އަންނަ މަހު ރާއްޖޭގައި ބާއްވާ ރިޔާސީ އިންތިހާބުގައި ގިނަ ކެނޑިޑޭޓުންތަކެއް ވާދަކުރަން ނިންމުމަކީ އެމްޑީޕީއަށް އެ އިންތިހާބު ކާމިޔާބު ކުރަން ކުރިއަށް ވުރެ ފަސޭހަވުން ކަމަށް އެ ޕާޓީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެއެވެ.

ރިޔާސީ އިންތިހާބުގައި ވާދަކުރާ ކެނޑިޑޭޓުން ފޯމު ހުށައެޅުމުގެ ފަހު ފުރުސަތު މިއަދަށް ހަމަވި އިރު، އަށް ފަރާތަކުން ވަނީ އިންތިހާބުގައި ވާދަކުރުމަށް ފޯމު ލައިފައެވެ. އަށް ކެނޑިޑޭޓުންނާއެކު މިފަހަރުގެ އިންތިހާބު ވެގެންދާނީ އެންމެ ގިނަ ކެނޑިޑޭޓުން ރިޔާސީ ރޭހުގައި ބައިވެރިވާ ފަހަރަށެވެ. އަދި ގިނަ ކެނޑިޑޭޓުންތަކެއް އިންތިހާބަށް ކުރިމަތިލުމަކީ އެއީ އިންތިހާބު ކާމިޔާބުކުރަން އެމްޑީޕީއަށްވީ އިތުރު ފަސޭހައެއް ކަމަށް މިރޭ ދ. ކުޑަހުވަދޫގައި ބޭއްވި ޖަލްސާގައި ވާހަކަ ދައްކަވަމުން ރައީސް ސޯލިހު ވަނީ ވިދާޅުވެފައެވެ.

"އަށް ކެންޑިޑޭޓުން ކުރިމަތިލީ ފުރަތަމަ ފަހަރު. 2008 ގައި ހަ ކެންޑިޑޭޓުން، އޭގެ ފަހުން މިހާ ގިނަ ކެންޑިޑޭޓުން ކުރިމައްޗެއް ނުލާ، ކުރިއަށް ވުރެ މާ ބޮޑު ތަނުން ފަސޭހަވެއްޖެ، އިރާދަކުރެއްވިއްޔާ ކުރިއަށް މި އޮތް އިންތިހާބު ކާމިޔާބު ކުރާނީ އެއް ބުރުން،" ރައީސް ސޯލިހު މިރޭ ވިދާޅުވި އެވެ.

މިރޭގެ ޖަލްސާގައި ރައީސް ވިދާޅުވީ މިދިޔަ އިންތިހާބަށް ރަށްރަށަށް ކުރި ދަތުރުތަކުން ފެނުނު މަންޒަރާއި މިއަދު އެ ރަށްރަށަށް ގޮސް ފެންނަ މަންޒަރު ވަރަށް ތަފާތުކަމަށެވެ. އެގޮތުން 2018 ވަނަ އަހަރުގެ ކެމްޕޭނު ދަތުރުތަކުގައި ފާހަގަވި ކަމަކީ ރާއްޖޭގެ ގިނަ ރަށްރަށުގައި އެންމެ އަސާސީ ހިދުމަތްތައް ވެސް ގާއިމުވެފައި ނެތް ކަންކަމަށް އެމަނިކުފާނު ފާހަގަ ކުރެއްވި އެވެ.

"އޭރު އަރާ ކޮންމެ ރަށަކުން ވެސް އެދެނީ ސްކޫލަށް ކްލާސް ހަމަނުވާ ވާހަކަ، ލަފާ ފުރަން ދަތި ވާހަކަ، ބަނދަރު ނުހެދި އޮތް ވާހަކަ، ކަރަންޓު އަވަސްއަވަހަށް ކެނޑޭތީ ހިފައި ގެންގުޅޭ ތަކެތި، 140 ރަށެއްގައި ފެނާއި ނަރުދަމާގެ މަސައްކަތް އެއް ފަހަރާ ގެންދެވުނު، 150 ރަށުގައި ބަނދަރުގެ މަސައްކަތް، 150 ރަށެއްގައި ކަރަންޓުގެ ކަންކަން ހަމަޖައްސަން ޖެހުނު،" ރައީސް ތަފުސީލުކޮށްދެއްވި އެވެ.

ފުރަތަމަ ދައުރަށް ވެވަޑައިގެންނެވި ވައުދުތަކުގެ ގާތްގަނޑަކަށް 90 އިންސައްތަ ހާސިލުކުރެވިފައިވާ ކަމަށް އެމަނިކުފާނު ގަބޫލުކުރައްވަ އެވެ. މިިހާތަނަށް ކެމްޕެއިނުގައި ހަ އަތޮޅެއްގެ ހުރިހާ ރަށަކަށް ވަޑައިގެންނެވިއިރު ފެނުނީ ރައްޔިތުން މި ސަރުކާރު ބަލައިގަތް ވަރު ކަމަށް ރައީސް ސޯލިހު ވިދާޅުވި އެވެ.

މީގެ އިތުރުން މިރޭގެ ޖަލްސާގައި އެމްޑީޕީއާއި ގުޅިފައިވާ ޕާޓީތަކުން ކުރިއަށް އޮތް އިންތިހާބަށް ނެރޭ މެނިފެސްޓޯގެ ބައެއް ކަންކަން ވަނީ ހާމަކޮށްފައެވެ. އެގޮތުން މިފަހަރުގެ މެނިފެސްޓޯ ބަހާފައިވަނީ ފަސް ސިޔާސަތެއްގެ މައްޗަށެވެ. އޭގެ ތެރެއިން މިރޭގެ ޖަލްސާގައި އިފުތިތާހު ކޮށްފައިވަނީ އުފާވެރި ދިރިއުޅުން ސިޔާސަތު އެކަންޏެވެ. އެ ސިޔާސަތު ބަހާލާފައިވަނީ ޖުމުލަ ތިން ބަޔަށެވެ. އެއީ ދުޅެހެޔޮ ބަދަހި މުޖުތަމައު, އުފެއްދުންތެރި ޖީލު އަދި ޝާމިލު އޯގާތެރި ރައްޔިތުންނެވެ.