ރާއްޖޭގެ ދަނޑުވެރިކަމުގެ ސިނާއަތުގެ ފަންނީ ގާބިލުކަން އިތުރުކުރުމަށް އެހީތެރިކަން ފޯރުކޮށްދިނުމަށް ސްރީލަންކާއިން ނިންމައިފިއެވެ.

ރާއްޖޭގެ ފިޝަރީޒް މިނިސްޓަރު ޑރ ހުސައިން ރަޝީދު ހަސަންއާ ހަވާލާދީ ލަންކާގެ ނޫހަކުން ބުނީ، ސްރީލަންކާގެ ދަނޑުވެރިކަމުގެ ދާއިރާ ކުރިއެރުވުމަށް ކުރަމުންދާ މަސައްކަތްތަކަށް ސަރުކާރުގެ ސަމާލުކަން ލިބިފައިވާކަމަށެވެ.

ސްރީލަންކާގެ އެގްރިކަލްޗާ މިނިސްޓަރުގެ މީޑިއާ ސެކްރެޓަރީ ދަމާ ވަންނިނަޔަކަ މިދިޔަ ބުރާސްފަތި ދުވަހު ވިދާޅުވީ، ރާއްޖޭގައި ސާފު ފެނުގެ ވަސީލަތްތަކާއި މޭވާ އާއި ތަރުކާރީ ހައްދަން ބޭނުންވާ ފަސްގަނޑު ނެތުމުން ސްރީލަންކާ ސްޓައިލްގެ "ނެޓް ހައުސްތައް" ބޭނުންވާ ކަމުގެ ޝައުގުވެރިކަން ރާއްޖެއިން ފާޅުކޮށްފައިވާ ކަމަށެވެ.

ނެޓް ހައުސް އަކީ ގަސްގަހާގެހި އުފެދުމަށް އެކަށީގެންވާ މައިކްރޯކްލައިމެޓެއް ލިބޭ ގޮތަށް ފަރުމާކޮށްފައިވާ އޮނިގަނޑެކެވެ. މިއީ އާންމުގޮތެއްގައި އެގްރޯ ނެޓް ނުވަތަ އެހެނިހެން ވިވެން މެޓީރިއަލް ބޭނުންކޮށްގެން ހަދާފައިވާ އެއްޗެކެވެ.

ޝެޑް ހައުސްއެއްގެ މަގްސަދަކީ ގަސްގަހާގެއްސަށް އިރުގެ އަލި ފޯރާ މިންވަރު ރެގިއުލޭޓްކޮށް، ސީދާ އިރުގެ އަލި ގަދަވުން ކުޑަކުރުމެވެ. ހާއްސަކޮށް ފިނިހޫނުމިން މަތި، އިރުގެ އަލި މާ ބޮޑަށް ހުންނަ ސަރަހައްދުތަކުގައި މިއީ ބޭނުންތެރި ކަމެކެވެ.

ސްރީލަންކާގައި މޭވާ، ތަރުކާރީ އަދި ފްލޯރިކަލްޗާ ހެއްދުމުގައި ގިނަ ދަނޑުވެރިންގެ މެދުގައި ނެޓް ހައުސްތައް މަގްބޫލްއެވެ.

"ފަތުރުވެރިކަން ކުރިއެރުވުމަށާއި މަސް އެކްސްޕޯޓް ކުރުމުގައި ވެސް ރާއްޖެއިން އަޅުގަނޑުމެންނަށް އެހީތެރިކަން ފޯރުކޮށްދޭނެ، އޭގެ ބަދަލުގައި އެ މީހުންގެ ދަނޑުވެރިކަން ކުރިއެރުވުމަށް އެހީތެރިވެދޭނަން،" ވަންނިނަޔަކަ ވިދާޅުވިއެވެ.

އެކްސްޕޯޓް ޑިވެލޮޕްމަންޓް ބޯޑު (އީޑީބީ)ގެ ތަފާސް ހިސާބުތައް ދައްކާ ގޮތުން ރާއްޖެއަކީ ސްރީލަންކާއިން 24 ވަނަ އަށް އެންމެ ގިނައިން އެކްސްޕޯޓްކުރާ އެއް ގައުމެވެ.

މިދިޔަ އަހަރު ސްރީލަންކާއިން ރާއްޖެއަށް އެންމެ ގިނައިން އެކްސްޕޯޓްކުރި ބާވަތްތަކަކީ ހަކުރު، ބޭކަރީގެ ބާވަތްތަކާއި ސީރިއަލް އަދި އެއާ ގުޅުންހުރި ބާވަތްތަކެވެ.