މީގެ ފަސް އަހަރު ކުރިން 2018 ވަނަ އަހަރުގެ ރިޔާސީ އިންތިހާބުގައި ވެވަޑައިގެންނެވި ވައުދުތަކުގެ ތެރެއިން 90 ޕަސެންޓް ފުރިހަމަ ކުރެއްވިއްޖެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ކ. ގުރައިދޫ ދާއިރާގައި ހިމެނޭ ތިން ރަށަށް ކުރައްވާ ދަތުރުފުޅުގެ، އެންމެ ފަހު މަންޒިލް، މާފުށްޓަށް ވަޑައިގެން އެ ރަށުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ ސަރުކާރުން ވެވަޑައިގެންނެވި ވައުދުތައް ފުއްދުމުގައި ހުރަސްތަކެއް ކުރިމަތިވެވަޑައިގެންނެވި ކަމަށެވެ. ކޮވިޑު19ގެ ރޯގާގައި މުޅި ރާއްޖެ ބަންދުކޮށް، އިގްތިސާދު ހުއްޓުނުކަން ފާހަގަ ކުރައްވައި ރައީސް ވިދާޅުވީ އެ ގޮންޖެހުންތަކުން އަރައިގަނެ، ވައުދުތައް ފުއްދަމުން ގެންދާ ކަަމަށް ރައީސް ވިދާޅުވިއެވެ.

[caption id="attachment_55126" align="alignnone" width="1620"] ކ. މާފުށީގައި ގުޅިފައިވާ ޕާޓީތަކުން ބާއްވާ ޖަލްސާ-- ފޮޓޯ/ އެމްޑީޕީ[/caption]

"އިރާދަ ކުރެއްވީތީ މާފުށްޓަށާއި ރާއްޖޭގެ އެކި ރަށްރަށަށް އަޅުގަނޑުމެން ވީ ވައުދުތަކުގެ 90 ޕަސެންޓް ހިނގަމުން ނޫނީ ނިމިފަ މިހާރު ހުރީ. ހާއްސަކޮށް ރިޔާސީ ވައުދުތަކުގެ ގޮތުގައި މިރަށަށް ވީ ވައުދުތައް ގާތްގަނޑަކަށް ހުރިހާ މަސައްކަތެއް ނިމުމަގާ ހިސާބަކަށް ހިނގައްޖެ،" ރައީސް ވިދާޅުވިއެވެ.

ރައީސް ވިދާޅުވީ މި ދައުރު ނިމޭއިރު، ފެނާއި ނަރުދަމާގެ ނިޒާމު ނިންމާލެވޭނެ ކަމަށެވެ.

ގެސްޓް ހައުސް ވިޔަފާރި ރާއްޖޭގައި އެންމެ ކާމިޔާބު އެއް ރަށް، ކ. މާފުށީގައި މިއަދު ވެސް 800 އަށް ވުރެ ގިނަ ޓޫރިސްޓުން ތިބި ކަމަށް ފާހަގަ ކުރައްވައި ރައީސް ވިދާޅުވީ، މާފުށިން ފެންނަނީ އިގްތިސާދު ހަމައަކަށް އެޅޭ މަންޒަރު ކަމަށެވެ.

ރިޔާސީ އިންތިހާބުގައި މާފުށްޓަށް ވެވަޑައިގެންނެވި ވައުދުތައް ފުރިހަމަވެފައިވާ ކަމަށް ފާހަގަ ކުރައްވައި ރައީސް ވިދާލުވީ އެ ރަށަށް ބިމެއް އިތުރުކޮށްފައިވާ ކަމަށާއި އަދި ޕިކްނިކް އައިލެންޑެއް ތަރައްގީކޮށްފައިވާ ކަމަށެވެ. އަދި ބަނދަރުގެ ދަތިކަން ވެސް ހައްލުކޮށްދެއްވާފައިވާ ކަމަށާއި ސިއްހީ މަރުކަޒު ހޮސްޕިޓަލަކަށް ބަދަލުކޮށް، ހިދުމަތްތައް ފުޅާކޮށްފައިވާ ކަމަށް ރައީސް ވިދާޅުވިއެވެ.

މާފުށްޓަށް އާ ވައުދުތަކެއް:

މާފުށީގެ ބޮޑެތި މަގުތައް ހެދުން
ފެރީ ޓާމިނަލަކާއި އެރައިވަން ޓާމިނަލެއް
ހިއްކި ބިމުގައި ފެނާއި ނަރުދަމާ ގާއިމުކުރާނެ ކަމަށް
މާފުށީ ހޮސްޕިޓަލްގެ ހިދުމަތްތައް ރަނގަޅުކުރާނެ ކަމަށް