ސޯޝަލް މީޑިއާގައި އާންމުވި ވީޑިއޯއިން ފެންނަ ޖަނަވާރަކީ "ބޮޑު ބުޅަލެއް" ކަމަށް އެ ހޯދުމުގެ މަސައްކަތް ކުރާ މީހުން ނިންމައިފިއެވެ.

އެމްއެންޑީއެފާއި ސިފައިންނާއި އެއާޕޯޓް ގުޅިގެން ހަތިޔާރާ އެކު، އެ ޖަނަވާރު ހޯދުމުގެ މަސައްކަތް ރޭގައި ވަނީ ކޮށްފައެވެ.

އެކަމުގެ މައުލޫމަތު އެނގޭ މީހަކު "ހަތާވީސް"އަށް ބުނީ ވީޑިއޯއިން ފެންނަނީ ބުޅަލެއް ކަމަށާއި އެ ޖަނަވާރު ބޮޑު ކަމަށް ދައްކަނީ ވީޑިއޯ ތިރިން ނަގާފައި އިނުމުން ކަމަށެވެ.

"ތަންކޮޅެއް ތިރިން، [ވީޑިއޯ] ނަގާފައި އިނުމުން ބޮޑު ކަމަށް ދައްކަނީ. ހިއްކާފައި އޮތް ތަނެއް ވީމަ، ބިންގަނޑު ހުދުކުލާގައި އޮވެ، ބުޅާ މާ ބޮޑަށް އެ ފެންނަނީ. އެއީ ދެން ބޮޑު ބުޅަލެއް. ތަންކޮޅެއް ހަށިގަނޑު ރަނގަޅު ބުޅަލެއް،" މާފަރު މީހަކު ބުންޏެވެ.

މާފަރުން ވާހަކަ ދެއްކި މީހާ ބުނީ އާންމުވި ވީޑިއޯ ނަގާފައިވާ ސަރަހައްދަށް ސިފައިން ގޮސް، އަލުން ވީޑިއޯއެއް ނަގާފައިވާ ކަމަށެވެ. އެއަށްފަހު ވީޑިއޯގެ އެނާލިސިސް ހަދައި، މާފަރު ކައުންސިލާ ހިއްސާކޮށްފައިވާ ކަމަށެވެ.

އަލުން ނެގި ވީޑިއޯ އެނާލިސިސްއިން ދައްކާ ގޮތުން އެ ސަރަހައްދުން އެ ފެންނަނީ "ހެޔޮވަރު ބުޅަލެއް" ދާތަނެވެ. އަދި އެއާޕޯޓް ރަންވޭ ބޮޑުކުރާތީ އެ ސަރަހައްދުގައި ނޮޅާފައިވާ ވިނަގަނޑުގެ ފަހަތަށް ވަދެ، އެ ބުޅާ ގެއްލޭތަން ވީޑިއޯއިން ފެންނާތީ، އެއީ ބޮޑު ޖަނަވާރެއް ކަމަށް ނުބެލެވޭ ކަމަށެވެ.

މާފަރުން ފެނުނު ބޮޑު ޖަނަވާރު ހޯދަން ހަތިޔާރާ އެކު، އިތުރު ސިފައިން ރޭގައި ވަނީ މާފަރަށް އަރާފައެވެ. ނަމަވެސް ވީޑިއޯއިން އެ ފެންނަނީ ބުޅަލެއް ކަމަށް ނިންމުމުން އެ ރަށަށް ދިޔަ ސިފައިންގެ ޓީމު ވަނީ އެ ރަށުން ފައިބާފައެވެ.

https://twitter.com/hathavees/status/1673329338698158085?s=20