ކުރީގެ ރައީސް ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމާއި އެ ހުކުމާއި ފަސް މިލިއަން ޑޮލަރުގެ ޖޫރިމަނާ ފަސްކޮށް, އެމަނިކުފާނު ވަގުތީ ގޮތުން މިނިވަންކުރަން އެމަނިކުފާނުގެ ފަރާތުން ހައި ކޯޓަށް ހުށަހަޅައިފި އެވެ.

ޔާމީންގެ މައްޗަށް އޮތް ޖަލު ހުކުމްތަކާއި އެ ހުކުމާ އެކު އޮތް ޖޫރިމަނާގެ ސަބަބުން ޔާމީނަށް ވަނީ އަންނަ މަހުގެ ރިޔާސީ އިންތިހާބުން ފުރުސަތު ގެއްލިފަ އެވެ. އެއީ ރައީސްކަމަށް ކުރިމަތިލާ މީހުންގެ ކިބައިގައި ހުންނަން ޖެހޭނެ ކަމަށް ގާނޫނުއަސާސީގައި ބުނާ ދެ ޝަރުތެއް އުނިވެފައި ވާތީ އެވެ.

ޔާމީންގެ ޖަލު ހުކުމުގެ އިސްތިއުނާފް މައްސަލާގައި އެމަނިކުފާނުގެ ފަރާތުން ހައި ކޯޓުގައި އިއްޔެ އެދުނީ ޖަލު ހުކުމާއި ޖޫރިމަނާގެ ހުކުމް އިސްތިއުނާފް ނިމެންދެން ފަސްކުރުމުގެ އަމުރަކަށެވެ. އެ އަމުރު ނެރެދީފިނަމަ އިސްތިއުނާފް ނިމެންދެން ވަގުތީ ގޮތުން ޔާމީން މިނިވަންވެ ވަޑައިގަންނަވާނެ އެވެ.

މިގޮތަށް ޔާމީން އެދިވަޑައިގަތްއިރު އެމަނިކުފާނުގެ ކިބައިން ޖޫރިމަނާގެ ފައިސާ ހޯދަން ދައުލަތުން އިއްޔެ ވަނީ ސިވިލް ކޯޓަށް މައްސަލަ ވައްދައިފަ އެވެ.