ފުލުހުން ހާމަކޮށްފައިވާ ތަފާސް ހިސާބުތައް ދައްކާ ގޮތުން މި އަހަރުގެ ފުރަތަމަ ކުއާޓާގައި ފުލުހުންނަށް 3508 މައްސަލައެއް ރިޕޯޓްކޮށްފައިވެއެވެ. އޭގެ ތެރެއިން 2520 މައްސަލަ ރިޕޯޓްކޮށްފައިވަނީ މާލެ ސިޓީންނެވެ. އައްޑޫ ސިޓީން 117 މައްސަލަ ފުވައްމުލަކު ސިޓީން 113 އަދި ކުޅުދުއްފުށި ސިޓީން 59 މައްސަލައެއްް ފުލުހުންނަށް ރިޕޯޓްކޮށްފައިވެއެވެ. އޭގެ ތެރެއިން 949 މައްސަލައެއް ފުލުހުން ކެޓަގަރީ ކޮށްފައިވަނީ "އަދާސް" މައްސަލަތަކުގެ ގޮތުގައެވެ.

882 މައްސަލަ އަކީ ވައްކަމާއި ގުޅުންހުރި މައްސަލަތަކަސްވާއިރު 461 މައްސަލައަކީ މަސްތުވާތަކެތީގެ މައްސަލަތަކެވެ. ފުލުހުން ބުނީ 2520 މައްސަލަތަކުގެ ތެރެއިން 1034 މައްސަލައެއް ބަލައި ނިންމާފައިވާ ކަމަށެވެ. މި މައްސަލަތަކުގެ ތެރެއިން 113 މައްސަަލައެއްގައި ދައުވާކޮށްދޭން ޕީޖީ އޮފީހަށް ހުށަހަޅާފައިވާ ކަމަށް ފުލުހުން މައުލޫމާތުދެއެވެ.

ފުލުހުން އާންމުކޮށްފައިވާ ތަފާސްހިސާބުތައް ދައްކާގޮތުން މި އަހަރުގެ ފުރަތަމަ ކުއާޓާގައި ގެވެށި އަނިޔާގެ 146 މައްސަލައެެއް ރިޕޯޓްކޮށްފައިވެއެވެ. 57 މައްސަލައެއް ބަލަމުންދާއިރު އޭގެ ތެރެއިން 13 މައްސަލައެއް ވަނީ މިހާތަނަށް ބަލައި ނިމިފައެވެ. އެ މައްސަލަތަކުގައި ދެ މީހަކު ފުލުހުންގެ ހައްޔަށް ގެންދިޔައެވެ.

އެކަމަކު އެއްވެސް މީހަކަށް މިހާތަނަށް ދައުވާކޮށްފައެއް ނުވެއެވެ. މި އަހަރުގެ ފުރަތަމަ ކުއާޓާގައި ޖިންސީގޯނާގެ 119 މައްސަލައެއް ރިޕޯޓްކޮށްފައިވާއިރު 69 މައްސަލައެއް ވަނީ ބަލަމުންދާއިރު ފަސް މައްސަަލައެއް ނިންމާފައިވާ ކަމަށް ފުލުހުން ބުންޏެވެ. އެ މައްސަލަތަކުގައި 22 މީހަކު ހައްޔަރުކޮށްފައިވީނަމަވެސް އެއްވެސް މީހަކަށް ދައުވާކުރަން ފޮނުވާފައެއް ނުވެއެވެ.

ފުލުހުން އާއްމުކޮށްފައިވާ ތަފާސް ހިސާބުތައް ދައްކާ ގޮތުން ފުރަތަމަ ކުއާޓާގައި ވައްކަމުގެ މައްސަލަ އެންމެ ގިނައިން ރިޕޯޓްކޮށްފައިވަނީ މާލެ ސިޓީންނެވެ. އެންމެ ގިނައިން ރިޕޯޓްކޮށްފައިވަނީ އުޅަނދުތައް ގެއްލިގެންނެވެ. އެކަމަކު ކޮން ކަހަލަ އުޅަނދުތަކެއް ކަމެއް ފުލުހުން ހާމަކޮށްފައެއް ނުވެއެވެ. ދެވަނަ އަށް އެންމެ ގިނައިން ރިޕޯޓްކޮށްފައިވަނީ މޯބައިލް ފޯނެވެ. ދެން އެންމެ ގިނައިން ރިޕޯޓްކޮށްފައިވަނީ ފައިސާ ގެއްލިގެންނެވެ.