މިހާރަށްވުރެ ބޮޑަށް ޕްރޮފެޝަނަލް ފަނޑިޔާރުން އިތުރުކުރަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެއެވެ.

ރައީސް އެހެން ވިދާޅުވީ ރ އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގައި އެ އަތޮޅު މީދޫގައި ވާހަކަ ދައްކަވަމުންނެވެ.

އެމްޑީޕީގެ ފަރާތުން ރިޔާސީ އިންތިހާބުގައި ވާދަކުރައްވާ ރައީސް ސޯލިހު ވިދާޅުވީ ޕާޓީން ރޭ ލޯންޗުކުރި "ހެޔޮވެރިކަމުގެ" ސިޔާސަތުގެ ދަށުން އިންސާފު ގާއިމްކުރުމަކީ އެންމެ މުހިއްމު އެންމެ މަސައްކަތް ކަމަށެވެ.

އެމްޑީޕީ ވުޖޫދުވީވެސް އެ ބިންގަލުގެ މަތީގައިކަން ފާހަގަކުރައްވާ ރައީސް ވިދާޅުވީ، އިންސާފު ލިބުން މަހުރޫމްވެފައި ތިބި ފަރާތްތަކަށް އެ ފުރުސަތު ހޯދައި ދިނުމަކީ އެެ ޕާޓީގެ ކޮންމެ ސަރުކާރެއްްގައިވެސް ހާއްސަ އިސްކަމެއްދެއްވާ ކަމެއް ކަމަށެވެ.

"އެތައް ބަޔަކު ހުކުމެއް ނެތި، އެތައް އަނިޔާތަކެއްގެ ތެރޭގައި އެތައް ދުވަހަކު ހޭދަކުރަން ޖެހުނު. އިންސާފު ނުލިބި ވެރިންގެ ގާތަށް އާދޭސްކުރަމުން ދިޔައީ، މިފަދަ އެތައް ކަމެއް ތަހައްމަލުކޮށްފައި ތިބި އެތައް ބަޔަކު ރާއްޖޭގެ ކަންކޮޅުތަކުގައި އެބަތިބި" އެމަނިކުފާނު ވިދާޅުވިއެވެ.

ރައީސް ސޯލިހު ވިދާޅުވީ ކުރިއަށް އޮތް ތަނުގައިވެސް ސިޔާސަތުތައް ބައްޓަން ކުރާނީ މިނިވަންކަމާއި އެކީ އިންސާފުގެ ދާއިރާ ބައްޓަން ކުރުމަށް ކަމަށެވެ. މި ފަސް އަހަރުގެ ތެރޭގައި ޝަރުއީ ދާއިރާއަށް ރައްޔިތުންގެ ބޮޑު އިތުބާރެއް ލިބިފައިވާ ކަމަށާއި ރާއްޖޭގެ އެންމެ މަތީ ކޯޓު ސުޕްރީމް ކޯޓާއި މެދު ކުރިން ރައްޔިތުންގެ ތެރޭގައި އޮތް ޝައްކުފިލައި އިތުބާރު ބޮޑު ތަނުން އިތުރުވެއްޖެ ކަމަށް ވިދާޅުވިއެވެ.

އަދި އަންހެން ފަނޑިޔާރުންގެ ދައުރުވެސް އިތުރުކުރެވިފައިވާ ކަމަށް ވިދާޅުވިއެވެ. ރައީސް އެ އީޝާރާތްކުރެއްވީ ސުޕްރީމް ކޯޓުގެ ބެންޗަށް ފުރަތަމަ ފަހަރަށް އަންހެން ފަނޑިޔާރުން އައްޔަންކުރި ކުރުމަށެވެ.

ގާނޫނީ ވަކީލުންނާ ބެހޭ ގާނޫނަށް އިޝާރާތް ކުރައްވާ ރައީސް ވިދާޅުވީ އެ ގާނޫނު ތަންފީޒު ކުރެވެން ފެށުމުން ރައްޔިތުންގެ ބޮޑު އިތުބާރެއް ވަކީލުންނާމެދުވެސް ލިބެމުންދާ ކަމަށެވެ.

ރައީސް ވިދާޅުވި ގޮތުގައި އެންމެ މުހިއްމު އެއް އަމާޒަކީ އިންސާފުގެ ދުވެލި ބާރު ކުރުމެވެ. މަޑުޖެހިފައި ހުރި ޝަރީއަތްތައް ދުވެލި ބާރުކުރުން ކަމަށެވެ. އެކަމަށްޓަކައި އިތުރު ކަންތައްތަކެއް ކުރަން ޖެހޭ ކަމަށް ވިދާޅުވިއެވެ.

"ވަސީލަތްތައް އިތުރުކުރަން ޖެހޭ، ޕްރޮފެޝަނަލް ފަނޑިޔާރުން ހޯދަން އެބަ ޖެހޭ، އިތުރަށް. މިއަދުވެސް އަޅުގަނޑުމެންގެ ތެރޭގައި އެބަ ތިއްބެވި ފުންނާބު އުސް ވަރަށް މޮޅެތި ވަކީލުންނާއި ޝަރުއީ ދާއިރާގެ ފަނޑިޔާރުން. އެހެންނަމަވެސް އަދިވެސް އިތުރަށް މި ދާއިރާއަށް ބޭނުންވާ ވަސީލަތްތައް އިތުރުކުރަން ޖެހޭ" ރައީސް ސޯލިހު ވިދާޅުވިއެވެ.