ސަރުކާރު ހިންގާ މައިޕާޓީ އެމްޑީޕީން ވަކިވެ، އުފެއްދި ދަ ޑިމޮކްރެޓްސްއާ ގުޅުނުކަން މަޖިލީހުގެ އިދާރާ އަށް ހާމަ ކުރެއްވީ ތިން މެންބަރުން ކަމަށް މަޖިލީހުގެ ރިޔާސަތުން ބުނެފިއެވެ.

އެމްޑީޕީން ވަކިވެ ޑިމޮކްރެޓްސްއާ 14 މެންބަރަކު ގުޅިވަޑައިގަތެވެ.

މީގެތެރޭގައި މަޖިލީހުގެ ރައީސް މުހައްމަދު ނަޝީދާއި މަޖިލިސް ނާއިބު ރައީސް އީވާ ހިމެނިވަޑައިގަންނަވައެވެ.

ނަމަވެސް ޑިމޮކްރެޓުންނާއި ގުޅިވަޑައިގެންނެވިކަން ހާމަ ކުރެއްވީ މެދު ހެންވޭރު ދާއިރާގެ މެންބަރު އަލީ އާޒިމާއި މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ އަދި މަޑަވެލި ދާއިރާގެ މެންބަރު ހުސައިން ފިރުޝާނެވެ.

މަޖިލިސް މެންބަރަކު ޕާޓީ ބަދަލުކޮށްފި ނަމަ ނުވަތަ ޕާޓީއަކުން ވަކިވެއްޖެ ނަމަ މަޖިލިސް ގަވާއިދު ބުނާ ގޮތުން ނަމަ އެ މެންބަރަކާއި އިލެކްޝަނުން މަޖިލީހުގެ އިދާރާ އަށް ލިޔުންތައް ފޮނުވަން ޖެހެއެވެ.