މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރުމަށް ސަރުކާރުން ވަނީ މާލެ ސަރަހައްދުން 5،000 ގޯތި ދިނުމަށް އިއުލާނު ކޮށްފައެވެ. ސަރުކާރުން އެކަން އިއުލާނު ކުރުމުން ސަރުކާރާއި ހިޔާލު ތަފާތުވެފައި ތިއްބެވި އޭރު އެމްޑީޕީގެ ބައެއް މަޖިލިސް މެންބަރުންގެ ފާޑު ކިޔުންތައް ސަރުކާރަށް އަމާޒު ކުރިއެވެ. އެކަން ލަސްވެގެން ދިއުމުން މަޖިލިސް ތަޅުމުގައި އެތައް ފަހަރަކު ސަރުކާރަށް ފާޑު ވިދާޅުވަމުން ގެންދެވިއެވެ. އެފަދަ އެތައް ކަމަކާއި ގުޅިގެން މިއަދު އެ މެންބަރުން އެމްޑީޕީން ވަނީ ވަކިވެފައެވެ.

ރައީސް އިބްރާހީމް މުހައްމަދު ސޯލިހުގެ ވައުދުތަކުގެ ތެރޭގައި ބޯހިޔާވަހިކަމުގެ އެންމެ ބޮޑު އެއް ވައުދު ކަމަށްވާ، މާލޭގެ ރައްޔިތުންނަށް އިން ވަކިކޮށް ގޯތި ކެނޑުމުގެ ވައުދާއި ގުޅިގެން އިއްޔެ ހައުސިން މިނިސްޓްރީން ވަނީ މާލެ ސަރަހައްދުން ގޯއްޗަށް އެދި ހުށަހެޅި ފަރާތްތަކުގެ ތެރެއިން ގޯތި ލިބޭ މީހުންގެ ވަގުތީ ލިސްޓު އާއްމު ކޮށްފައެވެ.

މި ލިސްޓުގައި ސަރުކާރާއި ދެކޮޅު އަދި އެއްކޮޅު އެތައް މަޖިލިސް މެންބަރުންތަކަކަށް ގޯތި ވަނީ ލިބިފައެވެ. އެގޮތުން ޖުމްލަ 10 މަޖިލިސް މެންބަރެއްގެ ނަން ގޯތި ލިބޭ މީހުންގެ ވަގުތީ ލިސްޓުގައި އެބައޮތެވެ. މީގެތެރެއިން ދެ މެންބަރުން ފިޔަވާ އެހެން ހުރިހާ މެންބަރުންނަކީ މާލޭގެ އެކި ދާއިރާތަކަށް ނިސްބަތްވާ މަޖިލިސް މެންބަރުންނެވެ.

މާލެ ސަރަހައްދުން ގޯތި ލިބުނު މަޖިލިސް މެންބަރުން:

ހެންވޭރު ހުޅަނގު ދާއިރާގެ މެންބަރު ހަސަން ލަތީފް - (ދަ ޑިމޮކްރެޓްސް)
މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑޭ) - (ދަ ޑިމޮކްރެޓްސް)
މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) - (ދަ ޑިމޮކްރެޓްސް)
މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު (ބޯދިގު) - (ދަ ޑިމޮކްރެޓްސް)
މާފަންނު ހުޅަނގު ދާއިރާގެ މެންބަރު އިބްރާހީމް ފަލާހް - (އެމްޑީޕީ)
ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު - (އެމްޑީޕީ)
މައްޗަންގޯޅި ދެކުނު ދާއިރާގެ މެމްބަރު އަހުމަދު ހައިތަމް - (އެމްޑީޕީ)
އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި ފިރިކަލުން، ކިނބިދޫ ދާއިރާގެ މެމްބަރު މުހައްމަދު ނާޝިޒް - (އެމްޑީޕީ)
ވިލިމާލެ ދާއިރާގެ މެންބަރު އަހްމަދު އުޝާމް - (އެމްއެންޕީ)

މި ބޭފުޅުންގެ އިތުރުން ވެސް އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑޭ)ގެ އަނބިކަނބަލުންނާއެކު ޖޮއިންޓުކޮށް ފޯމު ހުށަހެޅުއްވި އާއިލީ ތިން ބޭފުޅަކަށް ވަނީ ގޯތި ލިބިފައެވެ. އަދި އެމްއެމްޕީއާރްސީ މައްސަލާގައި ހުކުމް އިއްވާފައިވާ ކުރީގެ ނާއިބު ރައީސް އަހްމަދު އަދީބަކީ ވެސް ގޯތި ލިބުނު ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. މީގެއިތުރުން ހަމަ މި މައްސަލާގައި ހުކުމް ކޮށްފައިވާ އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު ޒިޔަތަށް ވެސް ގޯތި ވަނީ ލިބިފައެވެ.

ހަމައެއާއެކު މާލެ ސިޓީ ކައުންސިލްގައި ތިއްބެވި ބައެއް މެންބަރުންނަށް ވެސް މާލެ ސަރަހައްދުން ސަރުކާރުން ދޫކުރަން ނިންމާފައިވާ ގޯތި ވަނީ ލިބިގެން ގޮސްފައެވެ. އޭގެތެރޭގައި ހިމެނެނީ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް އާއި މައްޗަންގޮޅި މެދު ދާއިރާގެ ކައުންސިލަރު އަހްމަދު ޒަމީރެވެ.

ސަރުކާރުން އިއުލާނު ކޮށްފައި ވަނީ މާލެ ސަރަހައްދުން 5،000 ގޯތި ދިނުމަށެވެ. އެއީ ހުޅުމާލެ ދެވަނަ ފިޔަވަހިން 2000 ގޯއްވާއި ގުޅީފަޅާއި ގިރާވަރުފަޅުން 3000 ގޯތި ދޫކުރުމަށެވެ.

ހައުސިން މިނިސްޓަރު މުހައްމަދު އަސްލަމް ވިދާޅުވީ ގޯއްޗަށް އެދި ހުށަހަޅާފައިވާ ފަރާތްތަކުގެ 19858 މީހުން ޝަރުތު ހަމަވާ ކަމަށެވެ. އޭގެތެރެއިން އިއްޔެ ގެޒެޓް ކުރަނީ 10314 މީހުންނަށް ލިބޭ ގޯއްޗެވެ.

އަސްލަމް ވިދާޅުވީ ބާކީ ތިބި 9544 މީހުންނަށް ޖޮއިންޓުކޮށް އެޕްލައި ކުރެވޭނެ ގޮތެއް ގެދޮރުވެރިޔާ ޕޯޓަލް މެދުވެރިކޮށް ހުށަހެޅޭނެ ގޮތް ހަދައި ދޭނެ ކަމަށެވެ. އަދި އެފަރާތްތަކަށް ވެސް ގޯތި ލިބޭނެ ގޮތްތައް މިނިސްޓަރު އަސްލަމް ހިއްސާ ކޮށްދެއްވިއެވެ.

އެގޮތުން ގިރާވަރު ފަޅާއި ގުޅީފަޅު ހިއްކުމުގެ މަސައްކަތްތައް ސަރުކާރުން ކުރަމުން އަންނަ ކަމަށާއި ހުޅުމާލޭގެ ދެވަނަ ފިޔަވަހި ހިއްކައިގެން ވެސް އެ ތަނުން ވެސް ބައެއް ގޯތި ދޭނެ ކަމަށް އަސްލަމް ވިދާޅުވިއެވެ.

ރާއްޖޭގެ އެހެން ރަށްތަކުގައި ދިރިއުޅޭ ރައްޔިތުންނަށް އެ ރަށްރަށް ހިއްކައިގެން ވެސް ގޯތި ދެމުން އަންނަކަން ފާހަގަކުރައްވާ އަސްލަމް ވަނީ މާލޭގެ ރައްޔިތުންނަށް ގޯތި ކަނޑާފައި ނުދޭތާ އެތައް ޒަމާންތަކެއް ވެއްޖެ ކަމަށެވެ. އެގޮތުގެ މަތީން މާލޭގެ ރައްޔިތުންނަށް ވެސް މާލެ ސަރަހައްދުން ގޯތި ލިބެންޖެހޭ ކަމަށް އެމަނިކުފާނު ވިދާޅުވިއެވެ.

މި ނޫސްވެރިންގެ ބައްދަލުވުމުގައި މިނިސްޓްރީގެ ފަރާތުން ވަނީ ގޯއްޗަށް އެދި ހުށަހަޅާފައިވާ ފަރާތްތަކުގެ މައުލޫމާތާއި އެމީހުންގެ ހާލަތު ދެނެގަތުމަށް އަމަލުކުރި ގޮތް މީޑިއާތަކާއި ހިއްސާ ކޮށްފައެވެ. އެގޮތުން ޕެންޝަން އޮފީހާއި ޑިޕާޓުމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) އާއި އެޑިއުކޭޝަން މިނިސްޓްރީ އާއި އިކޮނޮމިކް މިނިސްޓްރީ އާއި ސިވިލް ސާވިސް ކޮމިޝަނުން މައުލޫމާތުތައް ހޯދާފައިވާނެ ކަމަށް މިނިސްޓްރީން ބުނެއެވެ.