އިންޑިއާގެ ބެންގަލޫރުގައި ކުރިއަށްދާ ސާފް ޗެމްޕިއަންޝިޕުގެ ގުރޫޕް ސްޓޭޖުގެ ފަހު މެޗުގައި ކުވައިތުކޮޅަށް ލަނޑު ޖަހައި އިންޑިއާގެ ކެޕްޓަން ސުނިލް ޗެތުރީ ސާފު މުބާރާތުގައި ރާއްޖޭގެ އަލީ އަޝްފާގު ހަދާފައިވާ ގޯލު ރެކޯޑާ އަރައި ހަމަކުރި މެޗު އެއްވަރުވެގެން ނިމިއްޖެއެވެ.

ބެންގަލޫރުގެ ސްރީ ކަންތީރަވާ ސްޓޭޑިއަމުގައި މިރޭ ކުޅުނު މެޗު ނިމުނީ 1-1 ގެ ނަތީޖާއަކުންނެވެ. މި ނަތީޖާއާއެކު ކުވައިތު ވަނީ ގުރޫޕު އޭގެ އެއްވަނައިގެ ގޮތުގައި ސެމީފައިނަލަށް ދަތުރު ކޮށްފައެވެ. އިންޑިއާއިން ވެސް ކުރިން ކުޅުނު ދެ މެޗުން މޮޅުވެފައިވާ އިރު، ދެވަނައަށް ދިޔައީ ލަނޑުގެ ތަފާތުންނެވެ.

ގިނަ ސަޕޯޓަރުންތަކެއްގެ ކުރިމަތީގައި މިރޭ އިންޑިއާއިން އަމިއްލ ގައުމުގައި ކުޅުނު އެ މެޗު ފަށައިގެން ވެސް މޮޅަށް ކުޅެ ގިނަ ހަމަލާތަކެއް އުފެއްދިއެވެ. އެގޮތުން ހަތަރުވަނަ މިނަޓުގައި އަކާޝް މިޝްރާ ރީތި ހުރަހެއް އަރިމަތިން ނަގައިދިން އިރު، ޗެތުރީގެ ފައިގައި ބޯޅަ ލައްވާލައި ގޮތެއް ނުވިއެވެ.

[caption id="attachment_54173" align="alignnone" width="2560"] އިންޑިއާއާއި ކުވައިތު ބައްދަލު ކުރި މެޗުގެ ތެރެއިން: އެ މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެން -- ފޮޓޯ:މުހައްމަދު އަފްރާހް/ހަތާވީސް[/caption]

އޭގެ ފަހުން ވެސް އިންޑިއާއިން ލިބޭ ފުރުސަތުތަކުގައި ކުވައިތުގެ ޑިފެންސަށް ބާރުބޮޑު ކުރަމުން ދިޔައިރު، ކުވައިތުން ވެސް ވަނީ ރަނގަޅު ދެ ހަމަލާއެއް އުފައްދައިފައެވެ. އެގޮތުން ޝަބައިބް އަލްޙާލިދީ ދުރުން ފޮނުވާލި ހަމަލާއެއް ގޯލު ހުރަސްދަނޑިމަތިން ބޭރަށް ދިޔައިރު، މުޅިން ހުސްކޮށްހުރެ މުހައްމަދު އަބްދުﷲ ގޯލު ކުރިމަތިން ފޮނުވާލި ބޯޅަ ވެސް ދިޔައީ އަރިމަތިން ބޭރަށެވެ.

އިންޑިއާއިން މެޗުގައި ގޯލު ޖެހީ ފުރަތަމަ ހާފުގެ އިތުރުވަގުތުގައެވެ. އެ ޓީމަށް ލިބުނު ކޯނަރެއްގައި ޗެތުރީ ގޯލު ޖެހީ ހިތްގައިމު ވޮލީ ކިކް ގޯލަކުންނެވެ. މިއީ އޭނާ މިފަހަރުގެ މުބާރާތުގައި ޖެހި ފަސްވަނަ ގޯލެވެ.

ޗެތުރީގެ މި ގޯލާއެކު އޭނާ ވެގެން ގޮސްފައިވަނީ މި މުބާރާތުގެ ތާރީހުގައި ވެސް އެންމެ ގިނަ ލަނޑު ޖެހި ކުޅުންތެރިޔާއަށެވެ. 23 ގޯލާއެކު ޗެތުރީ އެއްވަނައިގައި އޮތީ އަލީ އަޝްފާގު ވެސް ޖަހާފައިވާ 23 ގޯލާއެކު އެވެ.

ދެވަނަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނުނު އިރު، ކުވައިތުން ވަނީ ޓީމު ކުރިއަށް ޖައްސައިގެން ކުޅެ ގޯލެއް ޖެހުމަށް މަސައްކަތް ކޮށްފައެވެ. އެހެން ނަމަވެސް އިންޑިއާ ޑިފެންސްގެ މޮޅު ކުޅުމާއެކު ކުވައިތަށް ލަނޑެއް ޖަހަން އުނދަގޫތަކެއް ދިމާވި އިރު، މެޗުގެ ދެވަނަ ހާފު ވަރަށް ހޫނުވެފައެވެ. އެގޮތުން އިންޑިއާގެ ކޯޗު އައިގޯ ސްޓިމަކްއަށް ވަނީ ރަތް ކާޑު ދައްކައިފައެެވެ. މިއީ އޭނާއަށް މިފަހަރުގެ މުބާރާތުގައި ދެއްކި ދެވަނަ ރަތްކާޑެވެ. މީގެ އިތުރުން ވެސް އިންޑިއާ އަދި ކުވައިތުގެ ކުޅުންތެރިއަކަަށް މެޗުގައި ވަނީ ރަތްކާޑު ދައްކައިފައެވެ.

[caption id="attachment_54174" align="alignnone" width="2560"] އިންޑިއާއާއި ކުވައިތު ބައްދަލު ކުރި މެޗުގެ ތެރެއިން: އެ މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެން -- ފޮޓޯ:މުހައްމަދު އަފްރާހް/ހަތާވީސް[/caption]

އިންޑިއާއިން މޮޅަކާއެކު އެއްވަނައިގައިި ސެމީއަށް ދެވޭނެ ކަމުގެ އުންމީދުގައި ތިއްބާ، މެޗުގެ އިތުރުވަގުތު ވަނީ އެ ޓީމުގެ ޑިފެންޑަރު އަންވަރު އަލީގެ ފައިގައި ޖެހި ބައިކޮޅަށް ގޯލެއް ވަދެފައެވެ.

މީގެ 13 އަހަރު ކުރިން މި ދެ ޓީމު ފުރަތަމަ ބައްދަލު ކުރި މެޗުން ކުވައިތު ކުރި ހޯދީ 1-9 ގެ ބޮޑު ނަތީޖާއަކުންނެވެ. އެހެން ނަމަވެސް އެ ފަހުން އިންޑިއާއިން ފުޓުބޯޅައިގައި ބޮޑެތި ކުރިއެރުންތަކެއް ހޯދާފައިވާ އިރު، އިންޑިއާއިން އެންމެ ފަހުން ކުޅުނު ނުވަ މެޗުވެސް މިވަނީ ކާމިޔާބުކޮށްފައެވެ.