މަޑަގަސްކަރުގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ފިރިހެން ޓީޓީ އިވެންޓުގެ ފައިނަލުގައި ފުރަތަމަ ފަހަރަށް ވާދަކޮށް ރާއްޖެއިން ރިހި މެޑަލް ހޯދައިފިއެވެ.

ރާއްޖެއިން މިއަދު ކުޅުނު ފައިނަލުގައި މަޑަގަސްކަރައާ ވާދަކޮށް ބަލިވީ 2-3 ގޭމުންނެވެ. ފަހު ގޭމުން ބަލިވެގެން ރާއްޖެއަށް ރިހި މެޑަލް ލިބުނު ނަމަވެސް މިއީ ދިވެހި ތާރީހުގައި ވެސް ޓީޓީގައި ރާއްޖޭގެ ފިރިހެން ޓީމަށް ލިބުނު އެންމެ ބޮޑު ކާމިޔާބީއެވެ.

މިއަދުގެ ފައިނަލުގެ ފުރަތަމަ ސެޓުން ރާއްޖޭގެ ޝައްފާން މަޑަގަސްކަރުގެ އެއް ނަންބަރު ކުޅުންތެރިޔާ ރަންޑްރިއާނަންޓޯއަންޑްރޯގެ މައްޗަށް ކުރި ހޯދީ 2-3 ސެޓުންނެވެ. ފުރަތަ ސެޓުމް މަޑަގަސްކަރަ ކުޅުންތެރިޔާ 11-6 އިން މޮޅުވެފައިވަނިކޮށް ޖެހިގެން އައި ދެ ސެޓު 11-5 އަދި 11-2 އިން ޝައްފާން ވަނީ ގެންގޮސްފައެވެ. އަދި ހަތަރުވަނަ ސެޓު އިދިކޮޅު ކުޅުންތެރިޔާ 11-9 އިން މޮޅުވި އިރު، 11-6 އިން ފަހު ސެޓުން ޝައްފާން ވަނީ ކުރި ހޯދައިފައެވެ.

ދެވަނަ ގޭމުގައި ރާއްޖޭގެ މުންސިފް ވަނީ މަޑަގަސްކަރުގެ ރަޒަންފިންޑްރަލަމްބޯ ޒޯ ނަންދަރ އަތުން ތިން ސެޓުން ބަލިވެފައެވެ. އަދި ތިންވަނަ ގޭމުގައި ވެސް ރާއްޖެއަށް ވަނީ ނާކާމިޔާބީއާ ކުރިމަތިލާން ޖެހިފައެވެ.

ހަތަރުވަނަ ގޭމުން ރާއްޖެ ވަނީ މޮޅުވެ އަނެއްކާވެސް އުންމީދު ދަމަހައްޓައިފައެވެ. ޝައްފާން އެ ގޭމު ގެންދިޔައީ 3-2 ސެޓުންނެވެ. އެ މެޗުގެ ފުރަތަމަ ސެޓު 11-8 އިން އަދި ދެވަނަ ސެޓު 12-10 އިން ޝައްފާން ގެންދިޔައިރު، ޖެހިގެން އައި ދެ ސެޓުން މަޑަގަސްކަރުގެ ނަޓިވެލް ޖޮނަތަން ގެންދިޔައީ 11-6 އަދި 11-8 އިންނެވެ. ފަހު ސެޓުން ޝައްފާން ކުރި ހޯދީ 11-6 އިންނެވެ.

ދެ ގޭމު ކޮންމެ ޓީމަކަށް ލިބުމާއެކު ނަތީޖާ ނެރުމަށް ކުޅުނު ފަސްވަނަ ސެޓުން މުންސިފްގެ މައްޗަށް މަޑަގަސަކަރައިގެ ރަންޑްރިއާނަންޓޯއަންޑްރޯ ކުރި ހޯދީ 1-3 ސެޓުންނެވެ. ފުރަތަމަ ސެޓު 13-11 އިން މުންސިފް ގެންގޮސްފައިވަނިކޮށް ރަންޑްރިއާނަންޓޯއަންޑްރޯ ވަނީ ފަހަތުން އަރައި ޖެހިގެން އައި ދެ ސެޓު ކާމިޔާބުކޮށްފައެވެ. އޭނާ އެ ސެޓުތައް ގެންދިޔައީ 11-6 އަދި 11-4 ގެ އިތުރުން 16-14 އިންނެވެ.

ރާއްޖޭގެ ފިރިހެން ޓީމުން ރިހި މެޑަލް ހޯދި އިރު، އަންހެން ޓީމުން މިއަދު ވަނީ މޮރިޝަސް ބަލިކޮށް އެ ގޭމްސްގެ ރަން މެޑަލް ހޯދައިފައެވެ. ޓީޓީ ޓީމުތަކުން މި ހޯދި ކާމިޔާބާއެކު މިހާތަނަށް ރާއްޖެއަށް ވަނީ ދެ މެޑަލް ލިބިފައެވެ.