އިދިކޮޅު ޕީޕީއެމްގެ ހުޅުމާލެ ދާއިރާގެ ނާއިބު ރައީސްގެ ގޮތުގައި ހުންނެވި އަހްމަދު އަޒީލް ސަރުކާރު ހިންގާ މައި ޕާޓީ އެމްޑީޕީއާ ގުޅިއްޖެއެވެ.

އަޒީލް އެމްޑީޕީ އަށް ސޮއި ކުރުމަށްޓަކައި މިރޭ ހުޅުމާލެ ދެވަނަ ފިޔަވަހީގައި ހުންނަ އެމްޑީޕީގެ ޖަގަހާގައި ވަނީ ހާއްސަ ރަސްމިއްޔާތެއް ބާއްވައިފައެވެ. އަޒީލް އެމްޑީޕީ އަށް ސޮއިކުރި ފޯމާ ހަވާލުވެވަޑައިގަތީ އެމްޑީޕީގެ ޗެއާޕާސަން ފައްޔާޒު އިސްމާއީލެވެ.

އަޒީލް އާއެކު ގިނަ އަދަދެއްގެ ޒުވާނުން ވެސް މިރޭ ވަނީ އެމްޑީޕީ އަށް ސޮއިކޮށްފައެވެ. އެ ހުރިހާ ފޯމުތަކާއި ވެސް ހަވާލުވެވަޑައިގެންނެވީ ފައްޔާޒެވެ.

އެމްޑީޕީ އަށް ސޮއިކުރުމަށްފަހު އަޒީލް މިރޭ ވަނީ އެމްޑީޕީ އަށް އޭނާ ސޮއި ކުރުމާއެކު މިރޭ އޭނާ އަށް އެޕާޓީގެ އާއްމު މެންބަރުން ހޫނު މަރުހަބާއެއް ކިޔުމުން އެކަމަށް ޝުކުރު އަދާ ކޮށްފައެވެ.

"އަޅުގަނޑު މިއަދު މި ސްޓޭންޑު ނެގީ ފިތުނައާ ފަސާދަ އިން އެއްކިބާވެ ގައުމީ މަސްލަހަތު އިސްކޮށް ޒުވާނުންގެ ކުރިއެރުމާއި ގައުމު ކުރިއެރުމެއް ނެގި ސްޓޭންޑެއް،" އަޒީލް ވިދާޅުވިއެވެ.

އޭނާ ވިދާޅުވީ ތަނެއް ކުރި އަރާނީ އެންމެން ގުޅިގެން ކުރާ މަސައްކަތުން ކަމަށެވެ.