުކުރުމަށްފަހު ދޫކޮށްލާފައިވާ ކަމަށް ފުލުހުން ބުންޏެވެ.

"މިހާތަނަށް ބެލިބެލުމުން، މި ހަމަނުޖެހުމުގައި ޕީއެންސީގެ ރިޔާސީ ކެންޑިޑޭޓް ޑރ. މުއިއްޒަށް ހަމަލާދޭން އުޅެފައިވާ ކަމަށް ނުބެލެވޭ،" މީޑިއާތަކަށް ފުލުހުން ފޮނުވި މެސެޖުގައިވެއެވެ.