ފުލުހުންގެ ކެމެރާތަކަށް ހުރަސް އެޅޭހެން ހުރި ކެމްޕެއިން މެޓީރިއަލް ނަގަން އަންގައިފި

ފުލުހުންގެ ކެމެރާތަކަށް ހުރަސް އެޅޭހެން ހުރި ކެމްޕެއިން މެޓީރިއަލް ނަގަން އިލެކްޝަން ކޮމިޝަނުން އަންގައިފިއެވެ.

އީސީގެ ނައިބް ރައީސް އިސްމާއިލް ހަބީބް ވިދާޅުވީ މާލެސިޓީގެ އެކި ސަރަހައްދުތަކުގައި، ފުލުހުންގެ ހަރުކޮށްފައިވާ ސެކިޔުރިޓީ ކެމެރާތަކާއި، މާލެސިޓީގެ މަގުތަކާއި، ބްރިޖުގައި ބަހައްޓާފައިވާ ޓްރެފިކް ލައިޓްތަކުގެ ވިއު ގެއްލޭގޮތަށް، ރިޔާސީ ކެންޑިޑޭޓުންގެ ކެންޕޭން މެޓީރިއަލްސް ބަހައްޓަމުން ގެންދާ ކަމަށެވެ.

އެކަން އެގޮތަށް ނުކުރުމަށާއި، އެގޮތަށް ހަރުކޮށްފައިވާ ތަކެތި 24 ގަޑިއިރުގެ މުހުލަތުގައި ނަގައި ނިންމުމަށް ކެންޑިޑޭޓުންނަށާއި، ޕާޓީތަކަށް އީސީ އިން ވަނީ އަންގާފައެވެ.

އަދި ކެންޑިޑޭޓުންގެ ރަސްމީ އިންތިހާބީ އޭޖެންޓުންނާ އެކީގައި އީސީ އާއި، ފުލުހުން ބައްދަލުކުރި ދުވަހުވެސް އެ ވާހަކަތައް ހިއްސާކޮށްފައިވާ ކަމަށް ހަބީބް ވިދާޅުވިއެވެ.

ގަވާއިދާ ހިލާފު ކަންކަން ނުކުރުމަށް އެންމެހައި ފަރާތްތަކަށް އިލެކްޝަންސް އިސީން އިލްތިމާސް ކުރެއެވެ. އިންތިހާބުތަކާބެހޭ ގާނޫނުތަކާއި ގަވާއިދުތަކުގައި ކެންޑިޑޭޓުންނަށް އިރުޝާދު ދެވިފައިވާ ގޮތުގެމަތީން، ހުއްދަ ނަގަންޖެހޭ ފަރާތްތަކުން ހުއްދަ ލިބިގެން ނޫންގޮތަކަށް، މަގުތަކުގަޔާއި، އިމާރާތްތަކުގައި، ކެމްޕޭން އެއްވެސް އެއްޗެއް ހަރުކޮށް، ދަމައި އަދި ހިއްޕާ ނުހެދުމަށް ވެސް އީސީން އެދެއެވެ.

އަދި އެކަން ހުއްޓުވުމަށް، ކޮންމެ ފަހަރަކު، ފުލުހުން ބޭނުންކުރުމަކީ ކޮމިޝަނުން ބޭނުންވާ ގޮތެއްނޫން ކަމަށާއި އެހެންކަމުން، ޕާޓީތަކުން މިހާރަށް ވުރެ ޒިންމާދާރު ކަމާއެކު، މިފަދަ ކަންކަމުގައި، އަމަލު ކުރުމަށް އީސީސން ނަސޭހަތްތެރިވެއެވެ.