ރޯޑް ޑިވޮލޮޕްމަންޓް ކޯޕަރޭޝަން (އާރުޑީސީ) ގެ ޗީފް ފައިނޭންޝަލް އޮފިސަރު ޔާސިރު ހަސަންއާ ގުޅޭ ގޮތުން ދޮގު ހަބަރުތަކެއް ފަތުރާފައިވާ ކަމަށް ބުނެ ދެ ނޫހަކާއި ދެކޮޅަށް ދައުވާކޮށްފިއެވެ.

ޔާސިރު ޓްވިޓާގައި އިނގިރޭސި ބަހުން އާއްމުކުރި ބަޔާނެއްގައި ބުނީ އޭނާ އާރްޑީސީން ވައްކަންކުރި ކަމަށް ތުހުމަތުކޮށް ބައެއް މީޑިއާތަކާއި އޮންލައިން ޕްލެޓްފޯމްތަކުގައި ފަތުރަމުންދަނީ ދޮގު މައުލޫމާތުތަކެއް ކަމަށެވެ. ގައިރު ގާނޫނީ އެއްވެސް ޢަމަލެއް ހިންގުމުގެ ތުހުމަތުތައްވެސް އޭނާ ދޮގުކުރާ ކަމަށެވެ.

ޔާސިރު ސިފަކުރެއްވި ގޮތުގައި އެ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެކެވެ. އެއީ އެ ކުންފުނީގެ އަގު ވައްޓާލައި، ކްލައިންޓުންނާއި، މުވައްޒަފުންނާއި، ޕާޓްނަރުންނާ ދޭތެރޭގައި ޒަމާނުއްސުރެ އުފެދިފައިވާ އިތުބާރު ގެއްލުވާލުމަށް ކުރާ ކަމެއް ކަމަށް ވިދާޅުވިއެވެ.

އަދި އެފަދަ އެއްވެސް އަމަލަކީ ބަލައިގަނެވޭނެ ކަމެއް ނޫން ކަމަށާއި ހައްގުތައް ހިމާޔަތްކޮށް، ކުންފުނީގެ ނަން ދިފާއުކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށް ވިދާޅުވިއެވެ.

""ދިޔަރެސް" އާއި "މިހާރު" އާ ދެކޮޅަށް އަބުރުގެ ދައުވާ ކުރީ ދޮގު އަދި ސައްހަ ނޫން ހަބަރު ފެތުރުމުގެ ސަބަބުންކަން އަޅުގަނޑު ތިޔަބޭފުޅުންނަށް ދަންނަވަން" ދައުވާކުރަން ނިންމި ސަބަބު ބަޔާންކޮށްދެމުން ވިދާޅުވިއެވެ.

އޭނާ ވިދާޅުވީ ފައިނޭންޝަލް ޕޮލިސީތަކަކީ، 2020 ވަނަ އަހަރުން ފެށިގެން، އެކައުންޓިންގެ އެންމެ މަތީ މިންގަނޑުތަކާއި ގަވާއިދުތަކަށް އެއްގޮތަށް އަމަލުކުރަމުން އަންނަ ސިޔާސަތުތަކެއް ކަމަށާއި މިއަދާ ހަމައަށްވެސް އެއްވެސް މައްސަލައެއް، ސަމާލުކަމަށް އައިސްފައި ނުވާ ކަމަށެވެ.

ނަގުދު ފައިސާ ދެއްކުން ފަދަ ހުރިހާ މުއާމަލާތްތަކަކީ ކުންފުނީގެ ސިޔާސަތުތަކާ އެއްގޮތަށް ވަރަށް ރަނގަޅަށް ޕްރޮސެސްކޮށް، ގޮތުގެ މަތިން ރަނގަޅަށް ލިޔެވިފައިވާ މުއާމަލާތްތަކެއް ކަމަށް ވިދާޅުވިއެވެ.

ކުންފުނީގެ ސީއެފްއޯގެ ހައިސިއްޔަތުން، އީއާރްޕީ ނުވަތަ އެއްވެސް ބޭންކަކުން އެއްވެސް ފައިސާއެއް ދައްކަން ފެށުމުގެ ބާރު ނޯއްނާނެ ކަމަށާއި ނަގުދު ފައިސާ ދެއްކުމުގެ ހުރިހާ ފައިސާއެއް ޒިންމާދާރުކަމާ އެކީގައި ބެލެހެއްޓީ ކަނޑައެޅިފައިވާ މުވައްޒަފުން ކަމަށާއި، ފާއިތުވި ތިން އަހަރު ވެސް އަމިއްލަ އެކައުންޓަށް އެއްވެސް ފައިސާއެއް ޖަމާކޮށްފައި ނުވާކަމުގެ ޔަގީންކަން ޔާސިރު ދެއްވިއެވެ.