ޓެރަރިޒަމްގެ ނުރައްކާ އޮތުމުން ނެރޭ ޓްރެވަލް އެޑްވައިޒަރީ ލިސްޓް ނެރުނީ ރާއްޖެއަށް ވަކިން ހާއްސަކޮށްގެން ނޫންކަމަށް އިނގިރޭސިވިލާތުން ރާއްޖެއަށް ކަނޑައަޅާފައިވާ ސަފީރު ކެރޮން ރޮސްލާ ވިދާޅުވެއްޖެއެވެ.

އިނގިރޭސިވިލާތުގެ ސަރުކާރުން މި މަހުގެ 22 ވަނަ ދުވަހު ވަނީ ރާއްޖެ ހިމެނޭހެން މި ސަރަހައްދުގެ ބައެއް ގައުމުތަކަށް ދަތުރު ކުރުމާ ގުޅޭގޮތުން އެޑްވައިޒަރީއެއް ނެރެފައެވެ. އެގޮތުން ގްލޯބަލް ޓެރަރިޒަމްގެ ނުރައްކާ އޮތުމުން ރާއްޖޭގެ އިތުރުން އިންޑިއާ އަދި ސްރީ ލަންކާ އަށް ވެސް އެ ދުވަހު އެޑްވައިޒަރީ ނެރުނެވެ.

އެކަމާ ވިދިގެން ރާއްޖޭގެ ބައެއް ނޫސްތަކުން އެ ޙަބަރު ގެނެސްދިނުމުގައި، އެ އެޑްވައިޒަރީ އަކީ ރާއްޖެއަށް ހާއްސަކޮށްގެން ނެރުނު އެޑްވައިޒަރީއެއް ގޮތަށް ވަނީ ސިފަކޮށްފައެވެ. އެކަމާ ގުޅިގެން އިގިރޭސިވިލާތުން ރާއްޖެއަށް ކަނޑައަޅާފައިވާ ސަފީރު ކެރޮން ރޮސްލާ މިއަދު ކުރެއްވި ޓްވީޓެއްގައި ވަނީ އެކަން ރާއްޖޭގެ ނޫސްތަކުން ރިޕޯޓް ކުރީ ގޯސްކޮށް ކަމަށް ވިދާޅުވެފައެވެ.

https://twitter.com/caron_rohsler/status/1674412190294736897?s=46&t=M9M5hUKhSMLW6TzFVtCYOQ

"އިނގިރޭސި ސަރުކާރުން މުޅި ދުނިޔޭގެ އެޑްވައިޒަރީ ލިސްޓް މި މަހުގެ 22 ވަނަ ދުވަހު ވަނީ އަދާހަމަ ކޮށްފައި. މިއީ ހަމައެކަނި ރާއްޖެއަށް ހާއްސަކޮށްގެން ނެރުނު އެޑްވައިޒަރީއެއް ނޫން. ލޯކަލް ނޫސްތަކުގައި އެ ޙަބަރު ގެނެސްދީފައި އޮތީ ގޯސްކޮށް." ރޮސްލާ ވިދާޅުވިއެވެ.

އިނގިރޭސިވިލާތުން ރާއްޖެ ހިމަނައިގެން ޓްރެވަލް އެޑްވައިޒަރީއެއް ނެރުނުތާ މާގިނައިރުތަކެއް ނުވަނީސް އެމެރިކާއިންވެސް ވަނީ ރާއްޖެއަށް ދަތުރުކުރުމުގައި އިތުރަށް ސަމާލުވާން ޖެހޭކަމަށް އަންގާ ލެވެލް މަތިކޮށްފައެވެ.

އެގޮތުން އެމެރިކާގެ ޓްރެވެލް އެޑްވައިޒަރީސް ވެބްސައިޓުގައިވާ ގޮތުން މިދިޔަ ހުކުރު ދުވަހު ވަނީ ރާއްޖެ އާއި އިންޑިއާ އަދި ލަންކާއަށް ދަތުރުކުރުމަށް ނެރެފައިވާ އެލާޓް، ލެވެލް 2 އަށް އަރައިފަ އެވެ. އެއީ އިތުރަށް ރައްކާތެރިވުމަށް ނެރުނު ލެވެލް އެވެ.

އެ ވެބްސައިޓުގައި ވާގޮތުން ރާއްޖޭގެ ލެވެލް މަތިކޮށްފައިވަނީ ޓެރަރިޒަމްގެ ހަމަލާއެއް ލިބިދާނެކަމަށް ބަލައިފައެވެ. އަދި ރާއްޖެއައިސް އުޅޭއިރު، ފަތުރުވެރިން އާއްމުކޮށް ގޮސް ނޫޅޭ ތަންތަނަށް ދިއުމުގައި ސަމާލުވުމަށާއި، އަބަދުވެސް ހާލަތަކަށް ތައްޔާރުވެ ތިބުމަށާއި، ކަމެއް ގޯސްކޮށްވާހެން ހީވާނަމަ ކަމާ ބެހޭ ފަރާތްތަކަށް އެކަން ވީހާވެސް އަވަހަކަށް އެންގުމަށް ވަނީ އިލްތިމާސްކޮށްފައެވެ.

އެމެރިކާ ރައްޔިތުން ދަތުރުކުރުމަށް ހަތަރު ލެވެލްއެއްގެ އެލާޓް ނެރެ އެވެ. އެއީ، ދަތުރުކުރުމަށް ރައްކާތެރި ގައުމުތަކަށް ނެރޭ ލެވެލް 1 ގެ އެލާޓް އަދި އިތުރަށް ސަމާލުކަން ދޭންޖެހޭ ގައުމުތަކަށް ނެރޭ ލެވެލް 2، އެ ގައުމަކަށް ދަތުރުކުރުމާ މެދު އަލުން ވިސްނާލަންޖެހޭ ލެވެލް 3 ގެ އެލާޓް އަދި ދަތުރުކުރުން މަނާކަން އަންގައިދޭ ހަތަރު ވަނަ ލެވެލް އެވެ..