ރާއްޖޭގެ ފުޓްބޯޅައިގެ ފެންވަރު ދަށްވެ، ފުޓްބޯޅައަށް ދިވެހިން ކުރާ އުންމީދު ފަނޑުވަމުންދާތީ، ދިވެހި ފުޓްބޯޅަ އަލުން ކޮޅަށް ޖެހުމަށް ހިންގާ ހަރަކާތުގެ ފުރަތަމަ ބައްދަލުވުން ބާއްވައި، އެ މަސައްކަތް ކުރިއަށް ގެންދާނެ ވަގުތީ ކޮމެޓީއެއް ނަގައިފިއެވެ.

ފުރަތަމަ ފަހަރަށް ސާފް ޗެމްޕިއަންޝިޕްގެ ގްރޫޕް ސްޓޭޖުން ރާއްޖެ ކެޓުމާ ގުޅިގެން، ފުޓްބޯޅައަށް ލޯބި ކުރާ ފަރާތްތަކުން އިސް ނަގައިގެން ފެށި ކެމްޕޭނަކީ "ސޭވް އެފްއޭއެމް"އެވެ. މި ހަރަކާތް އިސްވެ، ހިންގަނީ އިބްރާހިމް އާމިރު (ސަލްސާ އާމިރު) އެވެ.

"ހަތާވީސް"އާ ވާހަކަ ދައްކަވަމުން އާމިރު ވިދާޅުވީ ބައްދަލުވުމަށް ހާޒިރުވި ފަރާތްތަކުގެ މަޝްވަރާއަށްފަހު ހަތް މެމްބަރުންގެ ކޮމެޓީއެއް ނަގައި، ސިލްސިލާ އެފަދަ ބައްދަލުވުންތަކެއް ބޭއްވުމަށް ނިންމާފައިވާ ކަމަށެވެ. މި މަސައްކަތް ފަށާފައި ވަނީ "ފުޓްބޯޅައިގެ ލޯބީގައި" މަސައްކަތް ކުރާ ފަރާތްތަކުގެ އިސް ނެގުމާ އެކުގައި ކަމަށް އާމިރު ވިދާޅުވިއެވެ.

"ފުޓްބޯޅަ މިހާރު އޮތް ހާލަތުން އެހެން ހާލަތަކަށް ގެންދިއުމަށްޓަކާ އަޅުގަނޑުމެން ކުރަންޖެހޭ ވަރަށް ބައިވަރު މަސައްކަތް އެބަހުރި. މިއީ އެއް ދުވަހުން ދެ ދުވަހުން ނިމޭނެ ކަންތައްތަކެއް ނޫން ކަމަށް އެންމެންނަށް ވެސް ގަބޫލު ކުރެވިގެން ފުޓްބޯޅައިގެ ލޯބީގައި މަސައްކަތް ކުރާ ފަރާތްތަކުން އެއްބާރުލުން ދީގެން މި ފެށީ މި މަސައްކަތް،" އާމިރު ވިދާޅުވިއެވެ.

[caption id="attachment_54850" align="alignnone" width="1024"] "ސޭވް އެފްއޭއެމް"ގެ ނަމުގައި ދިވެހި ފުޓްބޯޅައަށް ލޯބިކުރާ ބަޔަކު އިސް ނަގައިގެން ޝީ ބިލްޑިންގައި ރޭ ބޭއްވި ހަރަކާތުގެ ތެރެއިން: ދިވެހި ފުޓްބޯޅަ މިހާރު އޮތް ހާލަތާ ގުޅޭ ގޮތުން ކަންބޮޑުވުން ފާޅުކުރި-- ހަތާވީސް ފޮޓޯ/ ޙުސައިން ޙަސަން[/caption]

ޝީ ބިލްޑިންގައި ރޭ ބޭއްވި ބައްދަލުވުމުގައި ފުރަތަމަ ޑިވިޝަންގައި ކުޅޭ އެއްވެސް ޓީމަކުން އެ ބައްދަލުވުމުގައި ބައިވެރިވެފައެއް ނުވެއެވެ.

"ސޭވް އެފްއޭއެމް" ހަރަކާތް ހިންގުމަށް ނެގި ވަގުތީ ކޮމެޓީގައި ހިމެނިވަޑައިގަންނަވަނީ އިމާދު ލަތީފާއި އަމީޒާއި ނާޝިދާއި ސޮބާ އާއި އާއިދާ އާއި އަޒްމީނުގެ އިތުރުން ހާނިމްއެވެ.

ރޭގެ ބައްދަލުވުމުގައި ފުރަތަމަ ޑިވިޝަންގެ އެއްވެސް ކްލަބަކުން ބައިވެރިވެފައި ނުވާތޫ އެކަމާ ގުޅޭ ގޮތުން އެ ބައްދަލުވުމަށް ހާޒިރުވި ބައެއް ފަރާތްތަކުން ވަނީ ކަންބޮޑުވުން ފާޅުކޮށް ވާހަކަ ދައްކާފައެވެ. ދިވެހި ފުޓްބޯޅައިގެ މީހާރު އޮތް ހާލަތާ މެދު އެ ކްލަބުތަކުން "ވަރިހަމަ" ވީތޯ ބައެއް ބޭފުޅުން ސުވާލު އުފެއްދެވިއެވެ.

[caption id="attachment_54865" align="alignnone" width="1024"] "ސޭވް އެފްއޭއެމް" ހަރަކާތް ހިންގުމަށް ނެގި ވަގުތީ ކޮމެޓީގެ މެމްބަރުން: މީޑިއާތަކުން ދިވެހި ފުޓްބޯޅަ މިހާރު އޮތް ހާލަތު މިއަށް ވުރެ ބޮޑަށް ކިޔައިދިނުމަށް ގޮވާލާފައިވޭ-- ހަތާވީސް ފޮޓޯ/ ޙުސައިން ޙަސަން[/caption]

އެކަމާ ގުޅޭ ގޮތުން އެ ބައްދަލުވުމުގައި މަޝްވަރާ ކުރެވުނީ އެ ކްލަބުތަކާ އެކު "ސޭވް އެފްއޭއެމް"އިން ބައްދަލުކޮށް، މަޝްވަރާ ކުރުމަށެވެ.

މިރޭ ބޭއްވި ބައްދަލުވުމުގައި ރާއްޖޭގެ އަތޮޅުތައް ތަމްސީލުވާ ގޮތަށް، އެފަދަ ބައްދަލުވުމެއް ބާއްވަން ވެސް މަޝްވަރާކުރިއެވެ.