ފޭލްވެފައި ތިބި ބަޔަކު ދައްކާ ވާހަކައަށް އަޅާނުލައި "ކޫލް" ކޮށް ކުރިއަށް ވަޑައިގެންނެވުމަށް އެމަނިކުފާނުގެ ސަޕޯޓަރުންނަށް ރައީސް އިބްރާހިމް މުހައްމަދު ސޯލިހު މިރޭ އިލްތިިމާސް ކުރައްވައިފިއެވެ.

ރައީސްގެ އެގޮތަށް ވިދާޅުވީ ލ. އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގައި އެ އަތޮޅު ގަމުގައި މިރޭ ބޭއްވި ޖަލްސާގައި ވާހަކަ ދައްކަވަމުންނެވެ.

"އަޅުގަނޑު ވާހަކަ ފަށަމުން ދަންނަވާލަން ނީނާއަށް. ކަންބޮޑުވެވަޑައިނުގަންނަވައްޗޭ. އަޅުގަނޑުމެން މި ކެމްޕޭނު ގެންދާނީ ވަރަށް ކޫލްކޮށް" އެ ޖަލްސާގައިި ރައީސަށްވުރެ ކުރިން ވާހަކަ ދެއްކި އެރަށު ކައުންސިލްގެ މެމްބަރު ނީނާ ދެއްކެވި ވާހަކައަށް އިޝާރާތްކުރައްވާ އެމަނިކުފާނު ވިދާޅުވިއެވެ.

"މިއީ ވަރަށް ކޫލް ކެމްޕޭނެއް" ރައީސް ތަކުރާރު ކުރެއްވިއެވެ. ވާދަވެރި ފަރާތްތަކަށް އިޝާރާތްކުރައްވާ ސަޕޯޓަރުންނަށް، ރައީސް އިލްތިމާސްކުރެއްވީ އިދިކޮޅުން ދައްކަމުންދާ ވާހަކައަށް ސަމާލުކަން ނުދިނުމަށެވެ. މި ސަރުކާރުން ރައްޔިތުން ކޮށްދީފައި ހުރިކަންތައްވެސް ގިނަ ކަމަށާއި އަދި ކުރިއަށް އޮތްތަނުގައި ކުރައްވާނެ ކަންތައްވެސް ގިނަ ކަމަށް ވިދާޅުވިއެވެ.

"މީގެ ކުރިން ކަމެއް ކޮށްނުދެވި ފޭލްވެފައި ތިބި ބަޔަކު އެހެން ދައްކާވަހާކައަށް އަޅުގަނޑުމެން އަޅަލާނެ ކަމެއް. ކޫލް ކެމްޕޭނެއްގައި ކުރިއަށް ވަޑައިގަންނަވާ" ބަހުގެ ހަމަލާތައް ފޮނުއްވަމުން ރައީސް ވިދާޅުވިއެވެ.

މި ފަހަރުގެ އިންތިހާބު އެއް ބުރުން ކާމިޔާބު ކުރައްވާނެ ކަމަށް ރައީސް ސޯލިހު ގެންދަވަނީ ޖަލްސާތަކުގައި ވިދާޅުވަމުންނެވެ. އެހެން ބަޔަކު ވެރިކަމަށް ހޮވިއްޖެނަމަ ރާއްޖެ އަނިޔާވެރިކަމުގެ ތެރެއަށް ހިނގައިދާނެ ކަމަށް ރައީސް ގެންދަވަނީ ތަކުރާރުކޮށް ވިދާޅުވަމުންނެވެ.