ޕްރޮގްރެސިވް ކޮންގްރެސް ކޯލިޝަނަށް ދިވެހި ގައުމުގެ ވެރިކަން ރައްޔިތުން ހަވާލުކޮށްފި ނަމަ، ދިވެހިންނަށް ފެނިގެން ދާނީ ތަރައްގީގެ ރަން ޒަމާނެއް ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.

ޑރ. މުއިއްޒާއި ރަނިންމޭޓު ހުސައިން މުހައްމަދު ލަތީފު އަދި ޕްރޮގްރެސިވް ކޮންގްރެސް ކޯލިޝަންގެ ލީޑާޝިޕްގެ ބޭފުޅުން އަންނަނީ ހދ. ހއ. އަތޮޅުގެ ރަށްތަކަށް ދަތުރު ކުރައްވަމުންނެވެ. އެގޮތުން މިރޭ އިދިކޮޅުން ވަނީ ހއ. އިހަވަންދޫ އަށް ދަތުރުކޮށްފައެވެ.

އިހަވަންދޫގައި ބޭއްވި ކެމްޕެއިން ބައްދަލުވުމެއްގައި ވާހަކަދައްކަވަމުން ޑރ. މުއިއްޒު ވަނީ ރައީސް އިބްރާހީމް މުހައްމަދު ސޯލިހުގެ އިގްތިސޯދީ ސިޔާސަތުތަކަށް ފާޑު ވިދާޅުވެފައެވެ. އެގޮތުން ލޯނު ނުނަގާ ގައުމު ހިންގަން ބުނި ބަޔަކު ވެރިކަމަށް އައިސް ދުވަހަކުވެސް ރާއްޖޭގެ ވެރިކަމެއްގައި ލޯނު ނުނަގާ ވަރަށް ލޯނު ނަގާ ރާއްޖޭގެ އިގްތިސޯދީ ނިޒާމު ހަލާކު ކޮށްލާފައިވާ ކަމަށް މުއިއްޒު ވިދާޅުވިއެވެ.

އެމަނިކުފާނު ވިދާޅުވި ގޮތުގައި 2025ވަނަ އަހަރާއި 2026ވަނަ އަހަރު ވަަރަށް ބޮޑު އަދަދެއް ދައްކަން ޖެހޭ ލޯނުތައް އެބަހުއްޓެވެ. އެހެންކަމުން މުއިއްޒު ވަނީ ލޯނުތައް ރީ ސްޓްރަކްޗާ ކުރަން ޖެހޭ ކަމަށް ވިދާޅުވެފައެވެ.

މުއިއްޒުގެ ވާހަކަފުޅުގައި ދިވެހި ރައްޔިތުން މިއަދުވެސް އެންމެ ބޭނުންވާ ކަމަކީ އިދިކޮޅު ލީޑަރު އަދި ކުރީގެ ރައީސް ޔާމީން ޖަލުން މިނިވަންވުން ކަމަށް ވިދާޅުވިއެވެ. އެކަން ކުރެވެން އޮތީ ޕީޕީއެމް/ޕީއެންސީގެ ވެރިކަމެއް ގާއިމް ކޮށްގެން ކަމަށް ވެސް މުއިއްޒު ވިދާޅުވިއެވެ. އަދި އެންމެން އެއް އަމާޒަކަށް މަސައްކަތް ކޮށްފި ނަމަ އެކަމަކީ ދުރުގައި އޮތް ކަމެއް ނޫން ކަމަށް މުއިއްޒު ފާހަގަކުރެއްވިއެވެ.

"އެހެންވީމަ ޔަގީން ކުރަންވީ ކަމަކީ އަޅުގަނޑުމެންނަށް ރައްޔިތުން މިކަން ހަވާލުކޮށް، މި ގައުމުން ފެނިގެން ދާނީ ތަރައްގީގެ ރަން ޒަމާން،" މުއިއްޒު ވިދާޅުވިއެވެ.

މުއިއްޒުގެ ވާހަކަފުޅުގައި އެމްޑީޕީގެ މެނިފެސްޓޯގައި ހިމެނޭ ބައެއް ސިޔާސަތުތަކަށް ވެސް ފާޑު ވިދާޅުވިއެވެ. އެގޮތުން އެމަނިކުފާނު ވަނީ އެމްޑީޕީ ވެރިކަމަށް އަތުވެއްޖެ ނަމަ އެޕާޓީގެ ތައުލީމީ ސިޔާސަތުގައި ބަޔާން ކޮށްފައިވާ ކަމަކަށް ފާޑު ވިދާޅުވެފައެވެ.

އެގޮތުން އެމްޑީޕީގެ މެނިފެސްޓޯގައި ވަނީ ސުކޫލުތަކުގައި އިސްލާމް މާއްދާ އިނގިރޭސި ބަހުން ކިޔަވަން ބޭނުންވާ ދަރިވަރުންނަށް އެ ފުރުސަތު ފަހިކޮށްދޭން ހިމަނައިފައެވެ. އެމްޑީޕީން ބުނީ އިސްލާމް މާއްދާ އިނގިރޭސިން ކިޔަވައިފައި އޮތުމަކީ ހަޔާތުގެ ކުރިއެރުމަށް މުހިންމު ކަމެއް ކަމަށެވެ.

އެމްޑީޕީގެ އެ ސިޔާސަތަށް ފާޑު ވިދާޅުވެ، ޑރ. މުއިއްޒު ވިދާޅުވީ އިނގިރޭސި ބަހުން އިސްލާމް މާއްދާ ކިޔަވައި ދިނުމަށް އެމްޑީޕީގެ މެނިފެސްޓޯގައި ހިމަނާފައި ވަނީ ގައުމިއްޔަތު ގެއްލުވާލަން ކަމަށެވެ. މުއިއްޒު ސިފަ ކުރެއްވި ގޮތުގައި އިސްލާމްދީން ގުޅިފައި ވަނީ ގައުމުގެ މިނިވަންކަމާއެވެ.

"އިސްލާމް ދީނާއި, ދިވެހި ބަހާ ހިމާޔަތްކޮށްގެން ގައުމުގެ މުސްތަގުބަލު ސަލާމަތްކުރެވޭނީ،" ޑރ. މުއިއްޒުގެ ވާހަކަފުޅުގައި ވިދާޅުވިއެވެ.