މާލެ ސަރަހައްދުން ބަންޑާރަ ގޯތި ލިބޭ މީހުންނަށް ގޯތި ލިބޭނެ ތަންތަން ކަނޑައެޅުމަށް ގުރުއަތު ނެގުމުގައި މަކަރު ހަދާ ކަމަށް ބުނެ ދެކެވޭ ވާހަކަތައް ޕްލޭނިން އެންޑް ހައުސިން މިނިސްޓްރީން ދޮގުކޮށްފިއެވެ.

މީޑިއާއެއްގައި މިއަދު ޝާއިއުކުރި ހަބަރަކާއި ގުޅިގެން ޕްލޭނިން މިނިސްޓްރީން ވަނީ ގުރުއަތު ނެގުން އޮންނަ ގަލޮޅު ދަނޑުގައި ގުރުއަތު ނެގުމުގެ އިންތިޒާމް އޮންނަ ގޮތް ނޫސްވެރިންނަށް ދައްކާލައިފައެވެ.

އެ ބައްދަލުވުމުގައި ޕްލޭނިން މިނިސްޓްރީގެ ހައުސިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރ މުޙައްމަދު އާރިފް ފުރަތަމަވެސް ވަނީ ގުރުއަތު ނެގުމުގައި މަކަރު ހަދާ ކަމަށް ބުނެ މީޑިއާއެއްގައި އޮތް ހަބަރު ދޮގު ކުރައްވާފައެވެ.

މާލެ ސަރަހައްދުން ބަންޑާރަ ގޯތި ލިބޭ މީހުން ގުރުއަތު ނެގުމުގެ ތެރެއިން: ހަތާވީސް ފޮޓޯ | އަހްމަދު ރަޝީދު (ދޮންކޮޅު)

އާރިފް ވިދާޅުވީ ކަރުދާސްތައް ބަހައްޓާ ފޮށީ ބަންދު ކުރަނީ އެވަގުތު އެތަނުގައި ތިބޭ މީހުންގެ ހާޒިރުގައި ކަމަށެވެ. އަދި ގުރުއަތު އެ ފޮށި ޖެހިގެން އަންނަ ދުވަހުގެ ގުރުއަތު ނެގުމުގެ ކަންކަން ފެށުމާއި ހަމައަށް ފުލުހުން ވެސް އެ ފޮށި ބަލަހައްޓާނެ ކަމަށެވެ.

"މިތަނުގައި އަޅުގަނޑުމެންގެ މުވައްޒަފުންނާއި ފުލުހުން ހަމަ ތިބޭނެ. ދެން 15ވަނަ ދުވަހުން ފެށިގެން މިތަން މި އިންނަނީ ލައިވްކޮށް،" ގުރުއަތު ނެގުމުގައި މަކަރު ހެދުމުގެ ފުރުސަތު ނޯންނާނެކަން ހާމަ ކުރުމުގެ ގޮތުން އާރިފް ވިދާޅުވިއެވެ.

އޭނާ ވިދާޅުވީ ގުރުއަތު ނަގާ 8 ފޮށްޓެއް އެތަނުގައި ހުންނާނެ ކަމަށެވެ. ގުރުއަތު ނަގާ ކަރުދާސްކޮޅުތައް ހުންނާނީ އެއްކުލައެއްގައި ކަމަށާއި ގުރުއަތު ނަގާ ވަގުތު ގޯތި ލިބެނީ ކޮން ސަރަހައްދަކުން ކަމެއް ނޭނގޭނެ ކަމަށެވެ.

މިކަން ފެއްޓެވިއިރު ރައީސް އިބްރާހީމް މުހައްމަދު ސޯލިހް އެދިލެއްވީ ރައްޔިތުންގެ އިތުބާރު އޮންނަ ގޮތަށް އެކަމުގެ މަސައްކަތްތައް ކުރިޔަށް ގެންދެވުމަށް ކަމަށް ވެސް އޭނާ ވިދާޅުވިއެވެ.

ބިންވެރިޔާ ސްކީމުން 2450، 3250 އަދި 3650 އަކަފޫޓު ގޯތިލިބޭ ފަރާތްތަކުގެ ގުރުނެގުން މިހާރު ނިމިފައެވެ.

ގޯތީ ލިބޭ މިހުންގެ ދާއިމީ ލިސްޓު ސަރުކާރުން އިއުލާންކުރީ މި މަހުގެ 13 ވަނަ ދުވަހުއެވެ.

އެ ސްކީމގެ ދަށުން ގޯއްޗަށް ހުށައެޅި ފަރާތްތަކުގެ ތެރެއިން އިއުލާނު ކުރި ލިސްޓްގައި ގޯތި ލިބުމަށް ޝަރުތު ހަމަވާ 19،631 މީހުން ތިބިއިރު، މިހާރު ލިބެން ހުރި 9003 ގޯތި ދެވެން އޮތީ އެތަނުން 18،948 މީހަކަށެވެ.

ޕްލޭނިން މިނިސްޓްރީން ބުނީ ގޯތިތައް ސަރުކާރުން ދޭނީ ރަޖިސްޓްރީ ވެސް ކުރުމަށް ފަހު ކަމަށެވެ. ސަރުކާރު ބަދަލުވި ނަމަވެސް، ގޯތި ލިބިފައިވާ މީހުންނަށް އެކަމުން އެއްވެސް ބަދަލެއް ނާންނާނެއެވެ.

ސަރުކާރުން މީގެކުރިން ވަނީ 9،001 ގޯތި މާލެ ސަރަހައްދުން ދޫކުރާނެ ކަމަށް ބުނެފައެވެ. އެ ގޯތިތައް ދޫކުރާނީ ހުޅުމާލެ އާއި ގުޅީފަޅާއި ގިރާވަރު ފަޅުންނެވެ.

މާލެއަށް ދިމާވެފައިވާ ބޯހިޔާވަހިކަމުގެ ދަތިކަން ޙައްލުކުރުމަށްޓަކައި، ރައީސުލްޖުމްހޫރިއްޔާ ވައުދުވެ ވަޑައިގެންނެވި ގޮތަށް މާލެ ސަރަހައްދުން ބަންޑާރަ ގޯތި ދޫކުރުމަށް ހިންގާ "ބިންވެރިޔާ" ސްކީމަކީ، މިހާތަނަށް ރާއްޖޭގައި ހިންގާ ބަންޑާރަ ގޯތި ދޫކުރުމުގެ އެންމެ ބޮޑު ޕްރޮގްރާމް ކަމަށް ސަރުކާރުން ބުނެއެވެ.