އުތުރު ގަޑުބަޑު އުފެއްދީ އުފާވެރި އަމާން ރާއްޖެއެއް ހޯދުމަށާއި އެކަން ފުރިހަމަކޮށް ދެއްވީ ރައީސް އިބްރާހިމް މުހައްމަދު ސޯލިހް ކަމަށް ފޮރިން މިނިސްޓަރު އަބްދުالله ޝާހިދު މިރޭ ވިދާޅުވެއްޖެ އެވެ.

އުތުރު ގަޑުބަޑަކީ 1943 ވަނަ އަހަރުގެ މާޗް މަހު ބޮޑު ތިލަންދުންމައްޗަށް ނިސްބަތްވާ އެތައް ހާސް ބަޔަކު ސަރުކާރާ މެދު ހިތްހަމަނުޖެހިގެން އޮޑިފަހަރުގައި މާލެ އެރި ހާދިސާ އެވެ. އެ ހާދިސާއަށްފަހު ގިނަ ބަޔަކު ހައްޔަރުކޮށް އެތައް ބަޔަކު ބަންދުކޮށް އަދި އަރުވާލި އެވެ.

ހަނިމާދޫގައި މިރޭ ބޭއްވި ޖަލްސާގައި ޝާހިދު ވިދާޅުވީ އުތުރު ގަޑުބަޑު ފެށިގެން އައީ އަތޮޅު ތެރޭގެ ރައްޔިތުން ނަޖިސް ފެނުން ފެންވަރައިގެން އުޅެން ޖެހި އުޅެންޖެހުނު ހާލުގެ ސަބަބުން ކަމަށެވެ. އޭރު އެ ދަތުރު ފެށުނީ އުފާވެރި އަމާން ރާއްޖެ ހޯދުމަށް ކަމަށާއި ނަމަވެސް އޭރުގެ ސަރުކާރުން އެ މީހުންނަށް ދިނީ އަދަބު ކަމަށް ޝާހިދު ވިދާޅުވިއެވެ. އަދި އޭގެ 75 އަހަރުން އެއްވެސް ރަށެއް ތަފާތު ކުރުމެއް ނެތި އެކަންކަމަށް ހައްލު ހޯދައި ދެއްވީ ރައީސް އިބްރާހިމް މުހައްމަދު ސޯލިހް ކަމަށް ޝާހިދު ވިދާޅުވިއެވެ.

"އުފާވެރި އަމާން ރާއްޖެއަކަށް ދާން މި ބޮޑު ތިލަދުންމަތީގައި ގައިމު ވެސް އެކަކަށް ވެސް ނުވެ އޮތް ކަމެއް. ގައިމު ވެރިކަން ވެސް 75 އަހަރު ތެރޭގައި ބޭބޭފުޅުން ކުރައްވައިފިތާ. ވިޝަން އާއި މިޝަން ވެސް މި ހުރިހާ ހުރެއްޖެތާ. ނުތްވޭ. ހިސާބާއި ކިތާބު ވެސް ދިމަލެއް ނުތްވޭ." ޝާހިދު ވިދާޅުވި އެވެ.

ޝާހިދު ވިދާޅުވީ މި ސަރުކާރުގައި 141 ރަށުގައި ފެނާއި ނަރުދަމާގެ މަސައްކަތް މިހާރު ކުރިއަށް ދާއިރު އަދި 150 އަށް ވުރެ ގިނަ ރަށުގައި ބަނދަރު ހަދަމުންދާއިރު ރަށެއްގައި ކަރަންޓާ ގުޅޭ އެތައް މަޝްރޫއުއެއް މިހާރު ހިނގަމުންދާ ކަމަށާއި އަދި އެތައް ހާސް ބަޔަކު ހިލޭ ޑިގްރީއަށް ކިޔަވަމުންދާ ކަމަށް އޭނާ ވިދާޅުވި އެވެ.

"ރައްޔިތުން ނިކުމެވަޑައިގެން އަމިއްލަ ނަފްސާ ސުވާލު ކުރައްވާ. ތިމަންނަގެ ކާފަ އުޅުނީ ކޮން ހާލެއްގައިތޯ. ތިމަންނަގެ ބައްޕަ އުޅުނީ ކޮން ހާލަތެއްގައިތޯ. ތިމަން މިހާރު މި އުޅެނީ ކޮން ހާލަތެއްގައިތޯ. ތިމަންނަގެ ދަރިފުޅު ނަޖިސް ފެނުން ފެންވަރާނެތޯ. ނޫން." ޝާހިދު ވިދާޅުވި އެވެ.

"ރައީސް އިބްރާހިމް މުހައްމަދު ސޯލިހް ހިކުމަތު އަމަލީގެ ސަބަބުން މި ރާއްޖޭގައި ނަޖިސް ފެނުން ފެންވަރާނެ މީހުންނެއް ދެނެއް ނުތިބޭނެ." ޝާހިދު ވިދާޅުވި އެވެ.

ހަނިމާދޫގައި ތަރައްގީ ކުރަމުންދާ އެއާޕޯޓަށް އިޝާރާތް ކުރައްވައި ޝާހިދު ވިދާޅުވީ ކުރިއަށް އޮތް ތަނުގައި ލަންޑަނުން ފުރާ މީހާގެ ޖީބުގައި އޮންނަ ޓިކެޓްގައި އޮންނާނީ ހަނިމާދޫ އެއާޕޯޓްގެ ނަން ކަމަށެވެ.