މިހާރު ކުރިއަށްދާ ކުލަބް މޯލްޑިވްސް ކަޕުގެ ދެވަނަ ބުރުގައި އެންމެ ފަހުގެ ރަނަރަޕް އެމްޕީއެލް ބަލިކޮށް ޔުނައިޓެޑް ބީއެމްއެލްއިން ގަދަ އަށެއްގެ ޖާގައެއް ހޯދި އިރު، އާބަންކޯއާއި ސްޓެލްކޯ އަދި ވެމްކޯވެސް ކުއާޓާއިން ފުރުސަތު ހޯދައިފިއެވެ.

އެންމެ ފަހުގެ ރަނަރަޕް އެމްޕީއެލްއާއި ބީއެމްއެލް އިއްޔެ ކުޅުނު މެޗު ނިމުނީ 1-0 ގެ ނަތީޖާއަކުން ބީއެމްއެލް ކުރި ހޯދައިގެންނެވެ. މީގެ ކުރިން ދެފަހަރު ކްލަބް މޯލްޑިވްސް ކާމިޔާބުކުރި ބީއެމްއެލްއިން މިދިޔަ ފަހަރުގެ މުބާރާތުގެ ކުރީކޮޅު ކެޓި އިރު، އެމްޕީއެލްއަކީ ތިން ފަަރަށް މި މުބާރާތް ކާމިޔާބު ކުރި ޓީމެކެވެ.

ހުޅުމާލެ ރެހެންދި ޓާފުގައި ކުޅުނު އެ މެޗުގައި ޖެހި ހަމައެކަނި ގޯލު އެ ޓީމަށް ޖަހައިދިނީ އިޝާން އިބްރާހިމް (ސައްޓު) އެވެ. ބީއެމްއެލްގެ ކެޕްޓަންކަން ވެސް ކުރަމުން އަންނަ ސައްޓު ވަނީ އެ މެޗުގެ މޮޅު ކުޅުންތެރިޔަކަށް ހޮވިފައެވެ.

ބީއެމްއެލްގެ އިތުރުން އިތުރު ތިން ޓީމަކުން އިއްޔެ ކުއާޓާ ފައިނަލްގެ ޖާގަތައް ކަށަވަރު ކުރި އިރު، މިފަހަރުގެ މުބާރާތަށް އެންމެ ރަނގަޅަށް ތައްޔާރުވި އެއް ޓީމު ކަމަށްވާ އާބަންކޯއިން ގަދަ އަށަކަށް ދަތުރު ކުރީ ޕްރިޒަން ކުލަބު 0-5 އިން ބަލިކޮށްގެންނެވެ. އާބަންކޯ އަށް މި މެޗުގައި ލަނޑުތައް ޖަހައިދިނީ އަބްދުﷲ ޝާފިއު (ޝާއްޕެ) ދެ ގޯލާއި ޔާމިން މުހައްމަދު (ޔާންޓެ)، އަބްދުﷲ ޝައްފާން (ޝާކާ) އަދި ސާމިން މުހައްމަދު ނަސީރު އެވެ.

އިއްޔެ ކުޅުނު މެޗުގައި ސްޓެލްކޯއިން ކަސްޓަމްސް ރެކްރިއޭޝަން ކުލަބުގެ އަތުން މޮޅުވީ 0-6 ގެ ނަތީޖާއަކުންނެވެ. އެ މެޗުގައި ސްޓެލްކޯގެ ފަރާތުން ޑޮމެނެންޓް ކުޅުމެއް ފެނިގެންދިޔައިރު ގޯލުތައް ޖަހައިދިނީ އިބްރާހިމް ރިމާހު (ރިމޭ) ދެ ގޯލާއި އަލީ މާއިޝް (މައްޓު)، ޖުމައިލް ޖަމީލް، މުހައްމަދު ޝިރުހާން އަދި ހާރޫން އިބްރާހިމް އެވެ.

މީގެ އިތުރުން ވެމްކޯއިން ވެސް އިއްޔެ ކުޅުނު މެޗުގައި ކްރޮސްރޯޑް ރިޒޯޓް ބަލިކުރީ 0-6 ގެ ނަތީޖާއަކުންނެވެ. މިދިޔަ ހަތަރު ވަރަކަށް ކްލަބް މޯލްޑިވްސްގައި ރަނގަޅު ވާދައެއް ކުރަމުން އައިސް އެއް ފަހަރު ފައިނަލުގައި ވެސް ކުޅުނު ވެމްކޯއަށް އެ މެޗުގައި ގޯލުތައް ޖަހައިދިނީ އަލީ ޝިޔާހު (ޝިޔަޅޭ) ހެޓްރިކެއްގެ އިތުރުން، އިސްމާއިލް ވަޖީހު (ވައްޖެ)، މުސައްނިފު މުހައްމަދު އަދި އަބްދުﷲ ޖުނައިދު (ޖެންނޭ) އެވެ.

ކްލަބް މޯލްޑިވްސް ކަޕްގެ ގަދަ 16 ބުރުގެ އަނެއް ހަތަރު މެޗު މިއަދު ކުޅޭނެ އެވެ. އެ ގޮތުން، 20:15 ގައި ކުޅޭ ދެ މެޗަށް ބަލާއިރު، ރޯޑް ރެކްރިއޭޝަން ކްލަބް ނުކުޅޭނީ އެމްއޭސީއެލްއާ އެވެ. އަދި ހަމަ އެ ވަގުތު، އެސްޓީއޯ އާއި މޯލްޑިވިއަން ބައްދަލުކުރާ މެޗު އޮންނާނެ އެވެ.